Ukubelengiwa 20 - IBAYIBOLO 2024

Zizyo zikabombiwa pa Kadeshi

¹ Ichilundilo chosi icha ba Izilayeli chikafika munkolongo iya Zini, mumwezi uwakwanda nukuzenga ivisakasa vyabo pa Kadeshi. Kulakula u Miliyamu akafwa, po bakamusyila.

² Kulakula kutakabako amizi aghakung'wela, po ichilundilo chikabungana nukwilumbusya nu Mozesi nu Aloni.

³ Abantu bala bakadalinkana nu Mozesi ukuti, “Chikaba chizapo ngali tukafwila poka na bakamu bitu pamaso pa Mwene.

⁴ Nkimba choni chicho ukiza ni chilundilo icha Mwene munkolongo muno, ukuti aswe poka ni vitekwa vyitu tufwile munkolongo muno?

⁵ Nkimba choni chicho ukatwefyamo muchisu icha Ijiputi nukutwinjizya mubuzilo ububibi ubu? Kuno kute ingano pamo amakwi agha makuyu pamo amampesya pamo amanyele sona na mizi ghope aghakung'wela naghamo.”

⁶ U Mozesi nu Aloni bakepapo pamaso pa chilundilo nukubuka pamulyango uwa Chisakasa icha Mwene nukufughama. Po ubuchindamu ubwa Mwene bukabalamila.

⁷ U Mwene akamulamula u Mozesi akati,

⁸ “Senda indisa, po awe poka nu wamwinyu u Aloni muchibungannye poka ichilundilo chosi. Ulilamule ilyalabwe ukuti lifumye amizi, bo abantu bakwennya na maso ghabo. Amizi ghakwiza pakufuma, po aba Izilayeli bosi bakwiza pakung'wela, sona vyope ni vitekwa vyabo vikwiza pakung'wela.”

⁹ Po u Mozesi akayisenda indisa yiyo yikaba pamaso pa Mwene ukuyana namumo akamulamulila.

¹⁰ U Mozesi nu Aloni bakachibungannya ichilundilo pilyalabwe nukubabuzya ukuti, “Mwee bantu abakusambuka mwe, ivwa kuno! Nkimba tubafumisizye amizi mwilyalabwe ili?”

¹¹ Po u Mozesi akakwezya inyobe yache mumwanya nukukoma pilyalabwe lila kabili ni ndisa yache. Panapo na panapo amizi aminji ghakafuma, po ichilundilo chosi chikangw'ela, sona vyope ni vitekwa vyabo vikang'wela.

¹² Loli u Mwene akamubuzya u Mozesi nu Aloni akati, “Pachifukwa ichakuti amwe mutakansubila, sona nukuti mutakanchindika pakuba ne muzelu pamaso paba Izilayeli, amwe mutakwiza pakubinjizya abantu banaba muchisu chicho nkubapa.”

¹³ Ubuzilo bunubu bakabwita ukuti amizi agha Meliba pakuti bukaba buzilo bubo aba Izilayeli bakilumbusya nu Mwene, sona papo akilanjizya mwene pakasi papabo pakuba muzelu.

Aba Edomu bakubakanizya aba Izilayeli pakudumusannya

¹⁴ Bo bali pa Kadeshi, u Mozesi akatuma intumi kwa mwene uwa chisu icha Edomu na mazyu aghakuti, “Abakamu bako aba Izilayeli bakuti, uzimenye intamyo zyosi zizyo twakomanite nazyo.

¹⁵ Abanyenya bitu bakabuka mu Ijiputi, sona tukikala mulamula amaka aminji nkani. Aba Ijiputi bakatuyivya nkani, aswe poka na banyenya bitu.

¹⁶ Loli bo twamulilila u Mwene, akivwa ukulila kwitu nukututumila uwantumi yuyo akatwefyamo mu Ijiputi. Losi ulu tuli pa Kadeshi, mukaya akakulu kako kali mumpaka iya chisu chinyu.

¹⁷ Twalamba, twitikizye ukuti tudumusannye muchisu chako. Tutakwiza pakudumusannya mumaghunda ghinyu, pamo mumaghunda ghinyu agha mampesya pamo pakung'welamo muviziba vyinyu, awe. Tukwiza pakwenda bulo mumusebo umukulu, sona tutakwiza pakupaghukila kundilo pamo kumongo mupaka tudumusannye muchisu chako.”

¹⁸ Loli aba Edomu bakamula bakati, “Mutakachele pakudumusannya muchisu chitu, pakuti tukwiza pakubaghogha nupanga nanti mwa dumusannya bulo.”

¹⁹ Aba Izilayeli bakamula bakati, “Tukwiza pakwenda bulo mumusebo umukulu, sona nanti aswe, pamo ivitekwa vyitu twangw'ela amizi ghamo, tukwiza pakulipila, pakuti chicho tukulonda ko ku dumusannya bulo.”

²⁰ Aba Edomu bakamula bakati, “Mutakachele.” Po aba Edomu bakiza na kabukatila kabo aka basilikali akakulu, sona akamaka nkani nukulwa naba Izilayeli.

²¹ Pachifukwa ichakuti aba Edomu bakabakanizya aba Izilayeli pakudumusannya muchisu chabo, po aba Izilayeli bakapaghukila izila iyinji.

Ubufwe ubwa Aloni

²² Ichilundilo chosi icha ba Izilayeli chikasamapo pa Kadeshi nukufika pighamba ilya Holi.

²³ Palapala pighamba ilya Holi, papipi ni mpaka iya chisu icha Edomu, u Mwene akamubuzya u Mozesi nu Aloni akati,

²⁴ “U Aloni atakwiza pakwinjilamo muchisu chicho nkubapa aba Izilayeli. Akwiza pakufwa pachifukwa ichakuti mwebosi babili mukalusambukila lulaghilo lwane pamizi agha Meliba.

²⁵ Ukwele pamwanya pighamba ilya Holi awe nu Aloni, poka nu mwana wache u Eleyazala.

²⁶ Muvule u Aloni amenda agha buputi nukumuvwika umwana wache u Eleyazala, pakuti u Aloni akwiza pakufwila kulakula.”

²⁷ U Mozesi akabomba vyosi vivyo u Mwene akamulamula. Bakakwela pamwanya pighamba ilya Holi, bo ichilundilo chosi chikubennya.

²⁸ U Mozesi akamuvula u Aloni amenda agha buputi nukumuvwika umwana wache u Eleyazala. U Aloni akafwila pamwanya pighamba palapala. Po u Mozesi nu Eleyazala bakika pighamba pala.

²⁹ Bo ichilundilo chosi chivwa ukuti u Aloni afuye, aba Izilayeli bosi bakamulila amasiku 30.