Ukubelengiwa 2 - IBAYIBOLO 2024

Nizya kazengele aka visakasa ivya ba Izilayeli

¹ U Mwene akamubuzya u Mozesi nu Aloni akati,

² “Nanti aba Izilayeli bakuzenga ivisakasa vyabo, umuntu wesi azengaye ichisakasa chache papo pali indembela iya bamunyumba yache, sona azengaye pabutalipo umwakuchizyungulila Ichisakasa icha Mwene.”

³ Abantu babo bazengaye ivisakasa vyabo kulubazu ulwakubufumilo bwizuba, babanje aba ndembela iya luko ulwa Yuda. Po umulongozi uwa luko ulwa Yuda abanje we Nashoni umwana uwa Aminadabu,

⁴ sona abantu bache bosi bakabapo 74,600.

⁵ Abantu babo bazengaye papipi nuluko ulwa Yuda babanje aba Isakala. Po umulongozi uwa ba Isakala abanje we Netaneli umwana uwa Zuwala,

⁶ abantu bache bosi bakabapo 54,400.

⁷ Abaluko ulwa Zebuloni bakonkepo pakuzenga ivisakasa vyabo. Po umulongozi uwa ba Zebuloni abanje we Eliyabu umwana uwa Heloni,

⁸ abantu bache bosi bakabapo 57,400.

⁹ Po ubwinji ubwa bantu bosi babo bakazenga ivisakasa vyabo pasi pa ndembela iya Yuda ukuyana nu tubukatila twabo bukaba 186,400. Abantu banaba bakwiza pakulongolela pakubuka.

¹⁰ “Abantu babo bazengaye ivisakasa vyabo kulubazu ulwakuntende babanje aba ndembela iya luko ulwa Lubeni. Po umulongozi uwa luko ulwa Lubeni abanje we Elizuli umwana uwa Shedewuli,

¹¹ abantu bache bosi bakabapo 46,500.”

¹² Abantu babo bazengaye papipi naba Lubeni babanje baluko ulwa Simiyoni. Po umulongozi uwa ba Simiyoni abanje we Shelumiyeli umwana uwa Zulishadayi,

¹³ abantu bache bosi bakabapo 59,300.

¹⁴ Po abaluko ulwa Gadi bakonkepo. Umulongozi uwa ba Gadi abanje we Eliyasafu umwana uwa Debuli,

¹⁵ abantu bache bosi bakabapo 45,650.

¹⁶ Po ubwinji ubwa bantu bosi babo bakazenga ivisakasa vyabo pasi pa ndembela iya luko ulwa Lubeni ukuyana nu tubukatila twabo bukaba 151,450. Abantu banaba bakwiza pakuba babubili pakubuka.

¹⁷ “Panapo aba Levi bachinyamule Ichisakasa icha Mwene nukuvisamya ivisakasa vyabo pakasi pa visakasa. Bakwiza pakubuka ukuyana namumo bakazengela ivisakasa vyabo, umuntu wesi pasi pa ndembela iya bamunyumba yache.”

¹⁸ “Abantu babo bazengaye ivisakasa vyabo kulubazu ulwa kubwinjililo bwizuba babanje ba Efulayimu, pasi pa ndembela yabo. Po umulongozi uwa luko ulwa Efulayimu abanje we Elishama umwana uwa Amihudi,

¹⁹ abantu bache bosi bakabapo 40,500.”

²⁰ Abaluko ulwa Manase bakonkayepo. Po umulongozi uwa ba Manase abanje we Gamaliyeli umwana uwa Pedazuli,

²¹ abantu bache bosi bakabapo 32,200.

²² Po abaluko ulwa Benjamini bakonkayepo. Po umulongozi uwa ba Benjamini abanje we Abidani umwana uwa Gidiyoni,

²³ abantu bache bosi bakabapo 35,400.

²⁴ Po ubwinji bosi ubwa ba Manase, babo bakaba pasi pa ndembela iya ba Efulayimu bukaba 108,100. Abantu banaba bo babo bakwiza pakuba babutatu pakubuka.

²⁵ “Abantu babo bazengaye ivisakasa vyabo kulubazu ulwa kumitu babanje ba Dani pasi pa ndembela yabo. Po umulongozi uwa luko ulwa Dani abanje we Ahiyezeli, umwana uwa Amishadayi,

²⁶ sona abantu bache bosi bakabapo 62,700.

²⁷ Abaluko ulwa Asheli bazenge papipi naba Dani. Po umulongozi wabo abanje we Pagiyeli umwana uwa Okolani,

²⁸ sona abantu bache bosi bakabapo 41,500.”

²⁹ Abaluko ulwa Nafutali bakonkayepo. Po umulongozi wabo abanje we Ahila umwana uwa Enani,

³⁰ sona abantu bache bosi bakabapo 53,400.

³¹ Po ubwinji ubwa bantu bosi babo bakazenga ivisakasa vyabo pasi pa ndembela iya Dani bukaba 157,600. Abantu banaba bo babo bakwiza pakuba babumalilo pakubuka.

³² Ubwinji bosi ubwa ba Izilayeli babo bakabelengiwa muvisakasa ukuyana ni nyumba zyabo, sona nu tubukatila bukaba 603,550.

³³ Loli aba Levi batakabelengiwa poka naba Izilayeli abanji bosi ukuyana namumo u Mwene akamulamulila u Mozesi.

³⁴ Po aba Izilayeli bakabomba vivyo u Mwene akamulamula u Mozesi. Umu momumo bakazengela ivisakasa vyabo papo pakaba indembela zyabo, sona namumo bakanyamukila ubulendo bwabo, umulongozi wesi ni nyumba yache, sona nuluko lwache.