Ukubelengiwa 19 - IBAYIBOLO 2024

Amizi aghakuswefesezya

¹ U Mwene akamubuzya u Mozesi nu Aloni akati,

² “Ulu lo lulaghilo lulo u Mwene apinya: Ubalamule aba Izilayeli ukuti bize ni mpampali inchesamu, yiyo yite ni chilema nachimochimo, yiyo batayivwikitepo nalumolumo ikoli

³ Mumupe umuputi u Eleyazala ingwata yila, po abantu bayisendele kuzi ukwa visakasa nukuyibola pamaso papache.

⁴ Po umuputi u Eleyazala asendepo ibanda limo na kafingwi kache nukulinyafila akaseveni kuntazi ukwa Chisakasa icha Mwene.

⁵ Impampali yila bayoche pamaso pa Eleyazala, sona balungulizye ikwela lyache ni nyama yache ni banda lyache sona na mala ghache.

⁶ Umuputi asende ikwi ilya mwale ni chisilo sona nu lupote uluchesamu nukuvisumbila pamoto ghugho ghukulungulizya impampali yila.

⁷ Umuputi yula achape amenda ghache nukogha, po anginjila muvisakasa, loli akuba muntu munyazu mupaka pachamabwila.

⁸ Umuntu yuyo akulungulizya ingwata yila, achape amenda ghache nukogha, sona wepe akuba muntu munyazu mupaka pachamabwila.

⁹ “Umuntu yuyo te munyazu ayole itoyi ilya mpampali yila nukulibika kuzi ukwa visakasa pabuzilo ubwiza. Aba Izilayeli balisungaye itoyi lila umwakuti balibombezyanje mumizi aghakuswefesezya.

¹⁰ Umuntu yuyo akuyola itoyi ilya mpampali yila achape amenda ghache, sona wepe akuba muntu munyazu mupaka pachamabwila. Ululaghilo ulu lubanje lwa bwila na bwila ulwa ba Izilayeli, sona na bayeni babo bakwikala pakasi papabo.

Nizya kupalamasya umuvimba

¹¹ “Nanti umuntu akughupalamasya umuvimba, akuba muntu munyazu amasiku seveni.

¹² Pisiku ilyabutatu ni siku ilyaseveni, iswefye mwene na mizi aghakuswefesezya, po akwiza pakuba muntu muswepu. Loli nanti atakwiswefya mwene pisiku ilyabutatu nilyaseveni, umuntu yula akuba munyazu.

¹³ Umuntu wesi yuyo akughupalamasya umuvimba, sona nanti atakwiswefya mwene kokuti akuchinyazya Ichisakasa icha Mwene. Umuntu yulayula epusiwanjepo pakasi paba Izilayeli. Umuntu yula akuba munyazu pachifukwa ichakuti atakiswefya mwene na mizi aghakuswefesezya.

¹⁴ “Ulu lo lulaghilo ulwakunena nizya muntu yuyo afwila muchisakasa: Umuntu wesi yuyo akwinjila muchisakasa mula, sona nu muntu wesi yuyo ali mulamula akuba munyazu amasiku seveni.

¹⁵ Isonta yosi yiyo yite ni chikupikizyo yikuba nyazu.

¹⁶ “Umuntu wesi uwakumupalamasya umuntu yuyo aghoghiwa nupanga pamo afuye bulo pamo ifupa ilya muntu umufwe pamo ipumpa akuba muntu munyazu amasiku seveni.

¹⁷ “Pakubuswefya ubunyazu, sendako itoyi limo musonta iya chakwiyipa ichakocha ichakupepesezya imbibi nukupungulilamo amizi.

¹⁸ Po umuntu yuyo te munyazu asende ichisilo achidwibike mumizi ghala nukuchinyafila ichisakasa chache ni vibombelo vyache vyosi poka na bantu bosi babo bakaba mulamula. Amunyafile sona umuntu wesi uwakupalamasya ifupa ilya muntu umufwe pamo ipumpa pamo umuntu yumo yuyo aghoghiwa pamo umuntu yuyo afuye bulo.

¹⁹ Po umuntu yuyo te munyazu amunyafile umuntu yuyo munyazu pisiku ilyabutatu nilyaseveni, sona amuswefye umuntu yula pisiku ilyaseveni. Umuntu yulayula achape amenda ghache nukogha, po pachamabwila akuba muntu muswepu.

²⁰ “Loli nanti umuntu yuyo munyazu atakwiswefya mwene, epusiwanjepo pakasi pa chilundilo chosi, pachifukwa ichakuti akubunyazya Ubuzilo Ubuzelu ubwa Mwene. Umuntu yula akuba munyazu pakuti batakamunyafila amizi aghakuswefesezya.

²¹ Ululaghilo ulu lubanje lwa bwila na bwila. “Umuntu yuyo akunyafila amizi aghakuswefesezya, wepe achape amenda ghache, sona umuntu wesi yuyo akughapalamasya amizi ghanagha, akuba munyazu mupaka pachamabwila.

²² Ichintu chosi chicho umuntu munyazu akuchipalamasya chikuba chinyazu, sona umuntu wesi uwakuchipalamasya, akubanga munyazu mupaka pachamabwila.”