Ukubelengiwa 18 - IBAYIBOLO 2024

Imbombo iya baputi niya ba Levi

¹ U Mwene akamubuzya u Aloni akati, “Awe na bana bako, sona na bamunyumba yako mwemwe mukwiza pakunyamula ukunanga ukwa Mubuzilo Ubuzelu, sona awe poka na bana bako mwemwe mukwiza pakunyamula ukunanga ukwa baputi.

² Wize na bakamu bako abaluko ulwa Levi umwakuti babombaye imbombo poka nawe, bo awe na bana bako mukubomba imbombo mu Chisakasa icha Lufingo.

³ Bakwavwanje imbombo, sona nukubomba imbombo zyosi izya mu Chisakasa icha Mwene. Loli batakapalamilaye ni vibombelo ivipaghuliwa ivya Mubuzilo Ubuzelu pamo ichighemo, lumo mwebosi mungafwa.

⁴ Babombaye imbombo poka nawe, sona babombaye imbombo yosi iya mu Chisakasa icha Mwene, loli atakabepo nayumo umuntu bulo uwakupalamila papipi namwe.

⁵ “Amwe mubombaye imbombo iya Mubuzilo Ubuzelu, sona na pachighemo, umwakuti ubukali bwane butakabawile aba Izilayeli.

⁶ Ane nemwene ne nabasala abamwinyu aba Levi pakasi paba Izilayeli pakuba chabupi chinyu, sona bapaghuliliwe kwa Mwene pakubomba imbombo mu Chisakasa icha Mwene.

⁷ Loli awe na bana bako mubombaye imbombo iya buputi, ni mbombo yosi iya pachighemo, sona ni mbombo yosi iya Mubuzilo Ubuzelu nkani. Nkukupa imbombo iya buputi pakuba chabupi chako. Umuntu bulo yuyo akupalamila kupipi ni Chipinda Ichizelu nkani aghoghiwanje.”

Ichigaba icha baputi

⁸ U Mwene akamubuzya u Aloni akati, “Ane nemwene ne nakubika pakuba we kapitawa uwa vyakwiyipa vyosi vivyo aba Izilayeli bakumpa. Ivyakwiyipa vyosi nakupa awe na bana bako pakuba chigaba chinyu icha bwila na bwila

⁹ Ubanje ni chigaba icha vyabupi ivipaghuliwa nkani vivyo vitalunguziwe numoto manyi vyakwiyipa ivya busu manyi vyakwiyipa ivyakupepesezya imbibi manyi vyakwiyipa ivyakupepesezya inongwa vibanje vyako na bana bako

¹⁰ Muvilyelaye Mubuzilo Ubuzelu, sona umwanavuli wesi angalya. Po muvipimaye pakuba vizelu.

¹¹ “Ivinji vivyo nabapa vyo ivi: Ivyabupi vyosi ni vyakwiyipa ivyakuzyunguzya mumwanya ivya ba Izilayeli, nkukupa awe poka na bana bako, abalumendo na balindu pakuba chigaba chinyu icha bwila na bwila. Umuntu wesi yuyo atinyazizyepo mwene pakasi papinyu alyanje ichakwiyipa chinichi.

¹² “Nabapa amafuta amiza nkani nu vinyo wesi umwiza nkani, ni ngano yosi inyiza, sona ni vikomwa vyosi ivyakwanda pakutona, vivyo abantu bakumupa u Mwene.

¹³ Ivikomwa vyosi ivyakwanda pakutona ivya muchisu chinichi, vivyo abantu bakumupa u Mwene vibanje vyinyu. Umuntu wesi uwa munyumba yinyu yuyo atinyazizye mwene angalya.

¹⁴ “Ichintu chicho aba Izilayeli bakuchipaghulila kwa Mwene, chibanje chinyu.

¹⁵ Chosi chicho chakwanda pakupapiwa, manyi muntu, manyi chinyamana chicho chikubikiwa kwa Mwene, chibanje chinyu. Loli mumutabulaye ukatote wesi umulumendo, sona nu mwana wesi uwa chinyamana ichinyazu uwakwanda pakupapiwa.

¹⁶ Mubatabulaye bo bamala umwezi ghoka pamutengo wache uwakutabulila uwa salabazya izya siliva fayivi ukuyana ni chipimilo icha Mubuzilo Ubuzelu.

¹⁷ “Loli mutakayitabulaye ingwata iyakwanda pakupapiwa pamo umwana uwa ng'ozi pamo umwana uwa mbuzi pakuti vizelu. Ulinyafile ibanda lyache pachighemo nukocha amafuta ghache ukuti chibanje chakwiyipa ichakocha, chicho umunusi wache ghukumuhobosya u Mwene.

¹⁸ Loli inyama yache yibanje yako ukuyana namumo kabeleye akajimbi iyakuzyunguzya mumwanya ni ntapatapa iya chinama icha ndilo.

¹⁹ Ivyakwiyipa vyosi ivizelu vivyo aba Izilayeli bakubika kwa Mwene nkukupa awe, na bana bako abalumendo na balindu pakuba chigaba chinyu icha bwila na bwila. Ulu lo lufingo ulwa mbeya ulwa bwila na bwila, lulo nafingana nawe poka na bana bako.”

²⁰ U Mwene akamubuzya u Aloni akati, “Utakwiza pakuba mpyana iya chisu chabo, pamo ni chigaba chimo icha katundu wabo. Ane ne mpyana yako, sona ne chigaba chako pakasi paba Izilayeli.”

Ichigaba icha ba Levi

²¹ U Mwene akati, “Nabapa aba Levi ichigaba choka pavigaba 10 vyosi ivya ba Izilayeli pakuba mpyana yabo pachifukwa icha mbombo yiyo bakuyibomba mu Chisakasa icha Mwene.

²² Ukwanda ilelo aba Izilayeli batakapalamilaye kupipi ni Chisakasa icha Mwene umwakuti batakanange nukufwa

²³ Loli aba Levi babombaye imbombo yiniyi mu Chisakasa icha Mwene sona bakwiza pakufundiwa nanti bakunanga imbombo yabo. Ulu lo lulaghilo ulwa bwila na bwila mupaka inkulilo zyinyu zyosi izya muntazi. Aba Levi batakwiza pakuba nacho chimo ichilingo icha bwila na bwila pakasi paba Izilayeli,

²⁴ pakuti nabapa aba Levi chigaba choka pavigaba 10 vivyo aba Izilayeli bakubika kwa Mwene pakuba chakwiyipa chabo. Ichi cho chifukwa nkababuzya ukuti, ‘Batakwiza pakuba ni mpyana nayimoyimo iya bwila na bwila pakasi paba Izilayeli.’ ”

Ichigaba choka pavigaba 10 ivya ba Levi

²⁵ U Mwene akamubuzya u Mozesi akati,

²⁶ “Ubabuzye aba Levi uti, ‘Bo mwapokela ichigaba choka pavigaba 10 ivya ba Izilayeli vivyo nkubapa amwe pakuba mpyana yinyu, mubike kwa Mwene ichigaba choka pavigaba 10 ukuti chibanje chakwiyipa.

²⁷ Ichakwiyipa chinyu chikwiza pakuyana bulo ni ngano yiyo mwakoma bulo, pamo ukufuma mumampesya ghagho mwakanya bulo muchakukanyilamo amampesya.

²⁸ Po bunubu namwe bulo mubikaye ichakwiyipa kwa Mwene icha chigaba choka pavigaba 10 vyosi ivya ba Izilayeli. Ichigaba choka pavigaba 10 vyosi vinivi mumupanje umuputi u Aloni, ichigaba icha Mwene.

²⁹ Mubikaye kwa Mwene pakuba chigaba ichiza nkani, sona ni chizelu nkani, ivyabupi vyosi vivyo mukupokela.’

³⁰ “Ubabuzye sona aba Levi uti, ‘Bo mwabika ichigaba ichiza nkani, musungayeko ivyakusyala ivya ngano yinyu yiyo mwakoma, pamo amampesya ghinyu ghagho mwakanya bulo muchakukanyilamo amampesya.

³¹ Amwe poka na bamunyumba zyinyu mungalya ivyakusyala vyosi, pakuti gho malipilo ghinyu pachifukwa icha mbombo yiyo mukubomba mu Chisakasa icha Mwene.

³² Amwe mutakwiza pakuba ninongwa nanti mwalya ichigaba ichiza nkani, chicho mwabika kwa Mwene. Loli mwenelezyanje ukuti mutakuvinyazya ivyakwiyipa ivizelu ivya ba Izilayeli, po mutakwiza pakufwa.’ ”