Ukubelengiwa 17 - IBAYIBOLO 2024

Nizya ndisa iya Aloni

¹ U Mwene akamubuzya Mozesi akati,

² “Ubalamule aba Izilayeli ukuti bakupe indisa 12, indisa yoka iya mulongozi wesi uwa luko. Usimbepo itabwa ilya muntu pandisa yache.

³ Usimbepo itabwa ilya Aloni pandisa iya Levi, pakuti pabaghiye pabanje indisa yoka iya mulongozi wesi uwa luko.

⁴ Uzibike indisa zila mu Chisakasa icha Mwene kuntazi ukwa Bokosi ilya Lufingo, kuko nkukomanilako nawe.

⁵ Indisa iya muntu yuyo imusalite yikwiza pakulemba. Bunubu ntakwiza sona pakuteghelezya amilumbusyo agha ba Izilayeli ghagho bakwilumbusya nawe.”

⁶ U Mozesi akabalamula aba Izilayeli, po abalongozi babo bakamupa indisa 12, indisa yoka iya mulongozi wesi uwa luko, sona yope ni ndisa iya Aloni yikaba palapala.

⁷ U Mozesi akazibika indisa zila pantazi pa Bokosi ilya Lufingo pamaso pa Mwene mu Chisakasa.

⁸ Indabi yache u Mozesi akinjila mu Chisakasa icha Lufingo nukwennya ukuti indisa iya Aloni, yiyo yikimilila uluko ulwa Levi, yikalemba amani, nukubazya ubwezya, sona vikela ivikomwa ivya muposya.

⁹ Po u Mozesi akazifumya indisa zyosi zila pantazi pa Mwene nukubalanjizya aba Izilayeli. Bo bazyennya, umulongozi wesi akasenda indisa yache.

¹⁰ U Mwene akamubuzya u Mozesi akati, “Nyosezya indisa iya Aloni kuntazi ukwa Bokosi ilya Lufingo, sona uyisunge pakuba chimanyilo ku bantu abakusambuka umwakuti batakafwe pachifukwa icha kwilumbusya kwabo.”

¹¹ U Mozesi akabomba vyosi vivyo u Mwene akamulamula.

¹² Aba Izilayeli bakamubuzya u Mozesi bakati, “Twafwa, twebosi twazimila!

¹³ Nanti umuntu wesi yuyo akupalamila ku Chisakasa icha Mwene akufwa, kokuti twebosi tukwiza pakuzimila!”