Ukubelengiwa 16 - IBAYIBOLO 2024

Nizya Kola nu Datani, sona nu Abilamu

¹ Isiku limo u Kola umwana uwa Izihali, uwa munyumba iya Kohati yuyo akaba uwa luko ulwa Levi poka nu Datani nu Abilamu babo bakaba bana aba Eliyabu sona nu Oni umwana uwa Peleti babo bakaba baluko ulwa Lubeni, bakamusambukila u Mozesi.

² Bakabadeba abalongozi bamo abamanyikwe 250 aba ba Izilayeli, babo bakasaliwa ni chilundilo chosi.

³ Bakabungana poka pamaso pa Mozesi nu Aloni nukuti, “Mwee mwachilapo pakwituvya! Umuntu wesi muchilundilo ichi muzelu, sona u Mwene wepe ali nabo. Po nkimba choni chicho mukwipima pakuba bapamwanya ukuchila ichilundilo icha Mwene?”

⁴ Bo u Mozesi ivwa zinizi akafughama.

⁵ Po akamubuzya u Kola na bakonki bache akati, “Indabi pandabindabi u Mwene akwiza pakutulanjizya yuyo wache, sona na yuyo muzelu, po akwiza pakumupalamizya umuntu yulayula kukwache.

⁶ Awe Kola poka na bakonki bako bosi mubombaye izi: Senda ichakufukizizya utwakununkila

⁷ nukubikamo umoto nu twakufukizya utwakununkila nukuchibika pantazi pa Mwene. Umuntu yuyo u Mwene akwiza pakumusala weyuyo muzelu. Mwee ba Levi mwachilapo pakwituvya.”

⁸ Po u Mozesi akamubuzya u Kola akati, “Ivwa kuno mwe ba Levi.

⁹ Nkimba mukuchisenda chipepe nkani ukuti u Chala uwa Izilayeli akabapaghula amwe pakasi pa chilundilo chosi icha ba Izilayeli nukubapalamizya kukwache umwakuti mubombaye imbombo mu Chisakasa icha Mwene nukwimilila pamaso pa chilundilo pakuchibombela?

¹⁰ Abitikizya pakupalamila kukwache, amwe poka na bakamu binyu aba Levi. Nkimba mukubunyonywa sona nu buputi bulo?

¹¹ Naloli pakubomba bunubu kokuti awe poka na bakonki bako mukumusambukila u Mwene. Nkimba u Aloni wewenu ukuti mwilumbuzye nawe?”

¹² Po u Mozesi akamwitizya u Datani nu Abilamu abana aba Eliyabu. Loli bakamula bakati, “Awe tutakwizako.

¹³ Nkimba ukuchisenda chintu chipepe ukuti ukatwefyamo muchisu icha mboto chila ukuti tufwile munkolongo muno? Nkimba ukulonda sona pakuba we mwene witu?

¹⁴ Ukonjelezyapo, utatwinjizizye muchisu icha mboto pamo ukutupa amaghunda agha mampesya pakuba ghitu na ghitu. Nkimba ukulonda pakutusenda ngati twe bapunganu? Awe tutakwizako!”

¹⁵ Po u Mozesi akakalala nkani nukumubuzya u Mwene ukuti, “Utakapokelaye ivyakwiyipa ivya bantu banaba. Ntabafyulitepo nayimo impunda pamo ukumunangila umuntu weka bulo.”

¹⁶ U Mozesi akamubuzya u Kola akati, “Indabi, awe poka na bakonki bako, sona nu Aloni mwize pamaso pa Mwene.

¹⁷ Umuntu wesi asende ichakufukizizya utwakununkila nukubikamo utwakununkila, tosi poka tubanje utwakufukizizya 250 nukwiza nato pamaso pa Mwene. Awe nu Aloni mubike utwakufukizizya utwakununkila twinyu.”

¹⁸ Po umuntu wesi akasenda ichakufukizizya utwakununkila nukubikamo umoto nu twakufukizya utwakununkila, sona bakimilila poka nu Mozesi nu Aloni pamulyango uwa Chisakasa icha Mwene.

¹⁹ U Kola akachibungannya ichilundilo chosi pamulyango uwa Chisakasa icha Mwene umwakwenannya nu Mozesi nu Aloni. Po ubuchindamu ubwa Mwene bukachilamila ichilundilo chosi chila.

²⁰ U Mwene akamubuzya u Mozesi nu Aloni akati,

²¹ “Mwepepo pakasi pa chilundilo chinichi, umwakuti imbazimizye panapo na panapo.”

²² Loli u Mozesi nu Aloni bakafughama nukukolomoka ukuti, “Wee Chala, sona we mbwibwi iya bumi ubwa bantu bosi, nkimba uchikalaliye ichilundilo chosi pachifukwa icha mbibi izya muntu weka?”

²³ U Mwene akamubuzya u Mozesi akati,

²⁴ “Uchibuzye ichilundilo chosi ukuti bachitantame ichisakasa icha Kola nu Datani, sona nu Abilamu.”

²⁵ U Mozesi akabuka kwa Datani nu Abilamu, po abalongozi aba Izilayeli bakamukonka.

²⁶ U Mozesi akachibuzya ichilundilo chila akati, “Muvitantame ivisakasa ivya bantu ababibi banaba, sona mutakachipalamasyanje nachimo ichintu ichinyazu icha bantu banaba lumo mungazimila poka nabo pachifukwa icha mbibi zyabo.”

²⁷ Po abantu bala bakachitantama ichisakasa icha Kola nu Datani, sona nu Abilamu. U Datani nu Abilamu bakepamo nukwimilila poka na bachi babo, na bana babo sona na babonda pamilyango yabo iya visakasa.

²⁸ Po u Mozesi akati, “Losi ulu mukwiza pakumanya ukuti imbombo zyosi zizyo nkuzibomba, ntakuzibomba na maka aghane na ghane, awe, loli we Mwene yuyo antumite.

²⁹ Nanti abantu banaba bakwiza pakufwa ukuyana namumo abantu bosi bakufwila, sona nanti u Chala atakubafunda, kokuti naloli u Mwene atantumite.

³⁰ Loli nanti u Mwene akwiza pakubombapo chimo ichiyeni, sona nanti ichisu chikwasama nukubamila poka nu katundu wabo wesi nukwinjila muchiliba, bo bachili bumi, po mukwiza pakumanya ukuti abantu banaba bakamusamula u Mwene.”

³¹ Bo u Mozesi anena bulo amazyu ghosi ghanagha, ichisu chikasama, pabuzilo bubo bakabapo

³² nukubamila abantu, poka na bamunyumba zyabo, na bakonki bosi aba Kola, poka nu katundu wabo wesi.

³³ Po bakinjila muchiliba bo bachili bumi, poka nu katundu wabo wesi. Ichisu chikabighalila, po bakazimila.

³⁴ Aba Izilayeli bosi babo bakaba palapala bakachimbila bo bivwa ukulila kwabo. Bakakolomoka bakati, “Mwee, chimbila lumo ichisu chingatumila naswe bulo!”

³⁵ Po u Mwene akabawisizya umoto uwakwaka nukubalungulizya abantu 250 bala, babo bakafukizya utwakununkila.

Ivyakupalila umoto

³⁶ Po u Mwene akamubuzya u Mozesi akati,

³⁷ “Umulamule u Eleyazala umwana uwa muputi u Aloni ukuti efyemo umoto muvyakufukizizya utwakununkila tula nukughusumbila kubutali nkani umoto ghula, pakuti ivyakufukizizya utwakununkila vila vizelu.

³⁸ Ivyakufukizizya utwakununkila ivya bantu babo bakaghoghiwa pachifukwa icha kunanga kwabo vyaba vizelu. Uvisyane pakuba vikupikizyo ivipapate ivya pachighemo, pakuti vikabikiwa kwa Mwene, sona vyaba vizelu. Po vinivi vikwiza pakuba chimanyilo ichakubasoka aba Izilayeli.”

³⁹ Po umuputi u Eleyazala akasenda ivyakufukizizya utwakununkila ivya mukuba ivya bantu babo bakalungulila numoto. Akavisyana pakuba vikupikizyo ivipapate ivya pachighemo.

⁴⁰ Ichi chikaba chimanyilo ichakubasoka aba Izilayeli ichakuti umuntu bulo yuyo ate waluko ulwa Aloni atakafukizyanje utwakununkila pachighemo pamaso pa Mwene lumo zingamuwila zizyo zikamuwila u Kola poka na bakonki bache. Zyosi zinizi zikabombiwa ukuyana namumo u Mwene akamulamulila u Eleyazala ukwendela mwa Mozesi.

⁴¹ Loli indabi yache ichilundilo chosi chikilumbusya nu Mozesi nu Aloni ukuti, “Amwe mwabaghogha abantu aba Mwene.”

⁴² Bo ichilundilo chabungana poka pakumususya u Mozesi nu Aloni, chikaghalabuka nukwennya ku Chisakasa icha Mwene, po panapo na panapo ibingu likachivwinka Ichisakasa chila, sona ubuchindamu ubwa Mwene bukabalamila.

⁴³ U Mozesi nu Aloni bakiza kuntazi ukwa Chisakasa icha Mwene,

⁴⁴ po u Mwene akamubuzya u Mozesi akati,

⁴⁵ “Epapo pakasi pa chilundilo chinichi, umwakuti imbazimizye numoto panapo na panapo!” Po bosi babili bakafughama.

⁴⁶ U Mozesi akamubuzya u Aloni akati, “Senda ichakufukizizya utwakununkila chako nukubikamo utwakufukizya utwakununkila numoto uwa pachighemo. Bukagha lubilolubilo ku chilundilo pakubomba ulwiho ulwakupepesezya imbibi zyabo. Pakuti ubukali ubwa Mwene bwawa, sona ichiwaya chandite kale.”

⁴⁷ Po u Aloni akasenda ichakufukizizya utwakununkila chila nukuchimbilila nacho pakasikasi pa chilundilo. Ichiwaya chikaba ukuti chighuye kale pakasi pabantu bala, loli u Aloni akabika utwakufukizya utwakununkila pakubomba ulwiho ulwakupepesezya imbibi zyabo.

⁴⁸ U Aloni akimilila pakasi pabantu abumi na bafwe, po ichiwaya chila chikamala.

⁴⁹ Loli ubwinji ubwa bantu bosi babo bakafwa ni chiwaya chila bakabapo 14,700, ukonjelezyapo abantu babo bakafwa pachifukwa icha Kola.

⁵⁰ Pisinda pache u Aloni akanyokela kwa Mozesi pamulyango uwa Chisakasa icha Mwene pakuti ichiwaya chila chikamala.