Ukubelengiwa 15 - IBAYIBOLO 2024

Indaghilo izyakunena nizya vyakwiyipa

¹ U Mwene akamubuzya u Mozesi akati,

² “Ubabuzye aba Izilayeli uti, ‘Bo mwinjila muchisu chicho nkubapa pakuba chinyu ni chinyu,

³ sona nanti mukubika ing'ombe pamo ing'ozi kwa Mwene ukuti chibanje chakwiyipa ichakocha icha chilapo chicho umunusi wache ghukumuhobosya pamo ukuti chibanje ichapalubazu pamo ichakwiyipa icha bwighane pamo ichakwiyipa icha lusekelo,

⁴ po umuntu yuyo akubika ichakwiyipa chache kwa Mwene abike ikilogalamu lyoka ilya chakwiyipa icha busu ubutinye, ubwakongannya na mafuta amalita mabili.

⁵ Nanti akubika ing'ozi ukuti chibanje chakwiyipa ichakocha kwa Mwene, abike sona ni lita lyoka ilya chakwiyipa icha vinyo.’ ”

⁶ Nanti mukubika udubi, mubike sona ichakwiyipa icha ubusu amakilogalamu mabili ubwakongannya na mafuta agha misyunguti ilita lyoka,

⁷ sona nanti mukubika ichakwiyipa icha vinyo, mubike uvinyo ilita lyoka, chicho umunusi wache ghukumuhobosya u Mwene.

⁸ Bo mukubika inkambaku ukuti chibanje chakwiyipa ichakocha icha chilapo pamo ichakwiyipa ichapalubazu pamo ichakwiyipa ichabupoka kwa Mwene

⁹ mubike sona inkambaku yoka poka ni chakwiyipa icha busu ubwakukwana amakilogalamu matatu ubwakongannya na mafuta agha misyunguti amalita mabili.

¹⁰ Mubike sona amalita mabili agha vinyo ukuti chibanje chakwiyipa icha vinyo, umunusi uwachakwiyipa chinichi ghukumuhobosya u Mwene.

¹¹ “Umu momumo mubombelaye ni chakwiyipa icha nkambaku pamo udubi pamo umwana uwa ng'ozi pamo umwana uwa mbuzi.

¹² Umu momumo mubombelaye ni vyakwiyipa vinivi napapo vingaba vyinji nkani.”

¹³ Nanti mwe benekaya mukulonda pakubika ichakwiyipa ichakocha ichakununkila ichakumuhobosya u Mwene mukonkaye indaghilo zinizi.

¹⁴ Sona nanti abayeni babo bakwikala namwe, pamo abantu bosi babo bakwikala namwe mupaka inkulilo zyinyu zyosi izya muntazi bakulonda pakubika ichakwiyipa ichakocha, chicho umunusi wache ghukumuhobosya u Mwene, abombaye bulo ukuyana namumo mukubombela.

¹⁵ Ukwanda ilelo mupaka inkulilo zyinyu zyosi izya muntazi, amwe poka na bayeni babo bakwikala pakasi papinyu mubanje na malamulo aghakuyana bulo. Amwe poka na bayeni muyanite bulo pamaso pa Mwene.

¹⁶ Amwe poka na bayeni babo bakwikala namwe mubanje ni ndaghilo na malamulo aghakuyana bulo.

¹⁷ U Mwene akamubuzya u Mozesi akati,

¹⁸ “Ubabuzye aba Izilayeli uti, ‘Bo mwinjila muchisu chicho nkubapa,

¹⁹ sona bo mukulya ichakulya icha muchisu chila, mupaghulaye vimo ivyakulya ukuti chibanje chakwiyipa kwa Mwene.

²⁰ Mubike ichibama choka icha ubusu bwinyu ubwakwanda ukuti chibanje ichipaghuliwa kwa Mwene ukuyana namumo mukubikila ichakwiyipa ichipaghuliwa icha ngano chicho mwakoma.

²¹ Umu momumo mubaghiye pakubika ichibama ichapalubazu ukuti chibanje chakwiyipa kwa Mwene mupaka inkulilo zyinyu zyosi izya muntazi.’ ”

²² “Loli nanti mwapuvya umwakusita kumanya pakusungilila amalamulo ghosi ghagho u Mwene akamupa u Mozesi,

²³ na malamulo ghosi ghagho akabapa ukwendela mwa Mozesi ukwandila isiku lilyo u Mwene akabapa amalamulo ghanagha mupaka inkulilo zyosi izya muntazi.

²⁴ Nanti mwapuvya umwakusita ukuzimanya abantu bosi, po abantu babikaye inkambaku inyana ukuti chibanje chakwiyipa ichakocha, chicho umunusi wache ghukumuhobosya u Mwene, poka ni chakwiyipa icha busu, ni chakwiyipa icha vinyo nu sabwe weka ukuti chibanje ichakupepesezya imbibi.

²⁵ Umuputi abike ichakwiyipa ichakupepesezya imbibi izya bantu bosi, po abantu bakwiza pakuhobokeliwa, pakuti bakapuvya umwakusita ukuzimanya, sona nukuti bakabika kwa Mwene ichakwiyipa ichakocha ukuti chibanje ichakupepesezya imbibi.

²⁶ Aba Izilayeli poka na bayeni babo bakwikala pakasi papabo bakwiza pakuhobokeliwa, pakuti abantu bosi bakapuvya umwakusita ukuzimanya.”

²⁷ “Loli nanti umuntu weka bulo apuvya umwakusita ukuzimanya, abike imbuzi yoka inkolo iya mwaka ghoka ukuti yibanje chakwiyipa ichakupepesezya imbibi.

²⁸ Umuputi abike ichakwiyipa kwa Mwene ichakupepesezya imbibi izya muntu yuyo akapuvya umwakusita ukuzimanya sona bo abika ichakwiyipa chila, po umuntu yula akwiza pakuhobokeliwa.

²⁹ Mwebosi mubanje nu lulaghilo loka ulwakunena nizya muntu yuyo apuvya umwakusita ukuzimanya manyi benekaya manyi bayeni.

³⁰ Loli nanti umuntu akubombela madinko bulo manyi benekaya pamo umuyeni kokuti akumusamula u Mwene, sona umuntu yunuyu epusiwanje pakasi pabantu bache.

³¹ Pakuti aghasamula amazyu agha Mwene, sona nukuti anangannya indaghilo zyache, umuntu yulayula epusiwanje, sona ukunanga kwache kukwiza pakuba pamutu wache.”

Nizya muntu uwakulisamula Isiku Ilyakutuzya

³² Bo aba Izilayeli bali munkolongo, bakamwagha umuntu yumo akutenya inkwi Pisiku Ilyakutuzya.

³³ Abantu babo bakamwagha akutenya inkwi bakiza nawe kwa Mozesi nu Aloni na ku chilundilo chosi

³⁴ nukumwighalila mujele, pachifukwa ichakuti batakamanya akiza izyakuti babombe nawe.

³⁵ Po u Mwene akamubuzya u Mozesi akati, “Umuntu yunuyu aghoghiwanje. Ichilundilo chosi chimusumbe na mabwe kuzi ukwa visakasa.”

³⁶ Po ichilundilo chosi chikamusendela umuntu yula kuzi ukwa visakasa nukumughogha na mabwe, ukuyana namumo u Mwene akamulamulila u Mozesi.

Indaghilo izyakunena na mabuzi amatalitali agha nkazo

³⁷ Po u Mwene akamubuzya u Mozesi akati,

³⁸ “Ubabuzye aba Izilayeli ukuti inkulilo zyabo zyosi izya muntazi basonelele amabuzi amatalitali muntende mulubazu ulwa menda ghinyu, nukusonelelamo ulupote ulwa buluu kumabuzi ghalaghala.

³⁹ Amabuzi amatalitali ghanagha ghakwiza pakuba chikumbusyo icha malamulo agha Mwene ukuti mughakonkaye, mubuzilo ubwa kukonka ivinyonywa ivya mabili ghinyu.

⁴⁰ Po mukwiza pakughakumbuka amalamulo ghane ghosi, sona ghakwiza pakuba mapaghuliwa kwa Chala winyu.

⁴¹ Ane ne Mwene u Chala winyu, nkabefya muchisu icha Ijiputi pakuba we Chala winyu. Ane ne Mwene u Chala winyu.”