Ukubelengiwa 14 - IBAYIBOLO 2024

Aba Izilayeli bakusambukila

¹ Po ubusiku bulabula abantu bosi bakakolomoka nkani nukulila busiku bosi.

² Aba Izilayeli bosi bakilumbusya kwa Mozesi nu Aloni, sona na kuchilundilo chosi bakati, “Chikaba chizapo ngali tukafwila bulo mu Ijiputi mula, pamo munkolongo muno!

³ Nkimba choni chicho u Mwene akutwinjizya muchisu chinichi? Nkimba akulonda ukuti twebosi tughoghiwe pabwite? Abachi bitu na bana bitu bakwiza pakulemiwa pakuba bazya. Nkimba chitangaba chizapo ukuti tunyokele ku Ijiputi?”

⁴ Po bakanenezannya bakati, “Zagha twisalile twebene umulongozi ukuti tunyokele ku Ijiputi.”

⁵ U Mozesi nu Aloni bakisumbila pasi pamaso pachilundilo chosi icha ba Izilayeli.

⁶ U Yoshwa umwana uwa Nuni nu Kalebu umwana uwa Yefune, babo bakaba bamo aba mukabukatila aka batendezi, bakazepula amenda ghabo pachifukwa icha chitima.

⁷ Po akachibuzya ichilundilo chosi icha ba Izilayeli akati, “Ichisu chicho tukabuka pakutendela cho chisu ichiza nkani.

⁸ Nanti u Mwene angatupelela ichisa, akwiza pakutwinjizya muchisu icha mboto chinichi nukutupa pakuba chitu ni chitu.

⁹ Mutakamusambukilaye u Mwene, sona mutakabanyilaye abantu aba muchisu chilachila, pakuti tukwiza pakubanangannya. Abene bate na maka sona, loli aswe u Mwene ali naswe, po mutakabanyilaye.”

¹⁰ Loli ichilundilo chosi chikati, “Zagha tubasumbe na mabwe.” Po panapo na panapo ubuchindamu ubwa Mwene bukababonekela aba Izilayeli bosi pa Chisakasa icha Mwene.

U Mozesi akubiputila aba Izilayeli

¹¹ U Mwene akamulalusya u Mozesi akati, “Nkimba abantu banaba bakwiza pakuleka liyi pakunsamula? Nkimba bakwiza pakukana ukunsubila mupaka liyi, napapo napela ivyika ivyinji nkani pakasi papabo?

¹² Nkwiza pakubaghogha ni chiwaya nukubafyula ichilingo chabo, loli nkwiza pakukupela awe pakuba luko ulwamaka nkani ukubachila.”

¹³ U Mozesi akamwamula u Mwene akati, “Po nkimba aba Ijiputi bakwiza pakunena choni? Bo bivwa zinizi, pakuti bazimenye ukuti wewe ukabefyamo abantu banaba mu Ijiputi na maka ghako amakulu.

¹⁴ Bakwiza pakubapangila abantu aba muchisu chinichi. Abene bivuye kale ukuti awe we Mwene uli pakasi pabantu banaba, sona nukuti awe we Mwene ukaboneka pamaso na pamaso, sona ibingu lyako likwikala papabo. Bazimenye ukuti awe ukabalongolela ni mpanda iya libingu pamusanya, sona pabusiku ukabalongolela ni mpanda iya moto.

¹⁵ Nanti ukubaghogha abantu aba akabalilo koka, po abantu aba inko izinji babo bivwa imbili yako bakwiza pakunena ukuti,

¹⁶ ‘U Mwene akabaghoghela munkolongo pachifukwa ichakuti akapotwa pakubinjizya muchisu chicho akabalayizya pakubapa pakuba chabo ni chabo.’

¹⁷ “Wee Mwene, losi ulu nkukulaba ukuti ulanjizye amaka ghako amakulu ukuyana namumo ukanenela ukuti,

¹⁸ ‘U Mwene atakukalala lubilolubilo, walughano lulo lutakumala, sona akubahobokela abantu abambibi na bakusambuka. Loli atakubaleka bulo, akubafunda abana pachifukwa icha mbibi izya bapapi babo mupaka ninkulilo iyabutatu ni yafolo.’

¹⁹ Nkukulaba ukuti hobokela imbibi izya bantu banaba ukuyana nu lughano lwako ulukulu nkani, sona ukuyana namumo wabahobokeye ukwandila pakabalilo kako bakepelamo mu Ijiputi mupaka ilelo.”

²⁰ U Mwene akamula akati, “Nabahobokela ukuyana namumo wandabila.

²¹ Loli momumo ukuti ane ne mumi, sona ichisu chosi chizuye nu buchindamu ubwa Mwene,

²² po nkulapa ukuti atalipo nayumo umuntu uwa bantu banaba akwiza pakwinjilamo muchisu chila. Abantu banaba bakabwennya ubuchindamu bwane ni viswigho vyane, vivyo nkabomba mu Ijiputi, sona na munkolongo, loli pope bulo bakanjela akabalilo akinji bulo, nukukana pakughivwila amazyu ghane.

²³ Atalipo nayumo umuntu yuyo akwiza pakuchennya ichisu chicho nkalayizya ni chilapo ukuti nkwiza pakubapa abanyenya babo. Atalipo nayumo umuntu yuyo akankana akwiza pakuchennya.

²⁴ Loli pakuti umubombi wane u Kalebu ali nu moyo uwakulekana na bantu abanji, sona nukuti akunyivwila nu moyo wache ghosi, ane nkwiza pakumwinjizya muchisu chicho akabukako pakuchitendela, sona abaluko lwache bakwiza pakuchipyana.

²⁵ Pakuti aba Amaleki naba Kenani bakwikala mwikombe, po indabi munyokele nukunyamuka ubulendo ubwakubuka kunkolongo pakwendela izila iya ku Nyanja Inchesamu.”

U Mwene akubafunda aba Izilayeli pachifukwa ichakwilumbusya

²⁶ U Mwene akamulalusya u Mozesi nu Aloni akati,

²⁷ “Nkimba abantu ababibi banaba bakwiza pakwilumbusya mupaka liyi? Nivwa sona nalita na milumbusyo agha bantu banaba.”

²⁸ Po ubabuzye uti u Mwene akuti, “Naloli nivwa vivyo mwanena, sona vyo vivyo nkwiza pakubabombela.

²⁹ Imivimba yinyu yikwiza pakunyampana munkolongo muno. Umuntu wesi uwamaka 20 pamo ukuchilapo yuyo akabelengiwa, sona yuyo akilumbusya nane

³⁰ atakwiza pakwinjilamo muchisu chicho nkalapa pakubapa pakuba chinyu ni chinyu, loli u Kalebu mwene umwana uwa Yefune nu Yoshwa umwana uwa Nuni.

³¹ Abana binyu babo mukatinji bakwiza pakulemiwa pakuba bazya, nkwiza pakubinjizya muchisu chila, sona bakwiza pakwilagha muchisu chicho mukachikana.

³² Loli amwe, imivimba yinyu yikwiza pakunyampana munkolongo muno.

³³ Abana binyu bakwiza pakuba badimi munkolongo amaka 40, sona bakwiza pakuyimba pachifukwa ichakusita ukusubila kwinyu mupaka mwebosi mumalile munkolongo.

³⁴ Mukwiza pakufundiwa amaka 40 pachifukwa icha mbibi zyinyu, kokuti umwaka ghoka ghukwimilila isiku lyoka ilya masiku ghagho mukabuka pakutendela ichisu chila. Po mukwiza pakubumanya namumo bubeleye ububibi ubwakuti ane imbasambukile.

³⁵ Ane ne Mwene nanena. Naloli nkwiza pakubabombela abantu bosi ababibi, babo bakivwana pakunsambukila. Bakwiza pakumalila munkolongo muno.”

³⁶ Po abantu babo u Mozesi akabatuma pakutendela ichisu, bakabwelako nukwanda pakubapangila abantu ipangwi ibibi ilya chisu chila umwakuti abantu bosi bakilumbusya nu Mwene.

³⁷ Po u Mwene akabaghogha abantu bosi bala ni chiwaya.

³⁸ Loli pakasi pabantu babo bakabuka pakutendela ichisu chila, u Yoshwa mwene umwana uwa Nuni nu Kalebu umwana uwa Yefune, bo babo bakapona.

Aba Izilayeli bakuyezya pakuchifyula ichisu

³⁹ Bo u Mozesi abapangila aba Izilayeli amazyu ghosi ghanagha, abantu bala bakalila nkani.

⁴⁰ Indabi yache, pandabindabi nkani, bakakwela ichisu icha mumaghamba nukuti, “Aswe twananga, loli twiyanizye pakukwela kuchisu chicho u Mwene akatulayizya.”

⁴¹ Loli u Mozesi akati, “Nkimba choni chicho mukwendelela pakunanga ilamulo ilya Mwene? Pakuti amwe mukwiza pakupotwa.

⁴² Mutakabukayeko kuchisu chila, pakuti u Mwene ate namwe, sona abalwani binyu bakwiza pakubapota,

⁴³ pakuti aba Amaleki naba Kenani bali kuntazi kukwinyu. Pachifukwa ichakuti mwamukana u Mwene, wepe akwiza pakubakana, sona mukwiza pakufwila kubwite.”

⁴⁴ Loli pope bulo bakakwela kuchisu icha mumaghamba napapo Ibokosi ilya Lufingo ilya Mwene likaba lichili litepitemo muvisakasa mula, sona wepe nu Mozesi akaba achili atepitemo muvisakasa mula.

⁴⁵ Po aba Amaleki naba Kenani, babo bakikalagha muchisu icha mumaghamba bakika pakubapota, nukubachimbizizya ku Holima.