Ukubelengiwa 13 - IBAYIBOLO 2024

Nizya batendezi

¹ U Mwene akamubuzya u Mozesi akati,

² “Usale umulongozi weka uwa munyumba yosi iya inko 12 izya ba Izilayeli nukubatuma pakutendela ichisu icha Kenani, chicho nkubapa aba Izilayeli.”

³ Po u Mozesi akabatuma bo bali munkolongo iya Palani, ukuyana namumo u Mwene akalamulila. Bosi banaba bakaba balongozi aba inko izya ba Izilayeli.

⁴ Agha gho matabwa ghabo ukuyana nuluko lwabo: U Shamuwa umwana uwa Zakuli uwa luko ulwa Lubeni

⁵ nu Shafati umwana uwa Holi uwa luko ulwa Simiyoni

⁶ nu Kalebu umwana uwa Yefune uwa luko ulwa Yuda

⁷ nu Igali umwana uwa Yosefu uwa luko ulwa Isakala

⁸ nu Hosheya umwana uwa Nuni uwa luko ulwa Efulayimu

⁹ nu Paliti umwana uwa Lafu uwa luko ulwa Benjamini

¹⁰ nu Gadiyeli umwana uwa Sodi uwa luko ulwa Zebuloni

¹¹ nu Gadi umwana uwa Susi uwa luko ulwa Manase (uwa luko ulwa Yosefu)

¹² nu Amiyeli umwana uwa Gemali uwa luko ulwa Dani

¹³ nu Shetuli umwana uwa Mikayeli uwa luko ulwa Asheli

¹⁴ nu Nabi umwana uwa Vofusi uwa luko ulwa Nafutali

¹⁵ nu Guweli umwana uwa Maki uwa luko ulwa Gadi.

¹⁶ Banaba bakaba bantu babo u Mozesi akabatuma pakutendela ichisu. U Mozesi akamwita u Hosheya umwana uwa Nuni ukuti we Yoshwa.

¹⁷ Bo u Mozesi akubatuma abantu bala pakutendela ichisu icha Kenani akabalamula akati, “Bukagha ku Negebu, sona nukukwela ichisu icha maghamba.

¹⁸ Bukagha mwennye namumo ichisu chila chibeleye sona mwennye nanti abantu aba mulamula bamaka pamo badedebazu pamo binji pamo banandi.

¹⁹ Bukagha mwennye nanti ichisu chabo chiza pamo chibibi, pamo nanti utwaya twabo utukulu nkani tuli nu lupaso pamo tute na malinga.

²⁰ Bukagha mwennye nanti ichisu chabo chamboto pamo awe, sona nanti ichisu chabo chili na makwi pamo, awe. Mulwisye nkani ukuti mwize ni vikomwa vimo ivya muchisu chilachila.” (Kanaka kakaba kabalilo akakuti amampesya ghakandagha pakutona.)

²¹ Po abantu bala bakabuka pakutendela ichisu ukwandila munkolongo iya Zini mupaka ku Lehobu kupipi nu mulyango uwa kaya aka Lebo Hamati.

²² Bakinjilila izila iya kukaya aka Negebu nukufika mukaya aka Hebuloni kako kakaba kaya aka ba Ahimani naba Sheshayi sona naba Talimayi babo bakaba baluko ulwa Anaki. (Akaya aka Hebuloni kakazengiwa amaka seveni, bo akaya aka Zowani aka mu Ijiputi kachili katazengiwe.)

²³ Bo bafika mwikombe ilya Eshikolo, bakapyolako ulusamba lulo lukaba nulukose ulwakung'wama na mampesya, umwakuti abantu babili bakatembana. Bakasenda sona amanyele na makuyu.

²⁴ Ubuzilo bula bakabwita ukuti ikombe ilya Eshikolo pachifukwa icha lukose ulwa mampesya lulo aba Izilayeli bakatema kulakula.

²⁵ Bo ghachilapo amasiku 40, abantu bala bakabwelako pakutendela ichisu chila.

²⁶ Po bakanyokela kwa Mozesi nu Aloni na ku chilundilo chosi mu Kadeshi munkolongo iya Palani pakubalanjizya ivikomwa ivya muchisu chila.

²⁷ Bakamupangila u Mozesi bakati, “Tukafikako kuchisu chicho ukatutumako, naloli ichisu chila cha mboto, sona ivikomwa vyache vyo ivi.

²⁸ Loli abantu aba muchisu chila bamaka, utwaya twabo tukulu nkani, sona tuli nu lupaso na malinga, ukonjelezyapo tukabennya abaluko ulwa Anaki kulakula.

²⁹ Aba Amaleki bakwikala muchisu icha kuntende, sona aba Hiti naba Yebusi naba Amoli bakwikala muchisu icha mumaghamba. Aba Kenani bakwikala kupipi ni nyanja, sona na mulubazu ulwa lusoko ulwa Yolodani.”

³⁰ Loli u Kalebu akabapumizya abantu pamaso pa Mozesi nukuti, “Twende tubukaye losi ulu nukuchifyula ichisu chila, pakuti tungachifyula.”

³¹ Loli abantu babo bakabuka nawe poka pakutendela ichisu chila bakati, “Awe, tutangalwa nabo abantu bala, pakuti bamaka ukutuchila aswe.”

³² Polelo abantu bala bakasasya ipangwi ilyabumyasi pakasi paba Izilayeli nizya chisu chicho bakatendela. Bakati, “Ichisu chicho tukatendela chikubamila abantu babo bakwikalamo. Abantu bosi babo tukabennya kulakula batalibatali bene.

³³ Abantu babo tukabennya muchisu chila bakaba batalibatali bene abaluko ulwa Anaki. Aswe tukabonekagha ngati zyo mpazi, sona bope bakatwennyanga ngati zyo mpazi.”