Ukubelengiwa 12 - IBAYIBOLO 2024

U Miliyamu akufundiwa

¹ U Miliyamu nu Aloni bakanda pakumususya u Mozesi pachifukwa icha muchi wache umu Etiyopiya.

² Bakalalusya bakati, “Nkimba zyanaloli ukuti u Mwene akunenela mwa Mozesi mwene? Nkimba atanenitepo ukwendela mumwitu?” Po u Mwene akivwa zinizi.

³ Loli u Mozesi akaba muntu uwakwiyisya nkani ukubachila abantu bosi muchisu ichapasi.

⁴ Panapo na panapo u Mwene akamubuzya u Mozesi nu Aloni nu Miliyamu akati, “Mwebosi batatu mwize kuno ku Chisakasa icha Mwene.” Po bosi batatu bala bakabuka.

⁵ U Mwene akikila mwibingu nukwimilila pamulyango uwa Chisakasa nukumwitizya u Aloni nu Miliyamu, po bosi babili bala bakiza.

⁶ U Mwene akati, “Ivwa kuno! Nanti umulaghuzi uwa Mwene ali pakasi papinyu, ane nkwilanjizya nemwene kukwache muvisetuka, sona nkunena nawe muvilota.

⁷ Loli te momumo zibeleye nu mubombi wane umusubiliwa u Mozesi, yuyo namubika pakuba mulongozi uwa bantu bane aba Izilayeli.

⁸ Ane nkunena nawe pamaso na pamaso. Nkunena nawe umwakwivwika sona ntakunena nawe muvyili, awe. Akwennya akabele aka Mwene, po nkimba choni chicho mukamususya umubombi wane u Mozesi?”

⁹ U Mwene akabakalalila nukwepapo.

¹⁰ Bo ibingu lyakwela mumwanya ukwepapo pa Chisakasa pala, panapo na panapo u Miliyamu akaba na mambombo, sona umubili wache ghukaba bulo swee ngati we kabefu. Bo u Aloni aghalabuka akamwennya u Miliyamu akuti akaba na mambombo.

¹¹ Po akamubuzya u Mozesi akati, “Wee mwene wane, nalamba, utakatufunde pachifukwa icha mbibi yiyo twabombite mubupunganu.

¹² Utakawitikizye umubili uwa Miliyamu pakubola ngati po mwana yuyo apapiwe umufwe.”

¹³ Po u Mozesi akamulambilizya u Mwene akati, “Wee Chala, nalamba mupozye!.”

¹⁴ U Mwene akamwamula u Mozesi akati, “Nanti uwise akamufwinila amati kumaso, nkimba u Miliyamu ngali chitamukozizye isoni amasiku seveni? Mumwefyemo nukumwighalila kuzi ukwa visakasa amasiku seveni, po pisinda pache angamwinjizya sona.”

¹⁵ Po bakamwefyamo u Miliyamu nukumwighalila kuzi ukwa visakasa amasiku seveni, po abantu batakanyamuka ubulendo bwabo mupaka papo u Miliyamu akanyokela sona muvisakasa.

¹⁶ Pisinda pache abantu bala bakanyamuka ubulendo bwabo ukwepapo pa Hazeloti, nukuzenga ivisakasa vyabo munkolongo iya Palani.