Ukubelengiwa 11 - IBAYIBOLO 2024

Nizya moto uwa Mwene

¹ Isiku limo abantu bakanda pakwilumbusya kwa Mwene nizya ntamyo zyabo. Bo u Mwene abivwa, akakalala nukubawisizya umoto abantu bala, po ghukanangannya ulubazu loka ulwa visakasa vyabo.

² Abantu bakamulilila u Mozesi, po u Mozesi akiputa kwa Mwene, sona umoto ghula ghukazima.

³ Po ubuzilo bula akabwita ukuti Tabela, pachifukwa ichakuti u Mwene akawisya umoto pakasi papabo.

U Mozesi akubasala abalongozi 70

⁴ Pakabalilo kalakala abayeni bamo babo bakaba pakasi paba Izilayeli bakanda pakuba nikwilu nkani, umwakuti aba Izilayeli bakanda pakwilumbusya ukuti, “Nkimba wewenu angatupa inyama mwee?

⁵ Tukuzisamba iswi izyapabulo zizyo tukalyanga mu Ijiputi ni vitugho ni ving'wela mizi na bakanyezi sona nu twakunonezya ivyakulya utwakulekanalekana.

⁶ Loli losi ulu tutakuchinyonywa sona ichakulya, sona chitalipo nachimochimo ichintu ichakuti tungalya, loli umana mwene.”

⁷ Umana akayana bulo nu tumbeyu utwa mapemba, sona akabonekele kache kakayana nu bulimbo.

⁸ Abantu bakasebagha umana yula nukumusya palwala pamo pakupula mwituli pakuba busu. Bakamupiyagha musonta pakuba vibama ivipapate, sona akanonagha ngati cho chibama ichipiye na mafuta agha misyunguti.

⁹ Umana yula akawilagha poka ni nganda pavisakasa pabusiku.

¹⁰ U Mozesi akabivwa abantu bakulila munyumba zyabo, bo bikaye pamilyango iya visakasa vyabo. U Mwene akakalala nkani, po wepe nu Mozesi chikamuvulazya mumoyo.

¹¹ U Mozesi akamulalusya u Mwene akati, “Nkimba choni chicho wampelela intamyo bunubu ne mubombi wako? Nkimba nakubombela chibibi choni ukuti unyamulisye ukatundu uwa bantu bosi banaba?

¹² Nkimba nene nkamela ulwanda abantu bosi banaba? Nkimba nene nkabapapa umwakuti umbuzye ukuti imbafukatile ngati muleli, yuyo akumufukatila umwana mupaka kuchisu chicho ukabalayizya abanyenya babo?

¹³ Nkimba njaghe kwiyi inyama iyakuti imbape abantu bosi banaba? Pakuti bakundilila ukuti, ‘Tupe inyama ukuti tulye!’

¹⁴ Ane nemwene intangakwanisya pakubasungilila abantu bosi banaba, pakuti ukatundu uyu mung'wamu nkani.

¹⁵ Nanti umu momumo ukwiza pakumbombela, po nalamba ungoghe bulo losi ulu, ukuti ntakendelele pakukomana nintamyo zinizi.”

¹⁶ Po u Mwene akamubuzya u Mozesi akati, “Ubabungannye abanavuli 70 pakasi paba Izilayeli, babo ubamenye ukuti bo balongozi, sona bo bakapitawa aba bantu. Wize nabo ku Chisakasa icha Mwene, ukuti bimilile poka nawe palapala.

¹⁷ Ane nkwiza pakwika nukunena nawe palapala, sona nkwiza pakusendako u Muzimu wane yuyo ali mumwako nukubapako. Bakwiza pakukwavwa pakunyamula ukatundu uwa bantu, umwakuti utakamunyamule wemwene.

¹⁸ “Ubabuzye abantu uti, ‘Mwiswefye mwebene pakuti indabi mukwiza pakulya inyama. U Mwene akabivwa bo mukulila ukuti, “Nkimba wewenu angatupa inyama mwee?” Naloli ivintu vikatwendelaghapo akiza mu Ijiputi. Ilelo u Mwene akwiza pakubapa inyama, po mukwiza pakuyilya.

¹⁹ Mutakwiza pakuyilya isiku lyoka bulo pamo amasiku mabili pamo amasiku fayivi pamo amasiku teni pamo amasiku 20, awe.

²⁰ Loli mukwiza pakuyilya umwezi ghosi mupaka yifumile mumpuno zyinyu, sona mupaka muyitapike, pakuti amwe mwamukana u Mwene yuyo ali pakasi papinyu. Amwe mwilumbusizye pantazi papache ukuti, “Nkimba choni chicho tukepamo mu Ijiputi?” ’ ”

²¹ Loli u Mozesi akati, “Abanavuli bene babo indi pakubalongozya balipo 600,000, loli awe ukuti, ‘Nkwiza pakubapa inyama iyakubakwana umwezi ghosi.’

²² Napapo tungaghogha ing'ombe pamo ing'ozi zyitu zyosi nkimba zingabakwana? Napapo tungaloba iswi zyosi izya munyanja, nkimba zingabakwana?”

²³ U Mwene akamwamula u Mozesi akati, “Nkimba amaka ghane ghali ni mpaka? Losi ulu ukwiza pakwennya nanti amazyu ghane ghakwiza pakukwanilisiwa pamo awe.”

²⁴ Po u Mozesi akepamo nukubabuzya abantu amazyu agha Mwene. Akababungannya abalongozi 70 aba ba Izilayeli nukubimika umwakuzyungulila Ichisakasa icha Mwene.

²⁵ Po u Mwene akika mwibingu nukunena nu Mozesi. Akasendapo u Muzimu uwa Mozesi nukubapako abalongozi 70 bala. Bo abalongozi bala bapokela u Muzimu ghula, bakanda pakulaghula, loli batakendelela.

²⁶ Loli abalongozi babili, u Elidadi nu Medadi bakasyalikila muvisakasa mula. Bo bapokela u Muzimu bope bakanda pakulaghula muchisakasa mula.

²⁷ Po umulumendo yumo akachimbila nukumubuzya u Mozesi ukuti, “U Elidadi nu Medadi bali pakulaghula muvisakasa.”

²⁸ U Yoshwa umwana uwa Nuni yuyo akaba mwavwilizi uwa Mozesi ukwandila ko bwana bwache akamubuzya u Mozesi akati, “Wee mwene wane, ubakanizye.”

²⁹ Loli u Mozesi akamula akati, “Nkimba uli na kabini nane? Nalondagha ukuti abantu bosi aba Mwene ngali babanga balaghuzi, sona u Mwene ngali abapanga u Muzimu wache.”

³⁰ Po u Mozesi poka na balongozi aba ba Izilayeli bala bakanyokela kuvisakasa kula.

U Mwene awisya abazungwa

³¹ Po u Mwene akanyamusya impepo iya kunyanja, yiyo yikiza na bazungwa nukubawisya posi na posi muvisakasa mupaka ubulendo ubwa isiku lyoka kunkuto zyosi, sona abazungwa bala bakalundinkana imita lyoka ukufuma pasi ukukwela mumwanya.

³² Po abantu bakanda pakulema abazungwa bala umusanya ghosi nu busiku bosi mupaka indabi yache. Umuntu wesi akabungannya abazungwa abakukwana amakilogalamu 1,000 nukubanika umwakuzyungulila ivisakasa.

³³ Bo abantu bala bakutafuna inyama yila, sona bo bachili batamilite, u Mwene akabakalalila, po akabanangannya ni chiwaya ichakoghofya nkani.

³⁴ Po ubuzilo bula bakabwita ukuti Kibuloti Hatava, kokuti amapumpa agha bantu abankwilu pachifukwa ichakuti bakabasyilako abantu abankwilu.

³⁵ Abantu bala bakasamila ku Hazeloti nukuzenga ivisakasa vyabo kulakula.