Ukubelengiwa 10 - IBAYIBOLO 2024

Nizya mapati agha siliva

¹ U Mwene akamubuzya u Mozesi akati,

² “Usyane amapati mabili agha siliva, ughalizyanje amapati ghanagha pakubitizya abantu kunkomano, sona pakubapa ichimanyilo abantu ichakuti banyamuke ubulendo bwabo.

³ Nanti amapati ghosi mabili ghalila, abantu bosi babunganaye pantazi papako pamulyango uwa Chisakasa icha Mwene.

⁴ Loli nanti ipati lyoka bulo lyalila, abalongozi bene aba inko izya ba Izilayeli babunganaye pantazi papako.

⁵ Nanti ipati ilyakubasoka abantu lyalila, babo bazengite ivisakasa vyabo kubufumilo bwizuba banyamukaye ubulendo bwabo.

⁶ Nanti ipati ilyakubasoka abantu lyalila sona, babo bazengite ivisakasa vyabo kuntende banyamukaye ubulendo bwabo. Ukulila ukwa ipati kubanje chimanyilo ichakubasoka abantu ukuti banyamukaye ubulendo bwabo.

⁷ Loli nanti ukubitizya abantu bosi kulukomano, akalizizye aka ipati kalekanite na kalizizye aka ipati ilyakubasoka abantu.

⁸ “Abana aba Aloni, babo baputi bo babo balizyanje amapati. Ululaghilo lunulu lubanje lwa bwila na bwila mupaka inkulilo zyosi izya muntazi.

⁹ Bo mukulwa ubwite na balwani binyu muchisu chinyu, babo bakubayivya, mulizyanje amapati aghakubasoka abantu, po u Mwene u Chala winyu akwiza pakubapoka munyobe izya balwani binyu.

¹⁰ Mulizyanje amapati bo muli nu lusekelo ulwa Kupanta ukwa Mwezi nu lusekelo ulwa viputo, sona bo mukubika ivyakwiyipa ivyakocha, sona ni vyakwiyipa ivyabupoka. Amapati ghanagha ghakwiza pakubavwa pakumukumbuka u Chala winyu. Ane ne Mwene u Chala winyu.”

Aba Izilayeli bakwepapo pighamba ilya Sinayi

¹¹ Pisiku ilya 20 ilya mwezi uwabubili uwa mwaka uwabubili ibingu likakwela ukwepapo pamwanya pa Chisakasa icha Mwene.

¹² Po aba Izilayeli bakanyamuka ubulendo bwabo ukuyana nu tubukatila twabo ukwepamo munkolongo iya Sinayi mupaka ibingu lila likima munkolongo iya Palani.

¹³ Aka kakaba kakwanda ukuti aba Izilayeli banyamuke ubulendo bwabo ukuyana namumo u Mwene akabalamulila ukwendela mwa Mozesi.

¹⁴ Abantu babo bakaba bakwanda pakunyamuka ubulendo bwabo bakaba aba ndembela iya luko ulwa Yuda ukuyana nu tubukatila twabo. Po umulongozi uwa kabukatila kabo akaba we Nashoni umwana uwa Aminadabu.

¹⁵ Umulongozi uwa luko ulwa Isakala akaba we Netaneli umwana uwa Zuwala.

¹⁶ Umulongozi uwa luko ulwa Zebuloni akaba we Eliyabu umwana uwa Heloni.

¹⁷ Po bakapankula Ichisakasa icha Mwene sona abamunyumba iya Gelishoni, na bamunyumba iya Melali bo babo bakachinyamula Ichisakasa icha Mwene, bakanyamuka ubulendo bwabo.

¹⁸ Abantu babo bakaba babubili pakunyamuka ubulendo bwabo bakaba aba ndembela iya Lubeni ukuyana nu tubukatila twabo. Po umulongozi uwa kabukatila kabo akaba we Elizuli umwana uwa Shedewuli.

¹⁹ Umulongozi uwa luko ulwa Simiyoni akaba we Shelumiyeli umwana uwa Zulishadayi.

²⁰ Umulongozi uwa luko ulwa Gadi akaba we Eliyasafu umwana uwa Deweli.

²¹ Po abamunyumba iya Kohati bakanyamula ivintu vyosi ivizelu nukunyamuka ubulendo bwabo. Ichisakasa icha Mwene chila chikaba chakuti chizengiwe, bo abene bachili batafikite.

²² Abantu babo bakaba babutatu pakunyamuka ubulendo bwabo bakaba aba ndembela iya Efulayimu ukuyana nu tubukatila twabo. Po umulongozi uwa kabukatila kabo akaba we Elishama umwana uwa Amihudi.

²³ Umulongozi uwa luko ulwa Manase akaba we Gamaliyeli umwana uwa Pedazuli.

²⁴ Umulongozi uwa luko ulwa Benjamini akaba we Abidani umwana uwa Gidiyoni.

²⁵ Abantu babo bakaba babumalilo pakunyamuka ubulendo bwabo bakaba aba ndembela iya Dani ukuyana nu tubukatila twabo. Po umulongozi uwa kabukatila kabo akaba we Ahiyezeli umwana uwa Amishadayi.

²⁶ Umulongozi uwa luko ulwa Asheli akaba we Pagiyeli umwana uwa Okolani.

²⁷ Umulongozi uwa luko ulwa Nafutali akaba we Ahila umwana uwa Enani.

²⁸ Umu momumo aba Izilayeli bakanyamukila ubulendo bwabo ukuyana nu tubukatila twabo.

²⁹ U Mozesi akamubuzya u Hobabu umwana uwa Leweli umu Midiyani, yuyo akaba wisevyala uwa Mozesi akati, “Tukubuka kubuzilo bubo u Mwene akati, ‘Nkwiza pakubapabo.’ Twende tubukaye poka, sona tukwiza pakwikala nawe akiza bulo, pakuti u Mwene abalayizya aba Izilayeli ivintu ivyiza.”

³⁰ Loli u Hobabu akamula akati, “Awe, ntakubukako, loli nkunyokela kuchisu chane, kuko kuli abakamu bane.”

³¹ Loli u Mozesi akati, “Nalamba, twende tubukaye poka. Awe ungatwavwako pakuti ubumenye ubuzilo bubo tukwiza pakuzengapo ivisakasa vyitu munkolongo, po ungatulongozya.

³² Nanti ukubuka poka naswe tukwiza pakugabana ivintu ivyiza vyosi vivyo u Mwene akutupa.”

Abantu bakunyamuka ubulendo bwabo

³³ Po bakanyamuka ubulendo bwabo pighamba ilya Mwene nukwenda amasiku matatu. Ibokosi ilya Lufingo ilya Mwene likalongolela muntazi amasiku matatu ghalaghala pakubalondela ubuzilo ubwakutuzyapo.

³⁴ Ibingu ilya Mwene likaba papabo pamusanya, bo bakunyamuka ubulendo bwabo ukwepapo pavisakasa.

³⁵ Akabalilo kosi kako Ibokosi ilya Lufingo likanyamukagha, u Mozesi akatinji, “Wee Mwene, nyamuka, nukubanyampannya abalwani bako! Abantu bosi babo bakubengite bachimbilaye pamaso papako.”

³⁶ Po akabalilo kosi kako ibingu likwima, u Mozesi akatinji, “Wee Mwene nyokela ku bantu bako aba Izilayeli amasabuzani na masabuzani.”