Ukubelengiwa 1 - IBAYIBOLO 2024

Ukubelengiwa ukwakwanda ukwa ba Izilayeli

¹ U Mwene akamubuzya Mozesi munkolongo iya Sinayi mu Chisakasa icha Mwene, pisiku ilyakwanda ilya mwezi uwabubili mumwaka uwabubili, bo aba Izilayeli bepamo muchisu icha Ijiputi akati,

² “Ubabelenge aba Izilayeli bosi ukuyana ni nyumba zyabo, sona nuluko ulwa banyenya babo. Usimbe amatabwa agha banavuli bosi.

³ Awe nu Aloni mubabelenge abanavuli bosi mu Izilayeli abamaka 20 pamo ukuchilapo, ukuyana na kabukatila kabo, babo bangalwa ubwite.

⁴ Musale umuntu weka mu luko losi, yuyo mulongozi uwa nyumba yache, ukuti abavwe pambombo yinyu.

⁵ Agha gho matabwa agha bantu babo babaghiye pakubavwa: U Elizuli umwana uwa Shedewuli uwa luko ulwa Lubeni,

⁶ nu Shelumiyeli umwana uwa Zulishadayi uwa luko ulwa Simiyoni

⁷ nu Nashoni umwana uwa Aminadabu uwa luko ulwa Yuda,

⁸ nu Netaneli umwana uwa Zuwala uwa luko ulwa Isakala,

⁹ nu Eliyabu umwana uwa Heloni, uwa luko ulwa Zebuloni.

¹⁰ Mu bana aba Yosefu usalemo: U Elishama umwana uwa Amihudi uwa luko ulwa Efulayimu nu Gamaliyeli umwana uwa Pedazuli uwa luko ulwa Manase,

¹¹ nu Abidani umwana uwa Gidiyoni uwa luko ulwa Benjamini,

¹² nu Ahiyezeli umwana uwa Amishadayi uwa luko ulwa Dani,

¹³ nu Pagiyeli umwana uwa Okolani uwa luko ulwa Asheli,

¹⁴ nu Eliyasafu umwana uwa Deweli, uwa luko ulwa Gadi,

¹⁵ nu Ahila umwana uwa Enani uwa luko ulwa Nafutali.”

¹⁶ Aba bo banavuli babo bakasaliwa pakasi pachilundilo chosi, babo bakaba balongozi abamunyumba zyabo, sona na basongo aba inko izya Izilayeli.

¹⁷ U Mozesi nu Aloni akabasenda bantu, babo amatabwa ghabo ghakatambuliwa,

¹⁸ bakababungannya poka abantu bosi pisiku ilyakwanda ilya mwezi uwabubili. Aba Izilayeli bakabelengiwa ukuyana na matabwa agha banyenya babo, sona ni nyumba zyabo. Po abanavuli bosi abamaka 20 pamo ukuchilapo bakabelengiwa,

¹⁹ ukuyana namumo u Mwene akamulamulila u Mozesi. Umu momumo bakababelengela abantu bala munkolongo iya Sinayi.

²⁰ Mu baluko ulwa Lubeni umwana ukatote uwa Yakobo, mukasimbiwa abanavuli bosi abamaka 20 pamo ukuchilapo, babo bangalwa ubwite, ukuyana ni nyumba zyabo, sona na matabwa agha banyenya babo.

²¹ Bo babelenga abantu bosi abaluko ulwa Lubeni bakagha ukuti bakabapo 46,500.

²² Mu baluko ulwa Simiyoni mukasimbiwa abanavuli bosi abamaka 20 pamo ukuchilapo, babo bangalwa ubwite, ukuyana ni nyumba zyabo, sona na matabwa agha banyenya babo.

²³ Bo bababelenga abaluko ulwa Simiyoni, bakagha ukuti bakabapo 59,300.

²⁴ Mu baluko ulwa Gadi mukasimbiwa abanavuli bosi abamaka 20 pamo ukuchilapo, babo bangalwa ubwite, ukuyana ni nyumba zyabo, sona na matabwa agha banyenya babo.

²⁵ Bo bababelenga abaluko ulwa Gadi, bakagha ukuti bakabapo 45,650.

²⁶ Mu baluko ulwa Yuda mukasimbiwa abanavuli bosi abamaka 20 pamo ukuchilapo, babo bangalwa ubwite, ukuyana ni nyumba zyabo, sona na matabwa agha banyenya babo.

²⁷ Bo bababelenga abaluko ulwa Yuda bosi, bakagha ukuti bakabapo 74,600.

²⁸ Mu baluko ulwa Isakala mukasimbiwa abanavuli bosi abamaka 20 pamo ukuchilapo, babo bangalwa ubwite, ukuyana ni nyumba zyabo, sona na matabwa agha banyenya babo.

²⁹ Bo bababelenga abaluko ulwa Isakala bosi, bakagha ukuti bakabapo 54,400.

³⁰ Mu baluko ulwa Zebuloni mukasimbiwa abanavuli bosi abamaka 20 pamo ukuchilapo, babo bangalwa ubwite, ukuyana ni nyumba zyabo, sona na matabwa agha banyenya babo.

³¹ Bo bababelenga abaluko ulwa Zebuloni bosi, bakagha ukuti bakabapo 57,400.

³² Mu baluko ulwa Yosefu, kokuti aba Efulayimu, mukasimbiwa abanavuli bosi abamaka 20 pamo ukuchilapo, babo bangalwa ubwite, ukuyana ni nyumba zyabo, sona na matabwa agha banyenya babo.

³³ Bo bababelenga abaluko ulwa Efulayimu bosi, bakagha ukuti bakabapo 40,500.

³⁴ Mu baluko ulwa Manase mukasimbiwa abanavuli bosi abamaka 20 pamo ukuchilapo, babo bangalwa ubwite, ukuyana ni nyumba zyabo, sona na matabwa agha banyenya babo.

³⁵ Bo babelenga abaluko ulwa Manase bosi, bakagha ukuti bakabapo 32,200.

³⁶ Mu baluko ulwa Benjamini mukasimbiwa abanavuli bosi abamaka 20 pamo ukuchilapo, babo bangalwa ubwite, ukuyana ni nyumba zyabo, sona na matabwa agha banyenya babo.

³⁷ Bo bababelenga abaluko ulwa Benjamini bosi, bakagha ukuti bakabapo 35,400.

³⁸ Mu baluko ulwa Dani mukasimbiwa abanavuli bosi abamaka 20 pamo ukuchilapo, babo bangalwa ubwite, ukuyana ni nyumba zyabo, sona na matabwa agha banyenya babo.

³⁹ Bo bababelenga abaluko ulwa Dani bosi, bakagha ukuti bakabapo 62,700.

⁴⁰ Mu baluko ulwa Asheli mukasimbiwa abanavuli bosi abamaka 20 pamo ukuchilapo, babo bangalwa ubwite, ukuyana ni nyumba zyabo, sona na matabwa agha banyenya babo.

⁴¹ Bo bababelenga abaluko ulwa Asheli bosi bakagha ukuti bakabapo 41,500.

⁴² Mu baluko ulwa Nafutali mukasimbiwa abanavuli bosi abamaka 20 pamo ukuchilapo, babo bangalwa ubwite, ukuyana ni nyumba zyabo, sona na matabwa agha banyenya babo.

⁴³ Bo bababelenga abaluko ulwa Nafutali bosi, bakagha ukuti bakabapo 53,400.

⁴⁴ Banaba bakaba banavuli bosi babo u Mozesi nu Aloni bakababelenga umwakwavwana na balongozi 12 aba Izilayeli, babo bakimilila inyumba zyabo.

⁴⁵ Abanavuli bosi aba Izilayeli abamaka 20 pamo ukuchilapo, babo bangalwa ubwite bakabelengiwa ukuyana ni nyumba zyabo.

⁴⁶ Bo babelenga abantu bala bakagha ukuti ubwinji bwabo bosi poka bukaba 603,550.

⁴⁷ Loli abaluko ulwa Levi bene batakabelengiwa poka na bantu abanji,

⁴⁸ pakuti u Mwene akamubuzya u Mozesi akati,

⁴⁹ “Utakababelenge abantu abaluko ulwa Levi pamo ukubabelengela poka naba Izilayeli abanji.

⁵⁰ Loli ubasale aba Levi ukuti babanje bakuchisungilila Ichisakasa icha Mwene ni vibombelo vyache vyosi vivyo vili mumo. Bachinyamulaye Ichisakasa icha Mwene, poka ni vibombelo vyosi, bachisungililaye akiza, sona bazengaye ivisakasa vyabo umwakuchizyungulila.

⁵¹ Akabalilo kosi kako bakuchisamya Ichisakasa icha Mwene chila aba Levi bo babo babaghiye pakuchipankula, sona nanti bakulonda pakuchizenga sona bo babo babaghiye pakuchizenga. Loli umuntu bulo yuyo akupalamila kupipi, aghoghiwanje.”

⁵² Aba Izilayeli bazengaye ivisakasa vyabo mutubukatila, sona umuntu wesi azenge papo pali indembela iya bamunyumba yache.

⁵³ Loli aba Levi bazengaye ivisakasa vyabo umwakuchizyungulila Ichisakasa umwakuti u Mwene atakabakalalilaye aba Izilayeli. Aba Levi bo babo bachisungililaye Ichisakasa icha Mwene chila.

⁵⁴ Aba Izilayeli bakabomba vyosi vivyo u Mwene akamulamula u Mozesi.