Ubwandilo 9 - IBAYIBOLO 2024

U Chala akufinga ulufingo nu Nowa

¹ U Chala akamusaya u Nowa poka na bana bache nukunena ukuti, “Mupapanaye umwakuti muchizuzye ichisu ichapasi.

² Ivinyamana vyosi, iviyuni sona niswi vikwiza pakukunyilagha. Navibika pasi pabulaghili bwinyu ivyabumi vyosi ni viyuni vyope, ni vinyamana ivyakwavula, niswi zyosi izya munyanja.

³ Ilelo mungalya ivinyamana vyosi ukuyana na muno nkabitikizizya pakulya ivyamani. Nabapa vyosi pakuba chakulya chinyu.

⁴ “Loli mutakalyanje inyama yiyo yichili yili ni banda. Nabakanizya chinichi pachifukwa ichakuti ubumi ubwa chinyamana buli mwibanda.

⁵ Nanti umuntu akumughogha umuntu uwamwabo, wepe akwiza pakufundiwa. Nanti ichinyamana chikumughogha umuntu, chope chikwiza pakughoghiwa. Umuntu wesi yuyo akumughogha umuntu uwamwabo, wepe aghoghiwanje.

⁶ Pakuti umuntu akapeliwa muchifwani icha Chala, polelo umuntu wesi yuyo akumughogha umuntu uwamwabo, wepe akwiza pakughoghiwa.

⁷ “Mupapanaye, umwakuti muchizuzye ichisu chosi ichapasi.”

⁸ U Chala akamubuzya u Nowa na bana bache akati,

⁹ “Ilelo nkufinga nawe ulufingo, poka na baluko lwako,

¹⁰ ni vyabumi vyosi, ni viyuni, ni vitekwa, ni vinyamana ivyamuzi. Ivi vyo vintu vyosi vivyo vikafumila kuzi poka nawe mubwato mula.

¹¹ Ulufingo lulo nkufingana nawe lo ulu: Ntakwiza pakuzimizya sona ivintu ivyabumi na mizi aghakwizula. Naloli Ntakwiza pakutuma amizi aghakwizula pakuchinangannya ichisu ichapasi.”

¹² U Chala akati, “Ichi cho chimanyilo icha lufingo ulwa bwila na bwila, lulo indi pakufingana nawe, sona ni vintu vyosi ivyabumi:

¹³ Nkubika ichipingavula mwibingu pakuba chimanyilo icha ulufingo ulwa pakasi papane ni chisu ichapasi.

¹⁴ Akabalilo kosi nanti kumwanya kwaba amabingu, sona nanti ichipingavula chaboneka,

¹⁵ nkwiza pakukumbuka ulufingo lulo luli pakasi papane namwe, sona ni vinyamana vyosi ukuti amizi aghakwizula ghatakwiza pakuzimizya sona ivyabumi vyosi.

¹⁶ Nanti ichipingavula chaboneka mumabingu, nkwiza pakuchennya nukukumbuka ulufingo ulwa bwila na bwila, lulo luli pakasi papane na vyosi ivyabumi pachisu ichapasi.”

¹⁷ Po u Chala akamubuzya u Nowa akati, “Ichi cho chimanyilo icha ulufingo lulo indi pakufingana ni vintu vyosi ivyabumi.”

U Nowa na bana bache abalumendo

¹⁸ Abana aba Nowa babo bakafuma mubwato mula bakaba bo aba: U Shemu nu Hamu nu Yafeti. U Hamu weyuyo akaba we wise uwa Kenani.

¹⁹ Abana aba Nowa batatu banaba bo babo bakaba banyenya aba bantu bosi aba muchisu ichapasi.

²⁰ U Nowa akaba muntu mulimi, sona akaba wakwanda pakulima umughunda uwa mampesya.

²¹ Isiku limo bo ang'wela bulo uvinyo, akakolwa. Po akavula amenda ghache ghosi nukughona nkule muchisakasa chache.

²² Bo u Hamu uwise uwa Kenani, ennya ukuti uwise ali nkule, akufuma kuzi nukubabuzya abawamwabo babili bala.

²³ Loli u Shemu nu Yafeti bakasenda inkazo nukuyibika kunyuma muvipunko vyabo. Bakanyokela chinyumanyuma nukumuvwinka. Batakennyako kuko uwise akaghona, po batakayennya inkule iya wise.

²⁴ Bo u Nowa uvinyo amala mumutu, akazyaghannya zizyo umwana wache umunandi nkani akabomba.

²⁵ Po akati, “U Kenani aghuniwanje! Akwiza pakuba muzya uwa bawamwabo.

²⁶ Apaliwanje u Mwene, u Chala uwa Shemu! U Kenani akwiza pakuba muzya uwa Shemu.

²⁷ U Chala akuzye impaka izya Yafeti. Abaluko lwache bagabanaye ulusayo na baluko ulwa Shemu! U Kenani akwiza pakuba muzya uwa Yafeti.”

²⁸ Bo amizi aghakwizula ghamala, u Nowa akikala nubumi amaka aghanji 350.

²⁹ Po akafwa bo ali na maka 950.