Ubwandilo 8 - IBAYIBOLO 2024

Nizya kupwa ukwa mizi aghakwizula

¹ Loli u Chala akamukumbuka u Nowa poka ni vitekwa ni vinyamana vyosi ivyamuzi vivyo akaba navyo mubwato mulamula. Po akalamula ukuti impepo yande pakukuka, panapo na panapo amizi ghala ghakanda pakupwa.

² Imbwibwi izya mizi izya kusi kuchisu poka na kumwanya vikighaliliwa. Ivula yikaleka pakutima,

³ po amizi ghakendelelagha pakupwa panandipanandi. Bo ghachilapo amasiku 150 kukaba ukuti amizi ghala ghapwa naloli.

⁴ Pisiku ilya 17 ilya mwezi uwaseveni, ubwato bula bukima pighamba ilya Alalati.

⁵ Amizi ghala ghakendelela pakupwa mupaka pisiku ilyakwanda ilya mwezi uwa 10 ghulaghula isonga izya maghamba zikanda pakuboneka.

⁶ Bo ghachilapo amasiku 40, u Nowa akighula ibwindo,

⁷ nukumufumya kuzi uchigobe. Uchigobe yula akabulukagha bulo mumwanya ukulindilila ukuti amizi ghosi ghapwe pachisu ichapasi.

⁸ Po u Nowa akayifumya kuzi inkunda ukuti ennye nanti amizi ghosi ghapwa pachisu ichapasi.

⁹ Loli inkunda yitakabwagha ubuzilo ubwakukanyapo, pakuti amizi ghakaba ghachili ghalipo pachisu chosi ichapasi, po yikanyokela kwa Nowa mubwato mula. U Nowa akafumya inyobe yache kuzi nukuyinjizya mubwato mula.

¹⁰ Bo ghachilapo amasiku aghanji seveni, u Nowa akayifumya sona inkunda mubwato mula.

¹¹ Pachamabwila inkunda yila yikanyokela, po u Nowa akennya ilyani iteta ilya misyunguti kumulomo wache lilyo yikayaba! Panapa u Nowa akazimanya ukuti amizi ghanda pakupwa.

¹² U Nowa akalindilila sona amasiku aghanji seveni, po akayifumya sona inkunda kuzi, loli ubulendo ubu yitakanyokela.

¹³ Bo u Nowa ali na maka 601, pisiku ilyakwanda ilya mwezi uwakwanda, amizi ghakapwa ghosi pachisu ichapasi. U Nowa akighula ibwindo ilya bwato nukutalankannya kuzi nukwennya ukuti ichisu chikanda pakumila.

¹⁴ Pisiku ilya 27 ilya mwezi uwabubili, ichisu chosi ichapasi chikumila zila.

¹⁵ U Chala akamubuzya u Nowa akati,

¹⁶ “Awe nu muchi wako, na bana bako poka na bachi babo fumila kuzi.

¹⁷ Fumya kuzi vyosi ivyabumi vivyo ukaba navyo mulamula: Iviyuni, ni vinyamana ni vinyamana vyosi ivyakwavula, umwakuti vinyame nukusata pachisu chosi ichapasi.”

¹⁸ Po u Nowa akafumila kuzi nu muchi wache, na bana poka na bachi babo.

¹⁹ Ivinyamana vyosi ni vinyamana vyosi ivyakwavula ni viyuni na vyosi vivyo vikwenda pachisu ichapasi vikafumila kuzi mutubukatila.

U Nowa akubika ichakwiyipa

²⁰ Po u Nowa akamuzengela ichighemo u Mwene. Akasendapo ichinyamana choka pa vinyamana vyosi, sona ichiyuni choka pa viyuni vyosi vivyo vikitikiziwa nu Chala ukuti vibanje vyakwiyipa ivyakocha pachighemo palapala.

²¹ Bo u Mwene anusya umunusi umwiza ghula akati, “Ntakwiza pakuchighuna sona ichisu ichapasi pachifukwa icha zizyo abantu bakubomba, pakuti inzimenye ukuti inyinong'ono izya muntu umubibi zikwandila kubwana bwache. Ntakwiza sona pakuvizimizya ivintu vyosi ivyabumi ukuyana namumo nabombela.

²² Akabalilo kosi kako ichisu ichapasi chichili chilipo, kukwiza pakuba kabalilo akakubyalila na kakwinulila. Pakwiza pakuba ubukatazu nu butukizu, ichisanya nu lupepo, sona umusanya nu busiku bwila na bwila.”