Ubwandilo 7 - IBAYIBOLO 2024

Nizya mizi aghakwizula muchisu ichapasi

¹ Po u Mwene akamubuzya u Nowa akati, “Injila mubwato awe na bamunyumba yako bosi chifukwa nakwagha ukuti wewe wemwene we ukubomba zizyo ngolosu munkulilo iyi.

² Usende sona ivinyamana seveni ivyakulekanalekana ichanavuli ni chikolo vivyo viswepu, loli usende sona ivinyamana vibili ivyakulekanalekana ichanavuli ni chikolo vivyo vinyazu.

³ Usendeko sona iviyuni seveni ivyakulekanalekana ichanavuli ni chikolo. Ubombe bunubu ukuti ivinyamana vyosi sona ni viyuni visungiwe nubumi umwakuti vibanje mbeyu pachisu ichapasi.

⁴ Pakuti bo ghachilapo bulo amasiku seveni, nkwiza pakutuma ivula yiyo yikwiza pakutima pachisu ichapasi, amasiku 40, umusanya nu busiku, umwakuti izimizye ivintu vyosi ivya bumi vivyo nkavipela.”

⁵ Po u Nowa akabomba vyosi vivyo u Mwene akamulamula.

⁶ U Nowa akaba na maka 600, pakabalilo kako amizi aghakwizula ghakiza pachisu ichapasi.

⁷ U Nowa nu muchi wache, poka na bana bache na bachi babo bakinjila mubwato ukupona kumizi aghakwizula ghala.

⁸ Po ivinyamana vyosi ni viyuni vyosi, sona na vyosi ivyakwavula, vivyo viswepu na vivyo vinyazu, ichanavuli ni chikolo

⁹ vikinjila poka nu Nowa mubwato ukuyana namumo u Chala akamulamulila.

¹⁰ Bo ghachilapo amasiku seveni ghala amizi aghakwizula ghakafika pachisu ichapasi.

¹¹ Pisiku ilya 17 ilya mwezi uwabubili, bo u Nowa ali na maka 600, imbwibwi zyosi izya mizi kusi ukwa chisu ichapasi zikapunta, sona kumwanya kukighuka ukuti amizi ghakupuke.

¹² Po ivula yikatima pachisu ichapasi, amasiku 40, umusanya nu busiku.

¹³ Pisiku lilalila, u Nowa nu muchi wache na bana bache abalumendo u Shemu nu Hamu nu Yafeti, poka na bachi babo bakinjila mubwato mula.

¹⁴ Bakinjila mubwato mula poka ni vinyamana vyosi ivyakulekanalekana, ni vitekwa ni vinyamana ivyamuzi, ni vyakwavula, ni viyuni ivyakulekanalekana.

¹⁵ U Nowa akinjila mubwato mula poka ni vinyamana vyosi ivyabumi, vibilivibili ichanavuli ni chikolo,

¹⁶ ukuyana namumo u Chala akamulamulila. Po u Mwene akighalila umulyango.

¹⁷ Amizi aghakwizula ghakizulilagha muchisu ichapasi mupaka amasiku 40. Po amizi ghakanda pakwizula pachisu ichapasi, po ubwato bula bukanda pakwambama.

¹⁸ Amizi ghala ghakizula nkani pachisu ichapasi, umwakuti ubwato bukendelela pakwambama pamwanya pamizi.

¹⁹ Amizi aghakwizula ghakonjelela nkani mupaka nukughibizya amaghamba amatali nkani.

²⁰ Amizi ghakizula nkani mupaka nukukwela amamita seveni pamwanya pamaghamba.

²¹ Ivyabumi vyosi pachisu ichapasi vikazimila: Iviyuni vyosi ni vitekwa ni vinyamana vyosi ivyamuzi ni vinyamana ivyakwavula sona na bantu bosi bakafwa.

²² Ivintu vyosi pachisu ichapasi vivyo vikaba nubumi vikafwa.

²³ U Mwene akazimizya ivintu ivyabumi vyosi pachisu ichapasi: Abantu ni vinyamana ni vinyamana ivyakwavula sona ni viyuni. U Nowa mwene weyuyo akapona poka na bosi babo akaba nabo mubwato mula.

²⁴ Amizi aghakwizula ghala ghakanda pakupwa bo ghachilapo amasiku 150.