Ubwandilo 6 - IBAYIBOLO 2024

Ububibi ubwa muntu

¹ Bo abantu banda pakubala nkani muchisu ichapasi, bakapapa abana abalindu.

² Abana abalumendo aba Chala bakennya ukuti abana abalindu aba bantu bakabonekagha akiza, po bakanda pakubasenda babo bakabaghana.

³ Po u Mwene akati, “Ntakwiza pakubitikizya abantu pakwikala nubumi bwila na bwila, pakuti abantu gho mubili ghugho ghukufwa. Ukwanda ilelo abantu bakwiza pakuba na maka 120.”

⁴ Mumasiku ghalaghala na pisinda bulo kukabako abantu abatalitali abamaka nkani pachisu ichapasi, babo bakapapiwa mubakolo babo bakasendwa na bana aba Chala bala. Banaba bakaba bantu abamaka abakali, sona bamanyikwe.

⁵ U Mwene akennya ukuti abantu aba muchisu ichapasi bananga nkani, sona nukuti inyinong'ono zyabo zyaba mbibi nkani.

⁶ Akaba ni chitima pachifukwa ichakuti akabapela abantu nukubabika muchisu ichapasi. Po chikamubaba nkani mumoyo wache.

⁷ Akati, “Nkwiza pakubazimizya zila abantu bosi babo nkabapela. Nkwiza pakuvizimizya sona ivinyamana ni viyuni sona ni vinyamana ivyakwavula pachifukwa ichakuti indi ni chitima ukuti nkavipela vyosi vinivi.”

⁸ Loli u Mwene akahoboka nu Nowa.

U Nowa akupanga ubwato

⁹ Ili lyo lipangwi ilya Nowa. U Nowa akaba muntu mugholosu, yuyo atakaba na kalema nakamokamo pakabalilo kache, sona akabombagha zizyo zikamuhobosyanga u Chala.

¹⁰ U Nowa akaba na bana batatu: U Shemu nu Hamu nu Yafeti.

¹¹ Loli abantu bosi abanji bakaba babibi pamaso pa Chala, sona ububibi bwabo bukasata posi na posi.

¹² U Chala akagha ukuti ichisu ichapasi chambibi, pakuti abantu bosi bakaba ni nkalo imbibi nkani.

¹³ Po u Chala akamubuzya u Nowa akati, “Nadumula pakubazimizya zila abantu bosi. Nkwiza pakubanangannya abantu pachifukwa ichakuti bachizuzya ichisu ichapasi nu bubibi bwabo.

¹⁴ Polelo wipangile wemwene ubwato pakubombezya amatabwa agha mulombwa. Ugabe ivipinda, sona ubupake ni mpula kuzi na mukasi bulo.

¹⁵ Ubwato bunubu bubanje amamita 133 mubutali, amamita 22 mububaba, sona ukwandila pasi ukufika kumwanya bubanje amamita 13.

¹⁶ Upange akasonje aka bwato nukubuleka ubuzilo ubwakukwana hafu mita pakasi pa kasonje kala ni vibumba. Ugabe ivipinda vitatu, choka pasi, ni chabubili pakasi, sona ni chabutatu pamwanya nukubika umulyango mulubazu.

¹⁷ Nkwiza pakutuma amizi aghakwizula pachisu ichapasi, umwakuti ghanangannye ivintu vyosi ivya bumi. Ivintu vyosi pachisu ichapasi vikwiza pakuzimila zila.

¹⁸ Loli ane nkwiza pakufinga nawe ulufingo. Injila mubwato nu muchi wako, na bana bako, poka na bachi babo.

¹⁹ Injizya mubwato mulamula ivinyamana vyosi ivyakulekanalekana. Sendapo vibilibili, ichanavuli ni chikolo ukuti vibanje nubumi.

²⁰ Injizya mubwato mulamula ichinyamana chosi ichanavuli ni chikolo icha vinyamana vyosi ivyakulekanalekana ni viyuni vyosi vibanje vibilivibili, umwakuti vipone.

²¹ Usende sona ivyakulya vyosi ivyakulekanalekana ivyako ni vya vinyamana bulo.”

²² U Nowa akabomba vyosi vivyo u Chala akamulamula.