Ubwandilo 50 - IBAYIBOLO 2024

¹ U Yosefu akisumbila pa muvimba uwa wise bo akulila nukughufyofyonta.

² Po u Yosefu akabalamula abaghanga babo bakamubombelagha ukuti baghuyannye umuvimba uwa wise na malembo.

³ Imbombo iyakughuyannya umuvimba na malembo yikasenda masiku 40 ukuyana namumo zikalondeliwanga. Aba Ijiputi bakamulila umuyazi u Yakobo amasiku 70.

⁴ Bo amasiku agha chililo ghamala, u Yosefu akaghabuzya amakambala agha Falabo akati, “Nalamba, mumbuzizyeko u Falabo muti,

⁵ ‘Utata wane akandapizya akati, “Ane indi papipi pakufwa. Munsyile mwipumpa lilyo nkikumbila muchisu icha Kenani.” Polelo unyitikizye ukuti imbuke pakumusyila utata wane, po nkwiza pakwiza sona.’ ”

⁶ U Falabo akamwamula akati, “Buka, umusyile ughuso ukuyana namumo akakulapizya.”

⁷ Po u Yosefu akabuka pakumusyila uwise. Amakambala ghosi agha Falabo, poka na bantu abinji abamanyikwe aba mu Ijiputi bakamusindikila u Yosefu,

⁸ poka na bamunyumba iya Yosefu, na bawamwabo, sona na bamunyumba iya wise. Loli abana ni midimo vikasyala mu Gosheni.

⁹ Abantu abakukwela pangolo izya bwite ni falasi bope bakabuka nawe umwakuti kakaba kabukatila akakulu nkani.

¹⁰ Bo bafika pabuzilo ubwakukomelapo inyinulo ubwa Atadi, kubufumilo bwizuba ubwa Yolodani, bakamulila ni chitima ichikulu nkani. Po kulakula bakakonka inyiho zyabo pakumulila uwise amasiku seveni.

¹¹ Bo abenekaya aba muchisu icha Kenani bennya abantu bakulila pa Atadi bakati, “Ichi cho chililo icha ba Ijiputi.” Cho chifukwa ubuzilo bula bakabwita ukuti Abeli Mizilayimu kupipi nu lusoko ulwa Yolodani.

¹² Po abana aba Yakobo bakabomba vivyo uwise akabalamula.

¹³ Bakaghunyamula umuvimba wache mupaka kuchisu icha Kenani nukumusyila mwipumpa lilyo likaba mumughunda uwa Makipela, kubufumilo bwizuba ubwa Mamule, mumughunda ghugho u Abulahamu akaghula kwa Efuloni umu Hiti ukuti ghubanje wa mapumpa.

¹⁴ Bo u Yosefu amusyila uwise, akanyokela kuchisu icha Ijiputi na bakamu bache, sona na bantu bosi babo bakabuka nawe pakumusyila uwise.

U Yosefu akubakazya amoyo abawamwabo

¹⁵ Bo abakamu aba Yosefu bennya ukuti uwise afwa bakati, “Nkimba buli nanti u Yosefu anda pakutubenga nukubatika pakutanizya pabubibi bubo tukamubombela?”

¹⁶ Po bakamutumila amazyu u Yosefu aghakuti, “Bo ughuso atafuye akatulaghila

¹⁷ ukuti, ‘Twalamba, ubahobokele abawamwinyu kububibi bubo bakakunangila.’ Aswe twe bambombo aba Chala uwa ghuso, tukulaba uluhobokelo.” Bo u Yosefu apokela amazyu ghanagha akalila.

¹⁸ Abawamwabo bakiza nukufughamila pamaso papache, bakati, “Ennya, aswe twe bazya bako.”

¹⁹ Loli u Yosefu akababuzya akati, “Mutakanyilaye, nkimba ane ne Chala, ne nkubahobokela abantu imbibi?

²⁰ Mukabatika ukuti mumbombele ububibi, loli u Chala akabatika ubwiza, ukuti bupoke ubumi ubwa bantu abinji, babo bumi ilelo pachifukwa icha zizyo zikaboneka.

²¹ Polelo mutakanyilaye, nkwiza pakubasungilila poka na bana binyu.” Po akabakazya amoyo abawamwabo nukubasangalusya.

Ubufwe ubwa Yosefu

²² U Yosefu akikala muchisu icha Ijiputi poka na bamunyumba iya wise bosi. U Yosefu akafwa bo ali na amaka 110.

²³ Akaba nubumi mupaka akennya abana aba Efulayimu ni nkulilo iyabutatu, akabennya sona abana aba Makili yuyo akaba mwana wa Manase.

²⁴ Po u Yosefu akababuzya abawamwabo akati, “Indi papipi pakufwa; loli u Chala akwiza pa pakubasungilila nukubefyamo muchisu ichi ukubuka kuchisu chicho akamulayizya u Abulahamu nu Yisaki, sona nu Yakobo.”

²⁵ Po u Yosefu akabalapizya abana aba Izilayeli pakulapa ichilapo ukuti, “Bo u Chala akubalongozezya kuchisu chila, mukwiza pakunyamula amafupa ghane pakufuma nagho kuno.”

²⁶ Po u Yosefu akafwila muchisu icha Ijiputi, bo ali na maka 110. Bakaghuyanyamula umuvimba wache nukughupaka amalembo nukughubika mubokosi mu Ijiputi.