Ubwandilo 49 - IBAYIBOLO 2024

U Yakobo akubasaya abana bache

¹ Bo u Yakobo amusaya u Efulayimu nu Manase, akabitizya abana bache nukuti, “Mubungane poka mwebosi, umwakuti imbabuzye zizyo zikwiza pakubabonekela muntazi.

² Bungana poka nukuteghelezya, mwe bana aba Yakobo. Teghelezya ughuso u Yakobo.

³ “Wee Lubeni, ukatote wane, awe we maka ghane, sona we mbeyu yakwanda izyamaka ghane. Awe uchilite pabuchindamu, sona na mumaka ku bana bane bosi.

⁴ Awe uli ngati mizi aghakoghofya, utangaba we songo pachifukwa ukachinyazya ichitala icha ghuso.

⁵ “U Simiyoni nu Levi bo banamuntu. Bakubombezya ivilwilo vyabo pakwandizya ivyongo.

⁶ Wee moyo wane, utakinjililayemo mulukomano lwabo. Wee muzimu wane, utakinjililayemo mutubukatila twabo. Pakuti mubukalale bwabo bakughogha abantu, sona muvinyonywa vyabo bakuzivulazya ing'ombe.

⁷ Ichighune chibanje pabukalale bwabo, pakuti chikoghofya; sona ubukali bute ni chisa. Nkwiza pakubanyampannya mu Izilayeli, nukubasasya muchisu chosi.

⁸ “Wee Yuda, abakamu bako bakwiza pakukupala awe, sona amaka ghako ghakwiza pakubalambika abalwani bako. Abana aba ghuso bakwiza pakufughamila pamaso papako.

⁹ Wee Yuda, uli ngati mwana uwa nkalamu, wabwelako pakulema inyama, sona wanyokela kumpanga yako. U Yuda ayanite bulo ni nkalamu inkolo, yiyo yiyanizye pakunyela. Nkimba wewenu mujivu yuyo angayivulungannya?

¹⁰ Impalala iya bumwene yitakwiza pakwepamo nalumo munyumba iya Yuda. Akwiza pakubukakatila ubumwene ubu, akwiza pakughasunga amaka ghache mupaka u mwenemaka ghache ize, inko zyosi zikwiza pakumwivwila.

¹¹ Mwikwi lyache ilya mampesya ilyiza, momumo apinyite umwana uwa mpunda. Muvinyo uwa mampesya, momumo akuchapa amenda ghache. Akuchapa ivyakuvyala vyache mwa vinyo, yuyo ayanite ni banda.

¹² Amaso ghache ghakwiza pakuba machesamile ngati we vinyo, sona amino ghakwiza pakuba maswepu ngati lukama.

¹³ “U Zebuloni, akwiza pakwikala mulubazu ulwa nyanja. Akwiza pakuba liloboko ilya mabwato amakulu nkani, sona impaka yache yikwiza pakufika ku Sidoni.

¹⁴ “U Isakala yo mpunda iyamaka, yiyo yighonite muvibagha ivya ng'ozi.

¹⁵ Bo ennya ukuti ubuzilo ubwakutuzizyapo bwiza, akinama ukuti anyamule ukatundu wache, po akanduka mubomba mbombo iya buzya.

¹⁶ “U Dani akwiza pakulaghila abantu bache, abantu babo bakwiza pakuyana nuluko ulwa ba Izilayeli.

¹⁷ U Dani akwiza pakuba ngati njoka mumusebo, ngati we chipili mulubazu ulwa zila, yiyo yikuluma kuchitende icha falasi, umwakuti yuyo akwelite papo awile umusana.

¹⁸ “U Mwene, nkulindilila ubupoki bwako.

¹⁹ “U Gadi akwiza pakusambukiliwa na mavyondongo, loli akwiza pakubasambukila nukubachimbizya.

²⁰ “Ichisu icha Asheli chikwiza pakupa ivyakulya vyakunona, ivyakubabaghila abamwene.

²¹ “U Nafutali we mbabala inkolo, yiyo yisatuliwe yikunyelanyela, yikupapa abana abakuboneka akiza.

²² “U Yosefu ko kasamba kako kakwela ichikomwa. Ko kasamba kako kakwela ichikomwa papipi ni chiziba, akasamba kako kakwelite palubumba.

²³ Abalwani bache bakumuzyungulila nu bwele nu tulasilo; bakumulasa nukumusamula nkani.

²⁴ Loli ubwele bwache bukaba bwa maka, sona inyobe zyache zyamaka, pachifukwa icha Uwamaka Ghosi uwa Yakobo, pakuti we mudimi, sona lyalabwe ilya Izilayeli.

²⁵ U Chala uwa ghuso weyuyo akwiza pakwavwa. U Chala Uwamaka Ghosi weyuyo akwiza pakukusaya. Ni visayo ivya kumwanya, sona na mizi agha kubwibwituka pachisu ichapasi, ulusayo ulwa bana ni ng'ombe

²⁶ Ulusayo ulwa ghuso lwamaka nkani, ukuchila ulusayo ulwa maghamba agha bwila na bwila, ukuchila sona ivyiza ivya kumitu ivya bwila na bwila. Vinivi vyo vyikalaye pamutu uwa Yosefu, yuyo akasabuliwa pakasi pa bawamwabo.

²⁷ “U Benjamini ali ngati we kambwe yuyo mukali nkani, pandabindabi ni chamabwila akughogha nukulya vivyo akalema.”

²⁸ Bosi banaba baluko 12 aba Izilayeli, sona mazyu ghanagha gho ghagho uwise akababuzya bo akubasaya pakulaghana nabo, ghagho ghakamubaghila umuntu wesi pamwene.

Ukufwa nukusyiliwa ukwa Yakobo

²⁹ Po u Yakobo akabalamula abana bache akati, “Ilelo indipapipi pakufwa, po mukwiza pakunsyila kumapumpa agha bakamu bane, ghagho ghali mumughunda uwa Efuloni umuntu uwaku Hiti,

³⁰ mwipumpa lilyo lili mumughunda uwa Makipela, kubufumilo bwizuba ubwa Mamule, muchisu icha Kenani, chicho u Abulahamu akaghulila poka nu mughunda kwa Efuloni ukuti ko kubanje ko kumapumpa.

³¹ Kulakula ko kuko bakamusyila u Abulahamu poka nu muchi wache u Sala, ko kuko sona bakamusyila u Yisaki nu muchi u Labeka, kulakula ko kuko nkamusyila u Leya.

³² Umughunda ni pumpa lilyo lili mulamula vikaghuliwa kuba Hiti.”

³³ Bo u Yakobo amala pakubalayizya abana bache, akakwezya inyayo zyache pachitala, po akafwa.