Ubwandilo 48 - IBAYIBOLO 2024

U Yakobo akumusaya u Efulayimu nu Manase

¹ Pisinda pache u Yosefu akabuziwa ukuti, “Ughuso mubine.” Po akabasenda abana bache abalumendo babili bala, u Manase nu Efulayimu nukubuka nabo pakumwennya u Yakobo.

² Bo u Yakobo ivwa ukuti, “Umwana wako u Yosefu iza,” akikazya, akanyamuka nukwikala pachitala palapala.

³ U Yakobo akamubuzya u Yosefu akati, “U Chala Uwamaka Ghosi akambonekela pa Luzi muchisu icha Kenani, sona akansaya.

⁴ Akati, ‘Nkwiza pakukupa abana abinji, umwakuti abaluko lwako bakwiza pakuba bantu aba inko inyinji nkani. Nkwiza pakubapa abaluko lwako ichisu ichi pakuba chabo ni chabo bwila na bwila.’ ”

⁵ Po akanena sona ukuti, “Abana bako abalumendo babili babo bakapapiliwa muchisu icha Ijiputi, bo ane inchili pakwiza kuno, u Efulayimu nu Manase bakwiza pakupimiwa pakuba bana bane ngati mumo u Lubeni nu Simiyoni babeleye bana bane.

⁶ Loli abana bako bosi babo bakapapiwa pisinda pa bana babili aba, bakwiza pakuba bako. Bakwiza pakuba bampyana yabo ukwendela mwa Efulayimu nu Manase.

⁷ Nkubomba chinichi pachifukwa icha unyoko u Lakelo yuyo akafwila muzila muchisu icha Kenani, bo tuchili nukufika mukaya aka Efulati, bo nkunyokako ku Mesopotamiya. Po nkamusyila palapala mulubazu ulwa musebo waku Efulati” (ko kokuti Betelehemu.)

⁸ Bo u Yakobo abennya abana aba Yosefu, akalalusya akati, “Nkimba abalumendo banaba bo bawenu?”

⁹ U Yosefu akamwamula akati, “Bana bane babo u Chala ampa kuno.” Po u Yakobo akati, “Zagha nabo kuno ukuti imbasaye.”

¹⁰ Amaso agha Yakobo ghakennyanga akafobela pachifukwa icha bughosi. Po u Yosefu akabapalamizya abana bache kwa Yakobo, po akabakumbatila nukubafyofyonta.

¹¹ U Yakobo akamubuzya u Yosefu akati, “Intakasubila napo panandi ukuti ningachennya sona icheni chako, loli ilelo u Chala anyitikizya ukuti imbennye na bana bako bulo.”

¹² Po u Yosefu akabefyapo pavimpevu ivya Yakobo, nukumufughamilila.

¹³ U Yosefu akamubika u Efulayimu kunyobe iya mongo iya Yakobo, po u Manase kunyobe indilo iya Yakobo.

¹⁴ Loli u Yakobo akapinganika nukugholosezya inyobe yache indilo pamutu uwa Efulayimu, yuyo akaba munandi, sona inyobe iya mongo pamutu uwa Manase, yuyo akaba we songo.

¹⁵ Po akamusaya u Yosefu akati, “U Chala yuyo abatata bane u Abulahamu nu Yisaki bakamubombelagha abasaye abana banaba. U Chala yuyo ansungilila mupaka pakabalilo aka, abasaye abana banaba.

¹⁶ Uwantumi yuyo akampoka ane kububibi bosi, abasaye abana babili banaba. Itabwa lyane ni tabwa ilya batata bane u Abulahamu nu Yisaki lyendelele pakubapo ukwendela mubana banaba. Bapapaye nkani, nukuba baluko ulukulu nkani.”

¹⁷ Bo u Yosefu ennya ukuti uwise akubika inyobe yache indilo pamutu uwa Efulayimu, atakahoboka. Akayefyapo inyobe yila pamutu uwa Efulayimu nukuyibika pamutu uwa Manase.

¹⁸ U Yosefu akamubuzya uwise akati, “Tata te momumo, pakuti uyu we songo, bika inyobe yako indilo pamutu wache.”

¹⁹ Loli uwise akakana akati, “Inzimenye mwana wane. Inzimenye ukuti abaluko ulwa Manase bope bulo bakwiza pakuba luko ulukulu nkani. Loli umuzuna wache akwiza pakuba mukulu nkani ukumuchila, sona abaluko lwache bakwiza pakuba lwa inko inyinji nkani.”

²⁰ Po akabasaya bosi pisiku lilalila nukuti, “Aba Izilayeli bakwiza pakubombezya amatabwa ghinyu pakubasaya abantu. Bakwiza pakunenagha ukuti, ‘U Chala abapele amwe pakuba ngati we Efulayimu nu Manase.’ ” Pakubomba bunubu u Yakobo akamubika Efulayimu muntazi umwa Manase.

²¹ Po u Yakobo akamubuzya u Yosefu akati, “Ukunyennya, indi papipi pakufwa, loli u Chala akwiza pakuba nawe, sona akwiza pakukunyosezya awe kuchisu icha banyenya bako.

²² Nkukupa awe, ntakubapa abawamwinyu awe, ichisu icha Shekemu, ichigaba icha muvundo chila chicho nkabafyula aba Amoli nupanga sona nubwele bwane.”