Ubwandilo 47 - IBAYIBOLO 2024

¹ Po u Yosefu akamubuzya u Falabo akati, “Utata poka na bawamwitu bizite kuno ukufuma ku Kenani. Bizite ni vitekwa vyabo vyosi poka nu katundu wabo wesi. Losi ulu bali muchisu icha Gosheni.”

² Pakasi pa bawamwabo bache akasenda abantu fayivi nukubimika pamaso pa Falabo.

³ U Falabo akabalalusya bawamwabo akati, “Nkimba mukubomba mbombo yoni?” Po bakamwamula bakati, “Ababombi bako badimi bulo ngati mumo abanyenya bitu bakabombelagha.

⁴ Twiza pakwikala muchisu chinichi, pachifukwa ichakuti muchisu icha Kenani muwiye izala inkulu nkani sona litalimo nisote ilya ing'ozi ni mbuzi zyitu. Po tukukulaba ukuti ubitikizye ababombi bako ukuti twikale muchisu ichi.”

⁵ Po u Falabo akamubuzya u Yosefu akati, “Ughuso na bakamu bako biza kukwako.

⁶ Ichisu icha Ijiputi chili munyobe zyinyu, mwikazye ughuso na bawamwinyu pabuzilo ubwiza nkani muchisu ichi, baleke bikalaye muchigaba icha Gosheni. Sona nanti abantu bamo pakasi pabawamwinyu bamenye pakudima ivitekwa babanje balaghili aba kwenelezya ivitekwa vyane.”

⁷ Po u Yosefu akamusenda uwise u Yakobo, nukubuka nawe kwa Falabo, po u Yakobo akamusaya u Falabo,

⁸ po u Falabo akamulalusya u Yakobo akati, “Nkimba uli na maka malinga?”

⁹ Po u Yakobo akamwamula u Falabo akati, “Indi na maka 130, sona nendanendagha bulo. Amaka ghane manandi bulo, sona mapalapala, ghatayanite na maka agha banyenya bane babo bakikalagha nubumi ubutali nkani.”

¹⁰ Po U Yakobo akamusaya sona u Falabo nukwepapo.

¹¹ Po u Falabo akamuzengezya uwise na bawamwabo muchisu icha Ijiputi, akabapa ubuzilo ubwiza nkani ubwa muvundo papipi nakaya akakulu nkani aka Lamesesi ukuyana mumo u Falabo akamulamulila.

¹² U Yosefu akamupa uwise ichakulya, na bawamwabo, sona na bosi babo bakikalagha munyumba iya wise, ukuyana nu bwinji ubwa bantu.

U Yosefu mukabalilo aka zala

¹³ Izala yikawa posi na posi muchisu icha Ijiputi nicha Kenani, umwakuti abantu bakadedebala nizala.

¹⁴ Bo abantu bakughula ivyakulya u Yosefu akabunganika indalama zyosi poka zizyo akazyagha muchisu icha Ijiputi nicha Kenani. U Yosefu akiza ni ndalama zila munyumba iya Falabo.

¹⁵ Bo indalama zyosi zyamala muchisu icha Ijiputi na muchisu icha Kenani, aba Ijiputi bosi bakiza kwa Yosefu nukumulaba ukuti, “Utupeko ivyakulya! Utakatuleke ukuti tufwe nizala, bombapo zimo, indalama zyitu zyamala.”

¹⁶ Po u Yosefu akabamula akati, “Mumpe ing'ombe zyinyu po nane nkwiza pakubapa ivyakulya pakutanana ni ng'ombe zyinyu, pakuti indalama zyinyu zyamala.”

¹⁷ Abantu bakamupa u Yosefu ing'ombe, po u Yosefu akabapa ivyakulya pakutanana ni ifalasi ni ng'ozi ni mbuzi ni ng'ombe sona ni mpunda. Umwaka ghosi ghulaghula akabapa ivyakulya pakutanana ni vitekwa vyabo.

¹⁸ Bo umwaka ghula wamala, abantu bakabuka kukwache nukuti, “Wee mwene witu, tutabaghiye pakukuvinda nachimochimo we mwene witu ukuti indalama zyitu zyosi zyamala, sona vyope ivitekwa vyako. Mwene, chitalipo nachimo chicho chasyala, loli vivyo vyasyalako gho mabili ghitu sona na maghunda ghitu.

¹⁹ Nkimba choni chicho tungafwanga nizala pantazi papako? Ututane aswe poka na maghunda ghitu ni chakulya, aswe poka ni chisu chitu tukwiza pakuba twe bazya aba Falabo. Utupeko imbeyu ukuti tubyale mumaghunda ghitu umwakuti ghatakaghonele.”

²⁰ Po u Yosefu akamughulila u Falabo ichisu chosi icha Ijiputi, abantu bosi aba muchisu icha Ijiputi bakaghulizya amaghunda ghabo pachifukwa icha kuwa ukwa zala. Ichisu chosi chila chikaba cha Falabo.

²¹ Abantu bosi aba muchisu icha Ijiputi bakaba bazya ukwandila ko kumpaka nukufika kumpaka iyinji.

²² Loli atakaghula umughunda uwa muputi, pakuti u Falabo akabapa abaputi ivyakulondiwa vyabo, sona bakikalilagha pavyakulondiwa vyabo vivyo u Falabo akabapanga. Polelo ichi cho chifukwa batakamughulizizya Yosefu amaghunda ghabo.

²³ Po u Yosefu akababuzya abantu akati, “Teghelezya! Ilelo nabaghula poka na maghunda ghinyu. Mwaba pasi pabulaghili ubwa Falabo, po nkubapa imbeyu izi, losi ulu mubuke pakubyala mumaghunda ghinyu.

²⁴ Loli pakabalilo akakwinulila mukwiza pakumupa u Falabo ichigaba choka pa vigaba vyosi fayivi, po ivigaba vyosi folo vikwiza pakuba vyinyu ngati mbeyu iya mumaghunda, sona ngati vyakulya amwe poka na babo mukwikala nabo, sona ngati chakulya icha bana binyu.”

²⁵ Po bakamula bakati, “Songo, ndagha wabomba. Tukwiza pakuba twe bazya ba Falabo, pachifukwa ichakuti ukaba muntu umwiza nkani kukwitu, sona wabupoka ubumi bwitu.”

²⁶ U Yosefu akalupela pakuba lulaghilo muchisu icha Ijiputi, sona nilelo bulo luliko, ulwakuti u Falabo asendayeko ichigaba choka pa vigaba vyosi fayivi; chene ichisu cha baputi chitakaba icha Falabo.

U Yakobo akubalagha abana bache akabumalilo

²⁷ Aba Izilayeli bakikala muchisu icha Ijiputi muchigaba icha Gosheni, mumo bakaba bakabi, sona bakapapa nkani abana.

²⁸ U Yakobo akikala muchisu icha Ijiputi amaka 17, po akaba namaka 147.

²⁹ Bo akabalilo akakufwila ukwa Yakobo kakwana, akamwitizya umwana wache u Yosefu nukumubuzya ukuti, “Nanti naloli wiyipiye wemwene, lapa pakubika inyobe yako muntapatapa zyane ukuti ukwiza pakumbombela akiza sona na mubwanaloli. Utakansyile muchisu icha Ijiputi ichi,

³⁰ loli nanti nafwa, umuvimba wane mutakwiza pakughusyila ku Ijiputi, mukwiza pakughusyila kuko abatata bane baghonite.” U Yosefu akamula akati, “Nkwiza pakubomba vivyo wanena.”

³¹ U Yakobo akamubuzya Yosefu ukuti, “Lapa pamaso pa Chala ukuti ukwiza pakubomba.” Po u Yakobo akalapa nukumwiputa u Chala.