Ubwandilo 46 - IBAYIBOLO 2024

U Yakobo akubuka ku Ijiputi

¹ Po u Yakobo akabunganika utwache tosi nukubuka ku Belisheba kuko akabika ivyakwiyipa kwa Chala uwa wise wache u Yisaki.

² Pabusiku, u Chala akanena nawe muchisetuka akati, “Yakobo! Yakobo!” Po akamwamula akati, “Ane indi pano.”

³ Po akati, “Ane ne Chala, u Chala uwa ghuso, utakanyilaye pakubuka ku Ijiputi, pakuti kulakula nkwiza pakukupela pakuba we luko ulukulu nkani.

⁴ Ane nkwiza pakubuka nawe ku Ijiputi, sona nkwiza pakunyokako nawe. Bo wafwa u Yosefu akwiza pakuba kulakula.”

⁵ U Yakobo akepamo mukaya aka Belisheba. Abana bache bakamusenda uwise na bizukulu bache, sona na balasagha bache, pangolo zizyo u Falabo akabatumila ukuti zibanyamule.

⁶ Bakanyamula sona ni vitekwa vyabo poka nu katundu yuyo bakakaba bo bakwikala muchisu icha Kenani. Po u Yakobo na baluko lwache losi bakabuka mu Ijiputi,

⁷ na bana bache, abalumendo na bizukulu abalumendo, na bana bache abalindu na bizukulu bache abalindu.

⁸ Amatabwa agha bantu abaluko ulwa Yakobo, babo bakabuka ku Ijiputi, sona na bana bache abalumendo bakaba bo aba: U Lubeni, ukatote uwa Yakobo,

⁹ na bana aba Lubeni: U Hanoki nu Palu nu Heziloni nu Kalimi.

¹⁰ Abana aba Simiyoni bo aba: U Yemuweli nu Yamini nu Ohadi nu Yakini nu Zohala nu Shabuli yuyo unyina akaba waku Kenani.

¹¹ Abana aba Levi bo aba: U Gelishoni nu Kohati nu Melali.

¹² Abana aba Yuda bo aba: U Eli nu Onani nu Shela nu Pelezi nu Zela. U Eli nu Onani bakafwila mu Kenani. Abana aba Pelezi bo aba: U Heziloni nu Hamuli.

¹³ Abana aba Isakala bo aba: U Tola nu Puwa nu Yashubi nu Shimiloni.

¹⁴ Abana aba Zebuloni bo aba: U Seledi nu Eloni nu Yaleli.

¹⁵ Aba bakaba bana aba Leya babo akamupapila u Yakobo bo bali ku Mesopotamiya poka nu mwana wache umulindu u Dina. Bosi poka abana bache abalumendo na balindu bakabapo 33.

¹⁶ Abana aba Gadi bo aba: U Zefoni nu Hagi nu Shuni nu Ziboni nu Eli nu Alodi nu Aleli.

¹⁷ Abana aba Asheli bo aba: U Imuna nu Ishiva nu Ishivi sona nu Beliya poka nu muyemba wabo umulindu u Sela. Abana aba Beliya bo aba: U Hebeli nu Malikiyeli.

¹⁸ Bosi banaba bakaba bana aba Yakobo babo bakapapiwa mwa Zilipa babo u Labani akamupa umwana wache u Leya, bosi poka bakaba 16.

¹⁹ U Lakelo, umuchi uwa Yakobo, akamupapila abana babili: U Yosefu nu Benjamini.

²⁰ Sona kwa Yosefu muchisu icha Ijiputi kukapapiwa: U Manase nu Efulayimu. Asenati akamupapila u Yosefu abana banaba, yuyo akaba mwana wa Potifela umuputi waku Oni.

²¹ Abana aba Benjamini bo aba: U Bela nu Bekeli nu Ashibeli nu Gela nu Naamani nu Ehi nu Loshi nu Mupimu nu Hupimu sona nu Alidi.

²² Banaba bakaba bana aba Lakelo babo bakapapiwa kwa Yakobo bosi poka bakabapo 14.

²³ Umwana uwa Dani we uyu: U Hushimu.

²⁴ Abana aba Nafutali bo aba: U Yahizeli nu Guni nu Yezeli sona nu Shilemu.

²⁵ Banaba bakaba bana aba Biliha babo u Labani akamupa u Lakelo umwana wache sona banaba akamupapila u Yakobo abana, bosi poka bakaba seveni.

²⁶ Abantu bosi babo bakabuka ku Ijiputi poka nu Yakobo ukusita kubelengelako abachi aba bana babo abalumendo, bakabapo 66.

²⁷ Abana aba Yosefu babo bakapapiliwa mu Ijiputi bakabapo babili, po abamunyumba iya Yakobo bosi babo bakiza mu Ijiputi, bakabapo 70.

U Yakobo na bamunyumba yache mu Ijiputi

²⁸ U Yakobo akamutuma u Yuda kwa Yosefu ukuti amulabe pakukomana nawe ku Gosheni. Bo bafika muchigaba icha Gosheni,

²⁹ u Yosefu akakwela mungolo yache pakukomana nu wise u Yakobo ku Gosheni. Bo afika akamukukila, sona akalila akabalilo akatali nkani.

³⁰ U Yakobo akamubuzya u Yosefu akati, “Ilelo ningafwa, pachifukwa ichakuti nachennya icheni chako ukuti uchili we mumi.”

³¹ Po u Yosefu akababuzya abawamwabo sona na bamunyumba iya wise abanji akati, “Imbaghiye imumanyisye u Falabo nizya awe nukumubuzya ukuti, ‘Abawamwitu na banji abamunyumba iya tata babo bakaba muchisu icha Kenani, biza kukwane.

³² Sona abantu banaba badimi pachifukwa ichakuti bakaba bateka ng'ombe, sona biza ni vitekwa vyabo ivyinji nkani navyosi vivyo bangaba navyo.’

³³ Polelo nanti u Falabo akubitizya nukubalalusya akuti, ‘Nkimba mukubomba mbombo yoni?’

³⁴ Mwamulaye ukuti, ‘Ababombi bako bateka ng'ombe mubumi bwabo bosi ngati mumo bakabombelagha abanyenya bitu.’ Nanti mwanena bunubu mukwiza pakwikala muchisu icha Gosheni.” U Yosefu akanena zinizi pachifukwa ichakuti aba Ijiputi batakahobokagha na badimi.