Ubwandilo 45 - IBAYIBOLO 2024

U Yosefu akwilanjizya mwene

¹ Po u Yosefu akapotwa pakwilema pamaso pa bambombo bache bala, po akakolomoka akati, “Abantu bosi bafumemo muno.” U Yosefu atakalondagha ukuti umuntu yumo abemo bo akwilanjizya mulamula ku bawamwabo.

² Akakolomoka nkani umwakuti aba Ijiputi babo bakaba kuzi bakamwivwa, po ipangwi likabafika abamunyumba iya mwene u Falabo.

³ Po u Yosefu akababuzya abawamwabo bala akati, “Ane ne Yosefu. Nkimba utata wane achili mumi?” Loli bo abawamwabo bivwa zinizi bakanyila nkani umwakuti batakamwamula.

⁴ Po u Yosefu akababuzya akati, “Palamila.” Bo bapalamila u Yosefu akati, “Ane ne wamwinyu u Yosefu, mukangulizya, po bakiza nane kuno ku Ijiputi.

⁵ Loli mutakayimbaye mumoyo ghinyu pamo pakuba ni chitima, pachifukwa ichakuti mukangulizya muno, pakuti u Chala akantuma kuntazi kukwinyu umwakuti imbapoke.

⁶ Umwaka ughu wabubili ukuti muchisu mubanje izala, loli kwasyalako amaka fayivi ghagho ghakwiza, po kutakwiza pakubako ukulima pamo ukwinula.

⁷ U Chala akantuma ane muntazi mumwinyu ukuti mubanje na baluko ulukulu nkani.

⁸ “Po te mwemwe mukantuma kuno, loli we Chala. Sona ampela ane pakuba likambala ikulu ilya Falabo, sona nukuba we kapitawa uwa katundu wache wesi uwa munyumba yache, sona umulaghili uwa chisu chosi icha Ijiputi.

⁹ Lubilolubilo nyokela kwa tata wane, mumubuzye ukuti umwana wako u Yosefu akuti, ‘U Chala ankwezya pakuba ne mulaghili uwa chisu chosi icha Ijiputi. Mwize kuno, mutakazyelaye.

¹⁰ Mukwiza pakwikala muchisu icha Gosheni, sona mukwiza pakwikala papipi nane, amwe na bana binyu, na bizukulu binyu, ni ng'ozi zyinyu, ni mbuzi zyinyu, ni ng'ombe zyinyu, sona na vyosi vivyo muli navyo.

¹¹ Kuko nkwiza pakubapanga ivyakulya, pakuti kwasyala amaka fayivi agha zala, sona intakulonda amwe na bamunyumba zyinyu ukuti mufwe nizala poka ni vitekwa vyinyu.’

¹² “Ilelo mwebosi poka nu Benjamini umuzuna wane mwisimikila na maso ghinyu ukuti naloli yuyo akunena namwe nene.

¹³ Mumupangile utata nizya buchindamu bubo indi nabo muchisu icha Ijiputi ichi. Mumubuzye sona vyosi vivyo mwavyennya. Lubilolubilo kamusende utata nukwiza nawe kuno.”

¹⁴ U Yosefu akamukumbatila umuzuna wache u Benjamini, nukulila. Wepe u Benjamini akamukumbatila nukulila.

¹⁵ Bo u Yosefu achili akulila, akabakumbatila abawamwabo bosi nukubafyofyonta. Po abawamwabo bala bakanda pakunenezannya nawe.

¹⁶ Bo ipangwi lyivwika kunyumba iya Falabo ukuti abawamwabo aba Yosefu biza, u Falabo na makambala ghache bakahoboka nkani.

¹⁷ U Falabo akamubuzya u Yosefu akati, “Ubabuzye abawamwinyu ukuti bakwezye ukatundu pampunda nukunyokela ku Kenani.

¹⁸ Kamusende ughuso na bamunyumba zyabo, bize kuno. Nkwiza pakubapa ichisu icha muvundo nkani mu Ijiputi muno, sona bakwiza pakwilagha ivyakulya ivya muchisu ichi.

¹⁹ “Ubabuzye ukuti basende ingolo izya ku Ijiputi umwakuti abachi babo, na bana poka nu ghuso bakwelemo bo bakwiza kuno.

²⁰ Batakapasyanje pakumuleka ukatundu wabo kwisinda, pachifukwa ichakuti ichisu icha muvundo icha ku Ijiputi chikwiza pakuba chabo.”

²¹ Abana aba Yakobo bakabomba vivyo bakabuziwa. U Yosefu akabapa ingolo ukuyana namumo u Falabo akalamulila, sona akabapa ichakulya icha pabulendo.

²² Akamupa umuntu wesi amenda amapya, loli u Benjamini akamupa isalabazya 300 izya siliva na menda fayivi.

²³ Akamutumila uwise impunda 10 zizyo zikanyamula ukatundu umwiza nkani uwamu Ijiputi ni mpunda 10 zizyo zikanyamula amalezi, ni vibama, sona ni chakulya icha pabulendo.

²⁴ Po akabasindikila abawamwabo bala. Bo bakunyamuka akati, “Mutakayimbaye mumoyo ghinyu muzila.”

²⁵ Po bakepamo muchisu icha Ijiputi nukubwela muchisu icha Kenani kwa wise u Yakobo.

²⁶ Bakamubuzya uwise bakati, “U Yosefu yula achili mumi! Weyuyo akulaghila ichisu chosi icha Ijiputi.” U Yakobo akazilika pachifukwa ichakuti atakabasubila.

²⁷ Loli bo bamubuzya zyosi zizyo u Yosefu akababuzya, sona bo azyennya ingolo zizyo u Yosefu akamutumila ukuti akwelepo pakubuka ku Ijiputi, akanda pakuzizimuka.

²⁸ U Yakobo akati, “Umwana wane u Yosefu achili mumi! Nkwiza pakubuka ukuti imwennye, bo inchili intafuye.”