Ubwandilo 44 - IBAYIBOLO 2024

Ulubako ulwa kusobela

¹ U Yosefu akamulamula usongo uwa bambombo abamunyumba yache akati, “Bizukizye amasaka abantu ni vyakulya ivyinji, mumasaka ghabo ukuyana na maka ghabo sona ubikemo indalama pamwanya pisaka ilya muntu wesi.

² Bika ulubako lwane, ulwa siliva pamwanya pisaka ilya muzuna wabo, poka ni ndalama zyache izyakughulila ivyakulya.” Po akabomba vivyo u Yosefu akamubuzya.

³ Pandabindabi bo kwacha, bakanyamuka nukubuka poka ni mpunda zyabo.

⁴ Loli bo benda bulo panandi, ukwepamo mukaya akakulu nkani u Yosefu akamubuzya uwambombo wache usongo akati, “Bachimbilile abantu bala nukubimika, sona ubalalusye ukuti, ‘Nkimba choni chicho mwatanizya ichibibi pa chintu ichiza?

⁵ Nkimba choni chicho mwiba ulubako ulwa siliva ulwa mwene, lulo u mwene wane akung'welelamo, sona lulo akulaghulilamo? Mwabomba ichintu ichibibi nkani.’ ”

⁶ Bo uwambombo abagha, akababuzya amazyu agha mwene wache

⁷ bakamwamula bakati, “Nkimba choni chicho u mwene witu akunena bunubu? Aswe tutangabomba zinizi, awe.

⁸ Muzimenye ukuti indalama zizyo tukazyagha mumasaka ghitu tukabanyosezya ukufuma muchisu icha Kenani, po nkimba tungiba bulibuli ulubako ulwa siliva pamo ulwa golide munyumba iya mwene wako?

⁹ Nanti ulubako lungaghiwa nu muntu yumo uwa aswe, akwiza pakughoghiwa, sona aswe twebosi tukwiza pakuba twe bazya bako.”

¹⁰ Uwambombo yula akati, “Nitikizya zizyo mwanena. Yuyo aghiwa nu lubako akwiza pakuba muzya wane, sona mwe banji mwebosi mutakwiza pakuba ninongwa.”

¹¹ Po umwalubilolubilo, umuntu wesi akisya isaka lyache, nukulisatula.

¹² Uwambombo uwa Yosefu akandila pakulondelezya mwisaka ilya songo nukumalila mulya munandi, po ulubako lukaghiwa mwisaka ilya Benjamini.

¹³ Po abawamwabo bala bakazepulannya amenda ghabo, pachifukwa ichakuti ichitima chikabalema, umuntu wesi akakwezya ukatundu wache pampunda nukunyokela kukaya akakulu nkani.

¹⁴ Bo u Yuda na bawamwabo biza kunyumba iya Yosefu, u Yosefu, akaba achili ali kulakula, bakafughamila pamaso papache.

¹⁵ U Yosefu akati, “Nkimba mwabomba chintu choni? Fwandi mutakazimanya ukuti umuntu ngati ane ningabombezya ubulaghuzi?”

¹⁶ Po u Yuda akamula akati, “Nkimba tunganena ichoni mwene? Nkimba tungaba na mazyu sona mwene? Pamo nkimba tungipoka bulibuli? U Chala abwagha ububibi bwitu. Po twebosi twaba bazya bako sona te mwene yuyo aghiwa nu lubako, awe.”

¹⁷ Loli u Yosefu akabamula akati, “Awe, ane intangabomba bunubu! Umuntu mwene yuyo akaghiwa nu lubako weyuyo akwiza pakuba muzya wane, mwe banji, munyokele kwa ghuso mumutende.”

U Yuda akumulambilizizya u Benjamini

¹⁸ Po u Yuda akapalamila kwa Yosefu nukuti, “Mwene wane, ne mwana munandi nkani pamaso papako, nkukulaba ukuti inene nawe izyu lyoka mpela, sona utakankalalile, pakuti uli ngati bulo we mwene u Falabo.

¹⁹ U mwene wane ukatulalusya ukuti, ‘Nkimba muli nu ghuso pamo uwamwinyu?’

²⁰ Po aswe tukakwamula ukuti, ‘Naloli tuli nu tata yuyo muntu mughosi, sona mubughosi bwache apapite umwana umulumendo umwana yuyo akapapiwa bo muntu mughosi kale. Uwamwabo uwa mulumendo uyu akafwa, po weyuyo mwene asyalite mumi pa bana bosi aba nyina sona uwise amughanite nkani.’

²¹ “Po ukatubuzya twe bambombo bako ukati, ‘Zagha nawe kukwane, ukuti ningamwennya.’

²² Po tukamubuzya u mwene tukati, ‘Umulumendo atangamuleka uwise, pakuti nanti angamuleka, uwise yula angafwa.’

²³ Loli mukatubuzya twe bambombo bako ukuti, ‘Nanti mutakwiza nu muzuna winyu mutakwiza pakukomana nane.’

²⁴ Po tukanyokela kwa tata witu nukumubuzya zizyo ukatubuzya.

²⁵ “Po utata akati, ‘Nyokela sona, katughulile ivyakulya vinandi bulo.’

²⁶ Tukamwamula tukati, ‘Tutangabukako pene papo nanti umuzuna witu akubuka naswe, po tukwiza pakubuka, pakuti tutangakomana nawe nanti umuzuna witu atakubuka naswe.’

²⁷ “Po utata witu akati, ‘Muzimenye ukuti umuchi wane akampapila abana babili.

²⁸ Weka akafwa, po nkati, “Naloli ivinyamana vimunyonkolanizye.” Pachifukwa ichakuti intamwenizyepo mupaka nilelo bulo.

²⁹ Nanti mungamusenda sona umwana uyu, po nanti ichintu chimo chamubonekela, mubughosi bwane ubu nkwiza pakufwa ni chitima.’

³⁰ “Intanganyokela sona kwa tata wane bo inte nu mulumendo, ubumi bwache bosi buli pa mulumendo yunuyu,

³¹ bo akwennya ukuti umulumendo ate naswe poka, utata akwiza pakufwa, twe bambombo bako tukwiza pakughogha umuntu umughosi yula pachifukwa icha chitima.

³² Ichinji chakuti, nkafingana nu tata ukuti, ‘Nkwiza pakumusungilila akiza umulumendo uyu.’ Nkamubuzya ukuti, ‘Nanti intizite nu mulumendo uyu, po inongwa yikwiza pakuba yane mubumi bwane bosi.’

³³ “Nalamba, mwene wane ane, leka ane insyale kunuku pakuba muzya mubuzilo ubwa mulumendo uyu ukuti u mwene anyokele kukaya poka na bawamwabo.

³⁴ Nkimba ninganyokela bulibuli kukaya nanti umulumendo uyu asyala kuno? Nkunyila umukosi ghugho ghungamuwila utata wane.”