Ubwandilo 43 - IBAYIBOLO 2024

Abawamwabo banyokela ku Ijiputi nu Benjamini

¹ Izala yikendelela pakukula nkani muchisu icha Kenani.

² Bo abamunyumba iya Yakobo bennya ivyakulya vivyo bakafuma navyo kuchisu icha Ijiputi vyamala, u Yakobo akababuzya abana bache akati, “Bukagha pakughula ivyinji panandi.”

³ Loli u Yuda akamwamula akati, “Umulaghili uwa chisu chila akatusoka nkani ukuti atakwiza pakutwitikizya ukufika pamaso papache nanti tutakubuka nu muzuna witu.

⁴ Nanti ukwitikizya pakututuma nu muzuna witu, tukwiza pakubuka nukukughulila ivyakulya.

⁵ Loli nanti utakututuma poka nawe naswe tutakubukako, pachifukwa ichakuti umuntu yula akatubuzya akati tutakwiza pakufika pamaso papache nanti tutakubuka nu muzuna witu.”

⁶ U Yakobo akalalusya akati, “Nkimba choni chicho mukanyonjelezya intamyo pakumubuzya umuntu yula ukuti muli nu wamwinyu uyunji?”

⁷ Bakamwamula bakati, “Umuntu yula akatulalusya nkani nizya twebenecho sona na bakamu bitu ukuti, ‘Nkimba ughuso achili mumi? Nkimba muli nu wamwinyu uyunji?’ Po tukamula ukuyana na malalusyo ghache. Po ngali tukazimanya bulibuli ukuti angatulalusya ukuti akwiza pakutubuzya ukuti tubuke poka nu muzuna witu.”

⁸ U Yuda akamubuzya uwise u Yakobo akati, “Umutume umulumendo uyu poka naswe, po tukwiza pakunyamuka. Pakubomba bunubu twebosi, awe, na bana bitu poka naswe tutakwiza pakufwa nizala.

⁹ Ane nkwiza pakuba chikole icha bumi ubwa Benjamini. Nanti ntakunyokela nawe mumi, po inongwa yosi yibanje pamutu papane bwila na bwila.

¹⁰ Nanti tutakabagha ngali twanyokezannya kabili kosi.”

¹¹ Po uwise u Yakobo akababuzya akati, “Nanti zingaba bunubu, mubombe ichi: Mumusendele umuntu yula ivikomwa ivyiza nkani ivya muchisu chitu ichi mumasaka ghinyu pakuba chabupi: Amafuta aghakupakazya nu buchi panandi, amafuta aghakununkila aghakulekanalekana nu mila ni mbalala, sona ni seke izya muposya.

¹² Musende indalama izyakukwana kabili pachifukwa ichakuti mubaghiye pakunyosya indalama zizyo bakabika pamwanya pamasaka ghinyu. Naloli bakapuvya bulo.

¹³ Mumusende nu muzuna winyu, po munyamuke pakubuka sona ku muntu yula.

¹⁴ U Chala Uwamaka Ghosi abapelele ichisa pamaso pa muntu yula, umwakuti abitikizye pakwiza nu Benjamini poka nu Simiyoni. Nanti chisimbiwe ukuti abana bane imbataghe bunubu, awe, chibombiwanje.”

¹⁵ Po abantu bala bakasenda ivyabupi sona ni ndalama izyakukwana poka nu Benjamini, po bakanyamuka pakubuka ku Ijiputi. Kulakula bakabuka pamaso pa Yosefu.

¹⁶ Bo u Yosefu amwennya u Benjamini ali poka nabo, akamubuzya usongo uwa bambombo wache akati, “Bukagha na bantu banaba kunyumba yane. Ughoghe inyama nukupiya akiza nkani, pachifukwa ichakuti abantu banaba bakwiza pakulya nane ichakulya icha pamusanya.”

¹⁷ Uwambombo yula akabomba vivyo u Yosefu akamubuzya, akabuka na bawamwabo aba Yosefu kunyumba yache.

¹⁸ Bakanyila nkani pachifukwa bakabuka nabo kunyumba iya Yosefu po bakati, “Akutwinjizya munyumba pachifukwa icha ndalama zizyo tukazyagha mumasaka ghitu pakwanda pala. Akulonda alwaghilepo ulusako ulwakutulemela nukutupela pakuba twe bazya bache poka ni mpunda zyitu.”

¹⁹ Po bakabuka kwa songo uwa bambombo aba Yosefu munyumba yila nukunena nawe pamulyango,

²⁰ bakamubuzya bakati, “Wee mwene wane, tukizapo pabwandilo pakughula ichakulya.

²¹ Bo twafika pabuzilo ubwakughonapo tukasatula amasaka ghitu, wesi akazyagha indalama zyache zyosi mwisaka lyache; po twiza nazyo sona.

²² Po twiza ni zyamwabo ukuti tughulile, tutakamumanya nayuyo akatubikila indalama zyitu mumasaka.”

²³ Akamula akati, “Mufwase bulo, sona mutakanyilaye. U Chala winyu sona u Chala uwa ghuso weyuyo akabika indalama mumasaka ghinyu; nkapokela indalama zyinyu.” Po akabizila nu Simiyoni.

²⁴ Sona bo umuntu yula abinjizya abantu munyumba iya Yosefu po akabapa amizi ukuti basukusule munyayo zyabo. Bakazipa impunda zyabo ivyakulya.

²⁵ Bakamuyanizizya u Yosefu ivyabupi ukuti bamupe pamusanya, pachifukwa ichakuti bakivwa ukuti akwiza pakulya nabo ichakulya pamusanya kulakula.

²⁶ Bo u Yosefu afika munyumba bakiza ni vyabupi munyumba vivyo bakaba navyo, po bakafughamila.

²⁷ Akabalamukizya nukubalalusya ukuti, “Ughuso ali akiza, umuntu umughosi? Nkimba achili mumi?”

²⁸ Bakamwamula bakati, “Uwambombo wako utata witu ali akiza, sona achili mumi.” Bakinama nukumuchindika.

²⁹ Po akatalankannya nukumwennya uwamwabo u Benjamini, umwana uwa nyina nukulalusya ukuti, “Nkimba uyu weyuyo muzuna winyu umunandi nkani, yuyo mukambuzya? Mwana wane, u Chala abanje ni chisa papako!”

³⁰ U Yosefu akepapo umwakusita kumanyikwa akiza pakuti akizula ni chitima. Akinjila muchipinda ichinji mumo akalililaghamo.

³¹ Po akasukusula kumaso nukufumila kuzi, akijimbilizya umwakuti nayumo umuntu atakazimanye ukuti ichitima chimulemite akati, “Mungiza ni chakulya.”

³² Bakamupa ichakulya pamwene, na bope pabene, sona bope aba Ijiputi babo bakalyanga nawe pabene, pachifukwa ichakuti aba Ijiputi batakaba bakuti bangalya naba Hebeli, pakuti chikaba chintu chamwiko.

³³ Po u Yosefu akabikazya abawamwabo pantazi papache, ukuyana ni nyiho zyabo, ukwandila usongo mupaka nukufika ku munandi nkani, po bakaswigha nkani.

³⁴ U Yosefu akabalamula abambombo bache ukuti bamusendele umuntu wesi ichakulya pitebulo lyache, loli ichakulya icha Benjamini chikaba ka fayivi ubukulu ukuchila abamwabo. Po bakalya nukung'wela poka nu Yosefu umwakuhoboka nkani nawe.