Ubwandilo 41 - IBAYIBOLO 2024

U Yosefu akung'anamula ivilota ivya Falabo

¹ Bo ghachilapo amaka mabili, u Falabo akalota ukuti imite mulubazu umwalusoko ulwa Nayilo.

² Ing'ombe seveni, inyine nkani zikazubuka mulusoko mula nukwanda pakulya isote ilya muntete.

³ Pisinda pache ing'ombe izyamwabo seveni, ingande nkani, zikazubuka mulusoko lula, po zikima mulubazu ulwa lusoko palubazu ni zyamwabo zila.

⁴ Po ing'ombe ingande zila zikamila izyamwabo inyine inyiza zila. Bo zinizi zyabombiwa u Falabo akalamusya mutulo.

⁵ Akaghona sona utulo nukulota ichilota ichabubili, muchilota chache akennya imitu iya malezi seveni yelite pilezi lyoka.

⁶ Pisinda pache akennya sona imitu iya malezi seveni yelite pilezi lyoka imighande, yiyo yikababuka ni mpepo iyakubufumilo bwizuba.

⁷ Imitu iya malezi imibabuke yila yikamila imitu iya malezi inyiza. Po u Falabo akalamusya mutulo nukwagha ukuti akulota bulo.

⁸ Bo kwacha pandabindabi akayimba nkani mumoyo wache umwakuti akabitizya abantu abamayele bosi, sona na bantu abamahala aba mu Ijiputi. Bo bosi biza, u Falabo akababuzya nizya vilota vyache, loli atakabapo nayumoyumo yuyo akaving'anamula ivilota vyache.

⁹ Po usongo uwakumupa uvinyo yula akamubuzya u Falabo akati, “Ilelo indape imbibi zyane.

¹⁰ U Falabo akabakalalila ababombi bache, nukunyighalila mujele poka nu wakupiya ivibama munyumba iya songo iya balindilili.

¹¹ Ubusiku boka bulabula umuntu pamwene akalota ichilota ni ching'anamulo ichane ni chache.

¹² Munyumba mulamula mukaba umulumendo uwa Chihebeli yuyo akaba wambombo uwa songo uwa balindilili, sona bo twamubuzya ivilota vyitu akatung'anamulila, pakutubuzya iching'anamulo icha chilota icha uyu pamwene na pamwene.

¹³ Po ivintu vikabombiwa umwakuyana bulo ngati mumo akang'anamulila, nkanyokela pambombo yane, sona wepe uwakupiya ivibama akapayikiwa.”

¹⁴ U Falabo akatuma ukuti bamwitizizye u Yosefu, po bakamufumya lubilolubilo mujele mula. Bo amwa akiza isisi nukuvwala amenda amiza, akiza pamaso pa mwene.

¹⁵ U Falabo akamubuzya u Yosefu akati, “Nalotite chilota, loli atalipo nayumo umuntu yuyo angang'anamulila. Loli nivuye ukuti awe nanti wivwa ichilota ungang'anamulila.”

¹⁶ U Yosefu akamwamula akati, “Awe te nene, loli u Chala weyuyo angamupa u Falabo ilyamulo lilyo akulilonda.”

¹⁷ Po u Falabo akamubuzya u Yosefu akati, “Muchilota chane nkalota nimiliye palubazu palusoko ulwa Nayilo,

¹⁸ Po akabalilo kalakala nkennya ing'ombe inyine seveni zikuzubuka mulusoko nukwanda pakulya isote ilya muntete.

¹⁹ Po pisinda pache zikazubuka sona ing'ombe seveni zizyo zikaghanda nkani sona zikaba mafupa ghene zizyo ntazibonye nalumo muchisu icha Ijiputi.

²⁰ Ing'ombe ingande zikamila ing'ombe inyine.

²¹ Loli napapo ing'ombe ingande zikamila ing'ombe inyine zila, patakabapo nayumo umuntu uwakuti angamanya ukuti ing'ombe zila zyanduka mukabonekele. Po nkalamusya mutulo.

²² “Nane bulo muchilota chane nkalota imitu iya malezi seveni, yiyo yikela akiza nkani nukutona, yimelite pilezi lyoka.

²³ Pisinda pache pakamela sona imitu iya malezi imighande seveni yiyo yikababuka ni mpepo iyakubufumilo bwizuba.

²⁴ Imitu imighande iya malezi yikamila imitu inyine akiza yila. Po nkababuzya abantu abamayele bala, loli atakabapo nayumo umuntu uwakuti angang'anamulila ivilota vyane.”

²⁵ Po u Yosefu akamubuzya u Falabo akati, “Ivilota vibili ivya Falabo vikung'anamula ichintu choka; u Chala amuvumbulila u Falabo zizyo akwiza pakubomba.

²⁶ Ing'ombe seveni inyine, maka seveni, sona imitu iya malezi yiyo yikela akiza, maka seveni, ichilota chili choka.

²⁷ Ing'ombe ingande seveni zizyo zikazubuka mumizi pisinda pache maka seveni, sona imitu seveni yiyo yitakela akiza nukubabuka ni mpepo. Pakaba amaka seveni agha zala.

²⁸ “Zili ngati mumo namubuzizya u Falabo zizyo u Chala akwiza pakubomba.

²⁹ Kukwiza pakuba amaka seveni agha vyakulya ivyinji nkani muchisu chosi icha Ijiputi,

³⁰ loli pisinda pache kukwiza pakuwa izala amaka seveni. Po ivyakulya vyosi ivyinji vivyo bakaba navyo muchisu icha Ijiputi mukwiza pakuviluvya pakuti izala yikwiza pakuchiyivya ichisu chosi icha Ijiputi.

³¹ Amaka ghosi agha vyakulya ivyinji muchisu icha Ijiputi mukwiza pakughaluvya pakuti izala yiyo yikwiza pakubawila sona yikwiza pakuba yakoghofya nkani.

³² Pakulota ivilota akabubili kukung'anamula ukuti ichintu ichi chikabatikiwa nu Chala, sona u Chala akwiza pakuchibomba lunulu.

³³ “Polelo awe Falabo sala umuntu yuyo avimenye ivintu sona uwamahala, umupe ubulaghili muchisu chosi icha Ijiputi.

³⁴ Usale sona abantu abasongo ukuti babunganike ichigaba choka pa vigaba vyosi fayivi ivya nyinulo iya mu Ijiputi pamaka ghosi seveni ghala agha vyakulya ivyinji.

³⁵ Ubitikizye ukuti babunganike ivyakulya vyosi ivya maka amiza ghagho ghakwiza, sona ubalamule ukuti basunge ivyakulya ivi mutwaya utukulu nkani nukuvilindilila.

³⁶ Ivyakulya vila vibanje vyakulya pakabalilo aka zala kako kakwiza mumaka seveni mu Ijiputi, umwakuti abantu batakazimile nizala.”

³⁷ Ulubatiko lulo u Yosefu akasakizya lukaba akiza kwa Falabo, poka na makambala ghache ghosi.

³⁸ Po u Falabo akabalalusya akati, “Nkimba tungamwagha yumo yuyo ayanite nu muntu uyu, yuyo mumwache muli umuzimu uwa Chala?”

³⁹ U Falabo akamubuzya u Yosefu akati, “Pakuti u Chala akuvumbulila vyosi vinivi, patalipo nayumo umuntu yuyo avimenye ivintu ivi, sona uwamahala muchisu ichi ukukuchila.

⁴⁰ Ane nakusala awe ukuti ulaghilaye inyumba yane, sona abantu bane bosi bakwiza pakukwivwila. Loli ichintu chene chicho nkwiza pakukupota chakuti ne mwene.

⁴¹ Ilelo nakusala pakuba we mulaghili uwa chisu chosi icha Ijiputi.”

⁴² U Falabo akavula impete yache iya bumwene mukafingwi kache nukumuvwika u Yosefu mukafingwi kache. Akamuvwika sona inkazo intonte, po akamuvwika sona akamunyololo aka golide musingo.

⁴³ Po akamukwezya mungolo yache iyabubili iya bumwene, sona bope abalindilili bache bakanda pakukolomoka pakumwiputa pantazi pangolo yila ukuti, “Mumwivwilaye yunuyu! Mumwivwilaye yunuyu!” Po bunubu u Yosefu akimikiwa pakuba mulaghili uwa chisu chosi icha Ijiputi.

⁴⁴ Po U Falabo akamubuzya u Yosefu akati, “Napapo ne mwene, atalipo nayumoyumo umuntu muchisu icha Ijiputi uwakuti abombe ichintu chimo bo utamwitikizizye.”

⁴⁵ Palapala u Falabo akamwita ukuti we Zefanati Paneya, po akamupa u Asenati pakuba muchi wache, umwana umulindu uwa Potifela, umuputi uwa muchisu icha Oni. Po u Yosefu akanda pakulamula ichisu chosi icha Ijiputi.

⁴⁶ U Yosefu akaba na maka 30 pakabalilo kako akanda pakumubombela u Falabo. Po akendela ichisu chosi chila.

⁴⁷ Mumaka seveni agha vyakulya ivyinji, ichisu chikinula ivyakulya ivyinji nkani.

⁴⁸ U Yosefu akabunganika ivyakulya mumaka ghosi seveni ghala agha vyakulya ivyinji nukuvisunga mutwaya utukulu nkani. Mukaya kosi akakulu nkani mukaba intamba izya vyakulya ivya mumaghunda aghakukazyungulila akaya akakulu nkani kala.

⁴⁹ U Yosefu akasunga ivyakulya ivyinji nkani ngati musesenga uwa munyanja; ivyakulya vikaba vyinji nkani umwakuti bakaleka nukupima bulo, pachifukwa icha bwinji.

⁵⁰ Bo amaka ghala seveni ghatafikite, u Asenati akamupapila u Yosefu abana abalumendo babili.

⁵¹ U Yosefu akamwita umwana wache usongo ukuti we Manase, pakuti akati, “U Chala weyuyo anyavwa ukuti induvye intamyo zyane zyosi izya munyumba iya tata wane.”

⁵² Umwana wache uwabubili akamwita ukuti we Efulayimu, po akati sona, “U Chala ampa abana muchisu chane icha mayimba.”

⁵³ Amaka seveni agha vintu ivyinji ghakamala mu Ijiputi,

⁵⁴ amaka seveni agha zala ghakafika, ukuyana namumo u Yosefu akanenela. Mukawa izala muvyisu vyosi ivyamwabo, loli muchisu chosi icha Ijiputi mukaba ichakulya.

⁵⁵ Bo izala yawa muchisu chosi icha Ijiputi, abantu bakamulilila u Falabo ukuti abape ichakulya. Po u Falabo akababuzya abantu bosi aba mu Ijiputi akati, “Bukagha kwa Yosefu, sona mumwivwilaye zyosi zizyo akubabuzya.”

⁵⁶ Bo izala yawa muchisu chosi icha Ijiputi, u Yosefu akighula intamba nukwanda pakubaghulizizya ivyakulya, pachifukwa ichakuti kukawa nkani izala muchisu chosi chila.

⁵⁷ Ivyisu vyosi vikizagha mu Ijiputi pakughula ivyakulya kwa Yosefu, pachifukwa ichakuti izala yikawa muchisu chosi ichapasi.