Ubwandilo 40 - IBAYIBOLO 2024

U Yosefu akung'anamula ivilota ivya bakayidi

¹ Bo pachilapo akabalilo, uwakumupa uvinyo nu wakupiya ivibama bakamunangila u mwene wabo uwamu Ijiputi.

² U Falabo akaghakalalila nkani amakambala ghache mabili ghala, uwakumupa uvinyo, sona nu wakupiya ivibama.

³ Akabighalila mujela nukubabika munyobe izya musilikali usongo yuyo akalindililagha kunyumba iya mwene yula, mujela mumo u Yosefu akasungiwa.

⁴ Usongo uwa balindilili bala akababika munyobe izya Yosefu ukuti abenelezyanje abantu babili bala. Bakikalamo akabalilo akatali nkani.

⁵ Isiku limo mujele mulamula abantu babili bala, uwakumupa uvinyo nu wakupiya ivibama bakalota ivilota. Wesi akalota ichilota icha ching'anamulo ichakulekanalekana.

⁶ Pandabindabi bo u Yosefu iza pakubennya, akabennya ukuti ivyeni vyabo vyandukite.

⁷ Akabalalusya akati, “Nkimba choni chicho muli ni chitima?”

⁸ Bakamwamula bakati, “Twebosi tulotite ivilota, loli atalipo nayumo yuyo angaving'anamula ivilota vila.” Po u Yosefu akababuzya akati, “We Chala mwene yuyo angaving'anamula ivilota.”

⁹ Po usongo uwakumupa uvinyo akanda pakumulingannya ichilota chache ukuti, “Nkalota ukuti ikwi ilya mampesya lili pantazi papane,

¹⁰ loli likaba ni samba zitatu. Bo lyalemba bulo amani, ubwezya bukaboneka, pisinda pache pakaboneka amampesya amatonu.

¹¹ Ulubako ulwa Falabo lukaba munyobe yane, po nkasenda amampesya nukufinyila mulubako lula nukumupa u Falabo.”

¹² Po u Yosefu akamwamula akati, “Ichi cho ching'anamulo icha chilota chako: Isamba zitatu zila gho masiku matatu.

¹³ Bo ghachilapo amasiku matatu u Falabo akwiza pakukufumyamo muno, akwiza pakukuhobokela, sona nukukunyosezya pambombo yako. Ukwiza pakumupa ulubako lwache ngati mumo ukabombelagha kwisinda uko.

¹⁴ Loli bo vyosi vyanda pakukwendela akiza ukankumbuke. Nalamba umpelele ichisa pakuntambula kabilikabili kwa Falabo umwakuti infume mujele muno.

¹⁵ Pakuti naloli nkibiwa muchisu icha ba Hebeli, sona na kuno bulo intanangitepo nachimo ichakuti banyighalile nacho mujele.”

¹⁶ Bo uwakupiya ivibama yula ennya ukuti iching'anamulo icha vilota chila chikaba chiza, wepe akamubuzya u Yosefu akati, “Nane bulo nkalota: Inyamuye pamutu ividudunga vitatu ivya vibama.

¹⁷ Muchidudunga ichapamwanya nkani mukaba ivyakulya ivya Falabo ivyakulekanalekana, loli iviyuni vikalyanga ivyakulya vila.”

¹⁸ Po u Yosefu akamwamula akati, “Ichi cho ching'anamulo icha chilota chako: Ividudunga vitatu vila gho masiku matatu.

¹⁹ Bo ghachilapo amasiku matatu u Falabo akwiza pakukufumya muno, sona akwiza pakukudumula umutu wako. Umuvimba wako akwiza pakughupayika pikwi, sona iviyuni vikwiza pakughulya.”

²⁰ Naloli bo ghachilapo amasiku matatu pakaba ulusekelo ulwakupapiwa ukwa Falabo, po u Falabo akaghitizya amakambala ghache ghosi. Akamufumya mujele uwakumupa uvinyo nu wakupiya ivibama yula nukubimika pamaso pa makambala ghache.

²¹ U Falabo akamunyosezya pambombo yache uwakumupa uvinyo yula.

²² Loli uwakupiya ivibama yula akamupayika pikwi ukuyana namumo u Yosefu akanenela, bo akusanusya ivilota vyabo vila.

²³ Loli uwakumupa uvinyo u mwene yula atakamukumbuka u Yosefu nukumuluvizya zila.