Ubwandilo 4 - IBAYIBOLO 2024

U Kayini nu Abeli

¹ Po u Adamu akamumanya umuchi wache u Eva, po umuchi wache akamela ulwanda. Akapapa umwana umulumendo po akati, “Nu bwavwilizi ubwa Mwene napokela umwana umulumendo.” Po akamwita ukuti we Kayini.

² Pisinda pache akapapa sona umwana umulumendo yuyo akamwita ukuti we Abeli. U Abeli akaba mudimi, loli u Kayini akaba mulimi.

³ Bo pachilapo akabalilo u Kayini akasenda inyinulo yache panandi nukuvibika kwa Mwene ukuti chibanje chakwiyipa.

⁴ Po u Abeli wepe akasenda umwana uwa ng'ozi uwakwanda pakupapiwa, akamughogha nukusala ivigaba ivyiza nkani nukuvibika kwa Mwene ukuti chibanje chakwiyipa. U Mwene akahoboka nkani nu Abeli nukupokela ichakwiyipa chache.

⁵ Loli u Mwene atakahoboka nu Kayini, po atakapokela ichakwiyipa chache. Pachifukwa chinichi u Kayini akakalala nkani nukusiluka icheni chache.

⁶ Po u Mwene akamulalusya u Kayini akati, “Nkimba choni chicho wakalala? Nkimba choni chicho icheni chako chisilukite?

⁷ Nanti ukabombagha chicho chiza, nkimba ngali intakahoboka nawe? Loli pachifukwa ichakuti wabomba ichintu ichibibi, imbibi yinyonyotaye pamulyango ngati chinyamana ichikali. Yikulonda ukuti yikuleme, loli awe uyipotaye.”

⁸ Po u Kayini akamubuzya umuzuna wache u Abeli akati, “Twende kumughunda.” Bo bali kumughunda, u Kayini akamusambukila umuzuna wache u Abeli nukumughogha.

⁹ U Mwene akamulalusya u Kayini akati, “Nkimba umuzuna wako u Abeli ali ko kwiyi?” U Kayini akamula akati, “Ntamenyeko kuko ali. Fwandi yo mbombo yane iyakumusungilila umuzuna wane?”

¹⁰ Po u Mwene akamulalusya sona u Kayini akati, “Nkimba choni chicho wabomba ichintu ichakoghofya ichi? Ibanda ilya muzuna wako likundilila mwitope.

¹¹ Ilelo waghuniwa, utakwiza pakulima sona mwitope, lilyo lyang'wela ibanda ilya muzuna wako, lilyo wakupula ni nyobe zyako.

¹² Nanti ukuyezya pakupesa imbeyu, itope litakwiza pakumezya nalumo imbeyu. Ukwiza pakuba muntu uwakwendakwenda bulo, sona nu musita kwikalana pachisu ichapasi.”

¹³ U Kayini akamubuzya u Mwene akati, “Ulufundo ulu lwachila amaka ghane.

¹⁴ Ilelo ukunchimbizyamo muchisu ichi sona ukunyefya pamaso papako. Nkwiza pakuba muntu uwakwendakwenda bulo, sona nu musita kwikalana pachisu ichapasi. Umuntu wesi yuyo akunyagha, akwiza pakungogha.”

¹⁵ Po u Mwene akamwamula akati, “Awe, nanti umuntu yumo akumughogha u Kayini, abantu seveni bakwiza pakughoghiwa umwakutanizyapo.” U Mwene akabika ichimanyilo pa Kayini pakumusoka umuntu wesi yuyo akomana nu Kayini ukuti atakamughoghe.

¹⁶ Po u Kayini akepapo pamaso pa Mwene nukubuka pakwikala muchisu icha Nodi chicho chili kubufumilo bwizuba ubwa mughunda uwa Edeni.

Abaluko ulwa Kayini

¹⁷ U Kayini akamumanya umuchi wache, po umuchi wache akamela ulwanda nukupapa umwana umulumendo yuyo akamwita ukuti we Enoki. Pisinda pache u Kayini akazenga akaya akakulu nkani nukukita itabwa ilya mwana wache u Enoki yula.

¹⁸ U Enoki akapapa umwana umulumendo yuyo akamwita ukuti we Iladi. U Iladi akapapa u Mehuyayeli. U Mehuyayeli akapapa u Metushayeli, sona u Metushayeli akapapa u Lameki.

¹⁹ U Lameki akasenda abakolo babili, usongo akaba we Ada, po umunandi akaba we Zila.

²⁰ U Ada akapapa u Yabali, yuyo akaba munyenya uwa bateka ivitekwa babo bakikalagha muvisakasa.

²¹ Uwamwabo akaba we Yubali, yuyo akaba munyenya uwa bimbi bosi aba vinanda na malongi.

²² U Zila akapapa u Tubali Kayini, yuyo akaba musyani uwa ivibombelo vyosi ivya mukuba nivya chela. Umuyemba uwa Tubali Kayini akaba we Naama.

²³ U Lameki akamubuzya u Ada nu Zila akati, “Mwee bachi bane ivwa kuno: Namughogha umuntu pachifukwa ichakuti akanvulazya.

²⁴ Nanti abantu seveni bakaghoghiwa umwakutanizyapo pachifukwa icha kumughogha u Kayini, kokuti abantu 77 bakwiza pakughoghiwa umwakutanizyapo nanti umuntu yumo angangogha.”

Nizya Seti nu Enoshi

²⁵ Po u Adamu akamumanya sona umuchi wache u Eva, po u Eva akamela ulwanda nukupapa umwana umulumendo. Po akati, “U Chala ampa impyana iya Abeli yuyo akaghoghiwa nu Kayini.” Po akamwita ukuti we Seti.

²⁶ U Seti akapapa umwana umulumendo nukumwita ukuti we Enoshi. Aka kakaba kabalilo kako abantu bakanda pakumwiputa u Mwene.