Ubwandilo 39 - IBAYIBOLO 2024

U Yosefu nu muchi uwa Potifala

¹ Aba Ishimayeli bakamughula u Yosefu nukufika nawe mu Ijiputi nukumughulizya kwa Potifala, weka uwa makambala agha mwene u Falabo yuyo akaba we songo uwa balindilili.

² U Mwene akaba nu Yosefu po akamwavwa ukuti ivintu vyosi vimwendele akiza bulo. Akikalagha munyumba iya Potifala usongo uwamu Ijiputi,

³ yuyo akennya ukuti u Mwene akaba nawe u Yosefu, sona akamusaya muvintu vyosi vivyo akabombagha.

⁴ U Potifala akahoboka nkani nu Yosefu nukumubika pakuba mubombi wache nu mwenelezi uwa nyumba yache poka ni vintu vyosi vivyo akaba navyo.

⁵ Ukwandila panapo u Yosefu akanda pakwenelezya ukatundu wesi uwa Potifala, u Mwene akavisaya vyosi vivyo vikaba kunyumba yache, nivya kumaghunda ghache pachifukwa icha Yosefu.

⁶ Po u Potifala akabika ukatundu wache wesi munyobe izya Yosefu, sona atakapalamaziwapo nachimochimo, loli chene ichakulya chicho akalyanga. U Yosefu akaba mulumendo wakuboneka akiza nkani.

⁷ Bo pachilapo akabalilo, umuchi uwa songo wache akanda pakumunyonywa u Yosefu. Po umukolo yula akamwitizya u Yosefu ukuti aghone nawe.

⁸ Loli u Yosefu akakana nukumubuzya umuchi uwa songo wache ukuti, “Teghelezya, nkimba utazimenye ukuti usongo wane ansubiye pakundekela ukatundu wache? Atakupalamaziwapo nachimochimo chicho chili muno pachifukwa ichakuti indi pano.

⁹ Indi nu bulaghili ubukulu nkani munyumba iyi ukumuchila yuyo, sona atanyimitepo nakamo akantu, loli wewe wemwene. Po zingaba bulibuli ukuti indowe ngati bunubu, sona nukunanga kwa Chala?”

¹⁰ Napapo akamulabagha u Yosefu isiku ni siku ukuti aghonane nawe, atakamwivwila, pamo pakuba poka nawe.

¹¹ Loli isiku limo u Yosefu akinjila munyumba pakubomba imbombo yache, sona patakabapo nayumoyumo uwamwabo uyunji munyumba mula.

¹² Umukolo yula akalema inkazo iya Yosefu nukuti, “Ghona nane.” Loli u Yosefu akafyuntumula nukumuleka alemeleye inkazo munyobe, po akachimbila nukufumila kuzi.

¹³ Bo umuchi uwa Potifala ennya ukuti u Yosefu afyuntumula nukumulekela inkazo yache munyobe, sona nukuti achimbilila kuzi,

¹⁴ akabitizya abambombo abanji munyumba yila nukubabuzya ukuti, “Ennya zizyo umu Hebeli, yuyo umulume wane akiza nawe munyumba muno pakutusamula! Injiye kuchipinda chane ukuti ingone nawe, loli nakolomokite.

¹⁵ Bo ivwa ukuti nakolomoka, andekeye inkazo yache munyobe zyane nukuchimbilila kuzi.”

¹⁶ Po akayisunga inkazo yila mupaka papo usongo wache akizila.

¹⁷ Po akamupangila ukuti, “Uwambombo umu Hebeli yuyo utwiziye nawe pakasi papitu, injiye kuchipinda chane pakunsamula.

¹⁸ Loli bo ivwa ukuti nakolomoka, akandekela inkazo yache nukuchimbilila kuzi.”

¹⁹ Bo usongo wache ivwa zizyo akamubuzya umuchi wache ukuti, “Umu momumo umubombi wako ambombeye,” po akakalala.

²⁰ Panapo na panapo akamusenda u Yosefu nukumwighalila mujele mumo abakayidi abamwene aba mu Ijiputi bakasungiwangamo. Loli bo u Yosefu ali mujele mulamula,

²¹ u Mwene akaba nawe. Akamupelela ichisa umwakuti umulindilili uwa jele akahoboka nawe.

²² Po umulindilili uwa jele akamubika u Yosefu pakuba wakwenelezya abakayidi abanji, poka na vyosi vivyo vikabombiwa mujela mula.

²³ Umulindilili uwa jele yula akazisula imbombo zyosi zizyo u Yosefu akabaghila pakubomba, pachifukwa ichakuti u Mwene akaba nawe, sona ivintu vyache vyosi vikamwendelagha akiza.