Ubwandilo 38 - IBAYIBOLO 2024

Nizya Yuda nu Tamala

¹ Pakabalilo kalakala u Yuda akabaleka abakamu bache nukubuka pakwikala nu Hila umuntu yumo wamu Adulamu.

² Kulakula u Yuda akakomana nu mulindu yumo, umwana uwa Shuwa umu Kenani. Akamusenda pakuba muchi wache.

³ Akakumupapila umwana umulumendo, yuyo akamwita ukuti we Eli.

⁴ Umulindu yula akamela sona ulwanda nukupapa umwana umulumendo, yuyo akamwita ukuti we Onani.

⁵ Akapapa sona umwana umulumendo yuyo bakamwita ukuti we Shela. Bo u Shela apapiwa, u Yuda akaba mu Kezibu.

⁶ U Yuda akamusendela u Tamala, umwana wache ukatote u Eli pakuba muchi wache.

⁷ Loli inkalo iya Eli yikaba mbibi nkani umwakuti yitakamuhobosya u Mwene, po akamughogha.

⁸ U Yuda akamubuzya u Onani akati, “Bukagha pakughonana nu mukoyi wako umwakuti umupapile abana umukulu wako.”

⁹ Loli u Onani akazimanya ukuti abana batakwiza pakuba bache, akabalilo kosi kako akaghonagha nu mukoyi wache, akakupulilagha pasi ubwanavuli bwache, umwakuti atakamupapile abana umukulu wache.

¹⁰ Zizyo akabombagha u Onani zitakamuhobosya u Mwene, po wepe akamughogha.

¹¹ U Yuda akamubuzya u Tamala umulasagha wache yula akati, “Nyokela kwa ghuso, sona utakasendiwe mupaka papo umwana wane u Shela akula.” Akanena zinizi pachifukwa ichakuti akanyilagha ukuti umwana wache angafwa ngati mumo bakafwila abamwabo. Po u Tamala akabuka nukwikala munyumba iya wise.

¹² Bo pachilapo akabalilo, umuchi uwa Yuda akafwa. Bo akabalilo akakulilila imfwa iya muchi wache kamala, u Yuda poka nu mumanyani wache u Hila wamu Adulamu bakabuka ku Timuna kuko ing'ozi zyache zikadumuliwanga ameya.

¹³ Umuntu yumo akamubuzya u Tamala ukuti, “Ughusovyala akabuka kwa Timuna pakudumulila ameya ing'ozi zyache.”

¹⁴ Po akavula amenda ghache aghabufwilwe ghala nukuvwala aghanji. Akavwinka icheni chache nu mwenda, nukwikala pamulyango uwa kaya aka Enayimu, akaya kako kakaba mulubazu ulwa musebo waku Timuna. U Tamala akazimanya ukuti pakabalilo aka u Shela akaba ukuti akula, loli akaba achili atapeghiwe pakuba mulume wache.

¹⁵ Bo u Yuda amwennya akamwinong'onela ngati po we malaya, pakuti akavwinka icheni chache.

¹⁶ U Yuda akabuka kulubazu ulwa musebo kuko u Tamala akaba nukuti, “Buli unganyitikizya ukuti ingone nawe.” Pakuti u Yuda atakazimanya ukuti akaba mulasagha wache. Umukolo yula akamulalusya akati, “Nkimba ukwiza pakumpa ichoni nanti naghonana nawe?”

¹⁷ U Yuda akamwamula akati, “Nkwiza pakukutumila umwana uwa mbuzi pamudimo wane.” Po akamulalusya sona akati, “Nkimba ukwiza pakumpa ichoni pakuba chikole, mupaka papo wantumila umwana uwa mbuzi?”

¹⁸ U Yuda akamulalusya akati, “Nkimba ukulonda chikole choni?” U Tamala akamwamula akati, “Ungampa impete nu lupote poka ni ndisa yako yiyo unyamuye.” U Yuda akamupa ivintu vyosi vila nukubuka pakughona nawe, po u Tamala akamela ulwanda.

¹⁹ U Tamala akabwela nukwefya umwenda ghugho akavwinka nagho icheni chache nukuvwala sona amenda ghache aghabufwilwe.

²⁰ U Yuda akamutuma umumanyani wache u Hila nu mwana uwa mbuzi yula pakumupa umukolo yula ukuti amunyosezye ivikole vyache vivyo akapokela. Loli umumanyani wache u Hila atakamwaghapo umukolo yula.

²¹ Akabalalusya abantu babo bakaba palapala akati, “Nkimba ali ko kwiyi umalaya yuyo akaba mulubazu ulwa musebo?” Abantu bala bakamwamula bakati, “Awe, patikayepo nalumolumo umalaya pabuzilo ubu.”

²² Po Hila akanyokela kwa Yuda nukumubuzya ukuti, “Ntamwaghapo umukolo yula, sona bope abantu kulakula bambuzya ukuti, ‘Patikayepo nalumolumo umalaya palapala.’ ”

²³ U Yuda akamula akati, “Muleke asende ivintu vyane pakuba vyache, lumo abantu bangatuseka. Ennya namutumiye umwana uwa mbuzi, napapo utakamwaghapo umukolo yula.”

²⁴ Bo pachilapo amezi matatu u Yuda akivwa ukuti, “Umulasagha wako u Tamala we malaya, ali nu lwanda.” Panapo na panapo, u Yuda akamulamula ukuti, “Bukagha pakumusenda nukumocha ukuti afwe.”

²⁵ Bo bakumusenda, u Tamala akatuma amazyu kwa wisevyala akati, “Ane indi nu lwanda ulwa mwenecho uwa vintu ivi. Wenelezye nanti ungamumanya umwenecho uwa mpete nu lupote sona ni ndisa iyi.”

²⁶ Bo u Yuda avimanya ivintu vila akati, “Naloli akunena ubwanaloli. Nene nkamunangila pakuti intakamupa umwana wane u Shela pakuba mulume wache.” Po u Yuda atakaghona nawe sona umukolo yula.

²⁷ Bo akabalilo kakwana akakuti u Tamala asayiwe, zikaghiwa ukuti akwiza pakupapa amapasa.

²⁸ Bo ali pakusayiwa, weka uwa mapasa ghala akafumya inyobe yache kuzi. Umuzamba akayilema, nukuyipinya na kabuzi akachesamu, po akati, “Uyu we wakwanda pakupapiwa.”

²⁹ Loli akayinyosezya mumo inyobe yache, umuzuna yula weyuyo akanda pakupapiwa. Po umuzamba akati, “Umu momumo wafumila kuzi!” Po akamwita ukuti we Pelezi.

³⁰ Pisinda pache umukulu wache akapapiwa na kabuzi akachesamu kunyobe yache, po akamwita ukuti we Zela.