Ubwandilo 37 - IBAYIBOLO 2024

U Yosefu na bawamwabo

¹ U Yakobo akendelela pakwikala muchisu icha Kenani, chicho uwise akikalaghamo.

² Ili lyo lipangwi ilya bamunyumba iya Yakobo: Bo u Yosefu ali na maka 17 akadimagha imbuzi ni ng'ozi poka na bakamu bache, abana aba Biliha, naba Zilipa abachi abanji abawise. Po u Yosefu akabalongelela kwa wise ivintu ivibibi vivyo abakamu bache bala bakabombagha.

³ U Yakobo akamughana nkani u Yosefu ukuchila abana bache bosi, pachifukwa ichakuti akapapiwa bo u Yakobo mughosi nkani, sona akamusonela inkazo iya nyobe intali.

⁴ Loli bo abawamwabo bennya ukuti amughanite nkani u Yosefu ukubachila abene, bakamubenga, sona batakanena nawe nachimochimo mumutende.

⁵ Isiku limo u Yosefu akalota ichilota, nukubabuzya abawamwabo bache nizya chilota chache chicho akalota, po bakamubenga nkani.

⁶ Akababuzya akati, “Mwebaya mwee, ivwa kuno, ichilota chicho nalotite:

⁷ Twebosi tukaba mumughunda twapinyagha inkose izya ngano. Bo tukuzipinya, inkose yane yikimilila, po inkose zyinyu zikaghuzyungulila, nukuyifughamilila inkose yane yila.”

⁸ Po abawamwabo bala bakamulalusya bakati, “Nkimba ukwinong'ona ukuti ukwiza pakuba we mwene witu? Pamo naloli ukwiza pakutulaghila aswe?” Bunubu bakamubenga nkani ukuchila napo pabwandilo pachifukwa icha chilota chache chila poka na mazyu ghagho akababuzya.

⁹ Po u Yosefu akalota ichilota ichinji nukubabuzya abawamwabo ukuti, “Mwebaya mwee, ivwa kuno, ichilota ichinji, indotite ukuti izuba nu mwezi, sona ni ntondwa 11 zikunfughamilila.”

¹⁰ Akabalilo aka akamubuzya sona nu wise poka na abawamwabo. Po uwise akamuchemela akati, “Nkimba chilota choni chicho walotite? Fwandi, ane nu nyoko poka na bawamwinyu tukwiza pakukufughamilila bati?”

¹¹ Abawamwabo bakanda pakumubikila akabini akakulu nkani. Loli uwise akendelela pakwinong'ona.

U Yosefu aghuliziwa pakuba muzya

¹² Isiku limo bo abawamwabo aba Yosefu babuka ku Shekemu pakudima ing'ozi izya wise,

¹³ u Yakobo akamubuzya u Yosefu akati, “abawamwinyu babuka pakudima ing'ozi ku Shekemu. Nkulonda pakukutuma ku Shekemu kuko abawamwinyu bali pakudima ing'ozi.” U Yosefu akamula akati, “Ane indi pano, tata.”

¹⁴ Po uwise akamubuzya akati, “Bukagha wennye abawamwinyu mumo babeleye, sona ni ng'ozi, po wize umbuzye.” Po akamutuma ukufuma kwikombe ilya Hebuloni. Bo afika mu Shekemu,

¹⁵ umuntu yumo akamwagha akwendakwenda bulo mumaghunda kulakula, po umuntu yula akamulalusya akati, “Nkimba ukulonda ichoni?”

¹⁶ U Yosefu akamwamula akati, “Indi pakulonda abawamwitu, sontezye kuko bali.”

¹⁷ Umuntu yula akamwamula akati, “Bepako kuno. Nkabivwa bulo bakuti bakubuka ku Dotani.” Po Yosefu akabakonka abakamu bache nukubagha ku Dotani kulakula.

¹⁸ Abawamwabo bala bakamwenezyapo pabutali bo achili nkani nukuti afike papipi nabo. Bakanda pakubatika ukuti bamughoghe.

¹⁹ Bakanenezyannya bakati, “Unavilota uyo akwiza!

²⁰ Zagha tumughoghe, umuvimba wache tughusumbile muchiliba, po tukwiza pakunena ukuti ichinyamana chamulema, po tukwiza pakwennye ukuti ichilota chache chikung'anamula ichoni.”

²¹ Loli bo u Lubeni ivwa zinizi akayezya pakumwimila u Yosefu nukuti, “Tutakamughoghe.

²² Mutakunyila ibanda nalimolimo, loli mumusumbile muchiliba ichi chicho chili munkolongo tutakamuvulazye napo panandi.” Akanena zinizi bo akubatika ukuti amupoke munyobe zyabo nukumutuma kwa wise.

²³ Bo u Yosefu afika ku bakamu bache bala, abene bakamuvula inkazo yache yila.

²⁴ Bakamusenda nukumutaghila muchiliba, chicho chitakaba na mizi.

²⁵ Bo bakwikala pasi ukuti balye ichakulya chabo, bakennya akabukatila aka baghulizi abaluko ulwa Ishimayeli kafuma ku Giliyadi nukubuka ku Ijiputi. Ingamila zyabo zikanyamula utwakunonezya ivyakulya na mafuta agha ikwi ilya balimu sona nagha mule pabulendo bwabo ubwa ku Ijiputi.

²⁶ U Yuda akabalalusya abawamwabo akati, “Nkimba tukwiza pakukabapo ichoni nanti twamughogha uwamwitu nukughufisa umuvimba wache?

²⁷ Aswe zagha tumughulizye ku bantu aba mu Ishimayeli. Nkimba wepe te we wamwitu, umubili ghoka, sona ibanda lyoka?” Abawamwabo bala bakitikizya zinizi.

²⁸ Bo abaghulizi aba ku Midiyani biza palapala, abawamwabo bakamufumizya kuzi u Yosefu nukumughulizya kwa Ishimayeli ni ndalama izya siliva izyakukwana 20, po bakabuka nawe ku Ijiputi.

²⁹ Bo u Lubeni apyanila kuchiliba chila nukwennya ukuti u Yosefu atalimo, akazepulannya amenda ghache pachifukwa icha chitima.

³⁰ Akanyokela ku bawamwabo bala nukubabuzya ukuti, “Umulumendo yula atalimo! Nkimba ningabomba ichoni?”

³¹ Po bakaghogha imbuzi nukuzubika inkazo iya Yosefu mwibanda lyache.

³² Bakasenda inkazo yila nukubuka nayo kwa wise, nukuti, “Tata, ennya inkazo iyi lumo yingaba ya mwana wako yula?”

³³ U Yakobo akayimanya inkazo yila nukuti, “Naloli inkazo iyi ya mwana wane, ichinyamana chamulya. Naloliloli u Yosefu akavuliwa.”

³⁴ Po u Yakobo akazepulannya amenda ghache, akavwala amasaka nukulila ubufwe ubwa mwana wache amasiku aminji.

³⁵ Abana bache bosi abanavuli na bakolo bakiza pakumupumizya. Loli akakana pakupumiziwa, nukuti, “Awe, nkwiza pakulila mupaka kwipumpa kuko ali.” Po uwise akendelela pakumulila umwana wache u Yosefu.

³⁶ Pakabalilo kalakala abantu aba mu Midiyani bakamughulizya u Yosefu ku Ijiputi kwa Potifala, ikambala ilya Falabo, usongo uwa balindilili.