Ubwandilo 35 - IBAYIBOLO 2024

U Chala akumusaya u Yakobo

¹ U Chala akamubuzya u Yakobo akati, “Nyamuka bukagha ku Beteli nukwikalana kulakula. Kulakula umuzengele ichighemo u Chala yuyo akakubonekela, bo ukumuchimbila umukulu wako u Esabu.”

² Po u Yakobo akababuzya abamunyumba yache, sona na bosi babo bakaba nawe akati, “Tagha utwachala utuyeni tuto muli nato pakasi papinyu. Mwiswefye mwebene, sona muvwalaye amenda aghanji amiza.

³ Tukwiza pakwepamo muno nukubuka ku Beteli, kuko nkwiza pakumuzengela ichighemo u Chala, yuyo akanyavwa muntamyo zyane, sona yuyo akaba nane kosi kuko nkabukagha.”

⁴ Po bakamupa u Yakobo utwachala tosi tuto bakaba nato, sona ni ndelebele zizyo bakavwala. U Yakobo akavifukila pasi muntende mwikwi ilya mupandapanda lilyo likaba papipi nu Shekemu.

⁵ Bo u Yakobo na bana bache bakunyamuka, ubogha ubukulu nkani bukabalema abantu bosi aba mutwaya utwakuzyungulila, umwakuti atakabapo nayumo uwakubakonka.

⁶ U Yakobo na bantu bache bosi bakafika mu Luzi (kokuti Beteli) muchisu icha Kenani.

⁷ Kulakula akazenga ichighemo nukubwita ubuzilo bula ukuti Eli Beteli pachifukwa ichakuti bukaba buzilo bubo u Chala akivumbulila mwene kwa Yakobo, bo akumuchimbila umukulu wache.

⁸ U Debola uwambombo yuyo akamulelagha u Labeka akafwa. Bakamusyila muntende mwikwi ilya mupandapanda mu Beteli mulamula. Po ubuzilo bula bakabwita ukuti Aloni Bakuti.

⁹ U Chala akamubonekela sona u Yakobo, bo abwelako ku Mesopotamiya, po akamusaya.

¹⁰ Po u Chala akamubuzya akati, “Itabwa lyako we Yakobo, loli ukwanda ilelo ukwiza pakwitiziwanga we Izilayeli.” U Chala akamwita ukuti we Izilayeli.

¹¹ U Chala akamubuzya akati, “Ane ne Chala Uwamaka Ghosi. Papa abana abinji, sona inko izya bantu inyinji nkani bakwiza pakufuma mumwako, sona ukwiza pakuba we munyenya uwa bamwene.

¹² Nkwiza pakukupa nawe ichisu chicho nkamupa u Abulahamu nu Yisaki, nukubapa sona abaluko lwako babo bakwiza pisinda papako.”

¹³ Po u Chala akamuleka u Yakobo pabuzilo bubo akanenagha nawe nukubuka.

¹⁴ Po u Yakobo akimikapo ibwe pakuba chikumbusyo pabuzilo bubo akanena nawe. Akalipaghula pakulipungulila uvinyo na mafuta agha misyunguti.

¹⁵ Po u Yakobo akabwita ubuzilo bubo u Chala akanenagha nawe ukuti Beteli.

Ubufwe ubwa Lakelo

¹⁶ Pisinda pache u Yakobo na bamunyumba yache bakepamo mu Beteli. Loli bo bakupalamila kukaya aka Efulati, akabalilo akakuti u Lakelo asayiwe kakakwana, sona akatamiwa nkani ni mpapo yache.

¹⁷ Po bo ali pakutamiwa nu bubavu ubwa kupapa, umuzamba akamubuzya akati, “Wee Lakelo, utakanyilaye pakuti uyu we mwana umulumendo uyunji.”

¹⁸ Sona bo umuzimu wache akubuka pakuti akafwa, akamwita umwana wache ukuti we Benoni, loli uwise akamwita ukuti we Benjamini.

¹⁹ Bo u Lakelo afwa, akasyiliwa mulubazu ulwa zila iyakubukila ku Efulati kokuti Betelehemu.

²⁰ Po u Yakobo akimikapo ibwe pipumpa ilya Lakelo pakuba chikumbusyo. Nilelo bulo ibwe lila lichili lilipo.

²¹ U Yakobo akendelela nu bulendo bwache, nukuzenga ivisakasa vyache kulubazu ulunji ulwa chitembe icha Edeli.

Abana aba Yakobo

²² Bo u Yakobo akwikala muchisu chilachila, u Lubeni akaghona nu Biliha umuchi umuzya uwa wise. Po u Yakobo akazyivwa zinizi. U Yakobo akaba na bana abalumendo 12.

²³ Abana aba Leya bo aba: U Lubeni ukatote uwa Yakobo nu Simiyoni nu Levi nu Yuda nu Isakala nu Zebuloni.

²⁴ Abana aba Lakelo bo aba: U Yosefu nu Benjamini.

²⁵ Abana aba Biliha, uwambombo umukolo uwa Lakelo bo aba: U Dani nu Nafutali.

²⁶ Abana aba Zilipa, uwambombo umukolo uwa Leya bo aba: U Gadi sona nu Asheli. Banaba bakaba bana aba Yakobo babo bakapapiliwa muchisu icha Mesopotamiya.

Ubufwe ubwa Yisaki

²⁷ U Yakobo akabuka kwa wise u Yisaki ku Mamule, papipi nu Kiliyati Aliba (kokuti Hebuloni), kuko u Abulahamu nu Yisaki bakikalagha kale

²⁸ U Yisaki akafwa, bo ali na maka 180.

²⁹ Po akafwa nukubikiwa mwipumpa bo mughosi nkani. Po abana bache u Esabu nu Yakobo bakamusyila.