Ubwandilo 34 - IBAYIBOLO 2024

Ukulemiwa pamaka ukwa Dina

¹ Isiku limo u Dina umwana uwa Leya nu Yakobo akabuka pakubendela abakolo aba muchisu icha Kenani.

² Bo u Shekemu umwana uwa Hamoli umu Hivi, yuyo akaba we mwene uwa chigaba chilachila, amwennya, akumulema pamaka nukumusamula.

³ Umoyo uwa Shekemu ghukamughana nkani u Dina umwana uwa Yakobo yula, umwakuti akayezya nkani pakumudeba.

⁴ Po u Shekemu akamubuzya uwise u Hamoli akati, “Unyimalile umulindu uyu ukuti imusende pakuba muchi wane.”

⁵ U Yakobo akwivwa ukuti umwana wache u Dina bamulema pamaka, loli pakuti abana bache abalumendo bakaba pakudima ivitekwa vyache, atakabombapo nachimochimo mupaka bakabwelako.

⁶ U Hamoli uwise uwa Shekemu akabuka kwa Yakobo ukuti banenezannye pafundo yiniyi.

⁷ Pakabalilo kalakala abana aba Yakobo bakabwelako kuludimo kula. Bo abana bala bivwa zizyo zikabombiwa bakakalala nkani pachifukwa ichakuti u Shekemu akabomba ichintu ichamusamu nkani mu Izilayeli pakumulema pamaka umwana uwa Yakobo.

⁸ Loli u Hamoli akamubuzya akati, “Umwana wane u Shekemu umoyo wache ghumughanite nkani umwana winyu umulindu. Nalamba mumwitikizye pakuba muchi wache.

⁹ Zagha twivwane namwe ukuti pakwiza pakuba ukusendelana pakasi papinyu na papitu.

¹⁰ Mwikalaye poka naswe muchisu chitu ichi. Mungikalana posi papo mukulonda, ikala bulo umwakufwasa, mughulizyanje nukughula munumu, sona mwe babuke pakuba nu buzilo ubwinyu nu bwinyu.”

¹¹ Po wepe u Shekemu akamubuzya uwise uwa Dina na bayemba akati, “Munhobokele, nkwiza pakubapa chosi chicho mukulonda.

¹² Mumpimile ivyuma, sona na mosi mumo vingabela ubwinji nkwiza pakwimala pene papo mwanyitikizya ukuti imusende umwana winyu pakuba muchi wane.”

¹³ Abana aba Yakobo bakamuzimbula u Shekemu poka nu wise u Hamoli pachifukwa ichakumunyazya umuyemba wabo pakumwamula ukuti,

¹⁴ “Chitangabombiwa ukuti tumupe umuyemba witu pakuba muchi uwa umuntu yuyo atasilimuliwe, pakuti cho chintu chakukozya isoni kukwitu.

¹⁵ Tungitika pene papo nanti amwe na bantu abanji mumwinyu basilimuliwa.

¹⁶ Po tukwiza pakubapa abayemba bitu po naswe tukwiza pakusenda abana binyu abalindu. Polelo tukwiza pakwikala pakasi papinyu nukuba bantu boka namwe.

¹⁷ Loli nanti mutakwitikizya pakusilimuliwa, tukwiza pakumusenda umuyemba witu nukubuka nawe.”

¹⁸ Amazyu ghanagha ghakamuhobosya nkani u Hamoli nu mwana wache u Shekemu.

¹⁹ Po umulumendo yula, umwalubilolubilo akabomba vyosi vivyo vikalondiwanga, pakuti akamughana nkani umwana uwa Yakobo yula. U Shekemu akaba mwana muchindikiwa nkani munyumba iya wise.

²⁰ Po u Hamoli nu mwana wache u Shekemu bakabuka kulukomano pamulyango uwa kaya kala pakunenezannya na bakamu babo.

²¹ Bakati, “Abantu aba bamanyani bitu, baleke bikalaye muchisu chitu ichi, sona baghulaye nukughulizya mumo pakuti ichisu chitu ichi buzilo bukulu nkani. Tungasenda abana babo, sona bope bangasenda abana bitu.

²² Loli abantu aba bakwiza pakwitikizya ukwikala naswe nukwikalana pakasi papitu, nanti abana bitu abalumendo bangasilimuliwa ngati mumo abenecho babeleye.

²³ Nkimba te kokuti ing'ombe zyabo nu katundu wabo, sona ni vitekwa vyabo vyosi vikwiza pakuba vyitu? Polelo tubitikizye ukuti bikalaye pakasi papitu.”

²⁴ Abantu bosi aba mukaya akakulu nkani kala bakitinkana nu Hamoli, poka nu mwana wache u Shekemu, po umwana wesi umulumendo mukaya akakulu nkani kala akasilimuliwa.

²⁵ Bo ghachilapo amasiku matatu, bo ni vilonda ivyakusilimuliwa vichili vikubaba, abana babili aba Yakobo, u Simiyoni nu Levi abayemba aba Dina, bakasenda upanga nukwinjila mukaya akakulu nkani kala umwakusita kumanyikwa nukughogha abanavuli bosi.

²⁶ Bakamughogha u Hamoli poka nu mwana wache u Shekemu Po bakamwefyamo u Dina munyumba iya Shekemu po bakabuka.

²⁷ Abana abanji aba Yakobo bakabuka pabantu babo bakabaghogha bala nukunangannya akaya kosi pakutanizya ukulemiwa pamaka ukwa muyemba.

²⁸ Bakafyula ing'ozi ni mbuzi ni mpunda, na vyosi vivyo vikaba mukaya akakulu nkani kala, sona na vyosi ivya mumaghunda.

²⁹ Bakasenda ukatundu wesi nukubalema abakolo na bana, poka na vyosi vivyo vikaba munyumba zyabo.

³⁰ U Yakobo akamubuzya u Simiyoni nu Levi akati, “Awe mwampalaghulila intamyo. Aba Kenani naba Pelezi bosi bakwiza. Aswe tute twe binji, po nanti babungana pakulwa naswe bakwiza pakungogha ane na bamunyumba yane bosi, twebosi tukwiza pakughoghiwa.”

³¹ Loli bakamwamula bakati, “Tutangitikizya ukuti umuyemba witu abanje ngati po we malaya.”