Ubwandilo 33 - IBAYIBOLO 2024

U Yakobo akukomana nu Esabu

¹ Bo u Yakobo atalankannya, akamwennya u Esabu akwiza na bantu 400. Po abana bamo akamugabila u Leya, abanji akamugabila u Lakelo sona abanji akabagabila abambombo abalindu babili bala.

² Akabalongolezya abalindu abambombo bache poka na bana babo, po akonka umuchi u Leya na bana bache, pisinda pache pakonka umuchi u Lakelo nu Yosefu.

³ Po u Yakobo umwene akalongolela kuntazi nukufughama akaseveni bo akumupalamila umukulu wache u Esabu.

⁴ Loli u Esabu akachimbila pakukomana nawe akamukumbatila nukumukukila. Abantu bosi babili aba bakalilagha.

⁵ Bo u Esabu akutalankannya, akennya abakolo babili poka na bana. Po akabalalusya akati, “Nkimba abantu banaba bawenu?” U Yakobo akamwamula akati, “Banaba bo bana babo u Chala muchisa chache ampiye.”

⁶ Po abambombo abalindu babili bala na bana babo bakiza pantazi papache nukumufughamilila.

⁷ Pisinda pache wepe u Leya na bana bache, bakamufughamilila. Pabumalilo u Yosefu nu Lakelo bakiza nukumufughamilila.

⁸ U Esabu akalalusya akati, “Nkimba akabukatila aka vitekwa kako nakomana nako kachoni?” U Yakobo akamula akati, “Mwene wane, vila vyabupi ukuti tuchaghe ichisa pantazi papako.”

⁹ Loli u Esabu akati, “Wee muzuna wane, indi navyo ivyinji. Isungila vivyo uli navyo.”

¹⁰ U Yakobo wepe akamula pakulambilizya ukuti, “Awe, nanti wampelela ichisa, senda ivyabupi ivi. Nanti nkwennya icheni chako chikuba ngati po nkwennya icheni icha Chala pachifukwa ichakuti wampokela ni nyobe zibili.

¹¹ Nalamba pokela ivyabupi vivyo niza navyo, pakuti u Chala ampelela ichisa, sona ampa ivyakusobelwa vyane vyosi.” U Yakobo akamulambilizya nkani u Esabu, mupaka pabumalilo akatonta nukupokela.

¹² Po u Esabu akati, “Zagha tubukaye, ane nkwiza pakulongolela.”

¹³ Loli u Yakobo akati, “Wee mwene wane, uzimenye ukuti abana aba balita, sona imbaghiye pakuzisungilila ing'ozi ni ng'ombe zizyo zili na bana. Nanti navivulunga nkani nukwenda napapo lisiku lyoka, vyosi vikwiza pakufwa.

¹⁴ Wee mwene wane, nalamba longolela, po nkwiza pakukonka panandipanandi kwisinda ukwa vitekwa vyane na bana bane mupaka nkwaghe mu Seyili.”

¹⁵ Po u Esabu akati, “Unyitikizye ukuti nkulekele abantu bane bamo.” Loli u Yakobo akamwamula akati, “Awe mwene wane, nkimba bangalondiwa ba choni? Chene chicho nalondagha ichakuti umpelele ichisa.”

¹⁶ Po pisiku lilalila u Esabu akanyamuka nu bulendo bwache ubwakubwela kukaya aka Seyili.

¹⁷ Loli u Yakobo akabuka kukaya aka Sukoti, nukuzenga inyumba yache ni vibagha ivya vitekwa vyache. Ichi cho chifukwa ubuzilo bula bukwitiziwa ukuti Sukoti.

¹⁸ U Yakobo akafika akiza nkani muchisu icha Kenani, pabulendo bwache ubwakufuma ku Mesopotamiya. Akazenga ivisakasa vyache pabuzilo bumo ubwakwenannya nakaya akakulu nkani aka Shekemu.

¹⁹ Akaghula umughunda ghula kubaluko ulwa Hamoli uwise uwa Shekemu ni ndalama izya isalabazya izya siliva 100.

²⁰ Palapala akazengapo chighemo nukuchita ukuti Eli Elohi Izilayeli chicho chikung'anamula ukuti u Chala, we Chala uwa Izilayeli.