Ubwandilo 32 - IBAYIBOLO 2024

U Yakobo akwiyannya pakukomana nu Esabu

¹ Bo u Yakobo akwendelela nu bulendo bwache, abantumi aba Chala bakakomana nawe.

² U Yakobo akati, “Ichi cho chisakasa icha Chala.” Po ubuzilo bula akabwita ukuti Mahanayimu.

³ Po u Yakobo akazilongolezya intumi zyache pakukomana nu mukulu wache u Esabu mu Seyili muchisu icha Edomu.

⁴ Akababuzya akati, “Mumubuzye umukulu wane u Esabu muti, ‘Ane ne mubombi wako u Yakobo. Nikalagha nu Labani, sona nikalagha nawe mupaka akabalilo aka.

⁵ Indi ni ng'ombe ni mpunda ni mbuzi ni ng'ozi na bazya abanavuli na bakolo. Wee mwene, ilelo nkutuma amazyu ukuti umpelele ichisa.’ ”

⁶ Bo intumi zila zyanyokako zikamupangila u Yakobo ukuti, “Tukafika kumukulu wako u Esabu, losi ulu akwiza pakukomane nawe, sona akwiza na bantu 400.”

⁷ Bo u Yakobo ivwa zinizi, akanyila nkani nukupasya. Akabagabannya abantu babo akaba nabo mutubukatila tubili nukubomba bunubu ni ng'ozi ni mbuzi ni ng'ombe sona ni ngamila zyache.

⁸ Akinong'onagha mumoyo wache akati, “Nanti u Esabu afika pakulwa na kabukatila akakwanda, kokuti akabukatila akabubili kakwiza pakuchimbila.”

⁹ U Yakobo akiputa akati, “Wee Chala uwa munyenya wane u Abulahamu, sona nu Chala uwa wise u Yisaki, wee Mwene, ukambuzya ukati, ‘Nyokela kuchisu chako nicha bakamu bako nukundayizya ukuti ivintu vikwiza pakunyendela akiza.’

¹⁰ Ane ntabaghiye napo panandi ukuti undanjizye ichisa nu busubiliwa bwako kune mubombi wako. Bo nkuloboka ulusoko ulwa Yolodani, ntakaba nako nakamokamo, loli indisa yene. Ilelo nanyokela nu tubukatila tubili utu.

¹¹ Nalamba, mpoka munyobe izya mukulu wane u Esabu pakuti nkunyila ukuti lumo akwiza pakulwa nane, sona na bachi bane poka na bana.

¹² Kumbuka, ukandayizya ukati, ‘Nkwiza pakukupela ukuti ivintu vikwendelaye akiza nukukupa abaluko abinji nkani ngati musesenga uwa mulubazu ulwa nyanja.’ ”

¹³ Bo aghona kulakula ubusiku bula, u Yakobo akamusabulila umukulu wache u Esabu ivintu ivi pakuba chabupi:

¹⁴ Imbuzi inkolo 200 na basabwe 20, ing'ozi inkolo 200 na badubi 20,

¹⁵ ingamila inkolo 30 poka na bana babo, ing'ombe 40 ni nkambaku 10, sona ni mpunda inkolo 20 ni nyanavuli 10.

¹⁶ Akaghugaba mutubukatila umudimo ghula, umudimo ghoka ghukaba nu musungilili, po akababuzya abambombo bache akati, “Longolela, loli mutantamane.”

¹⁷ Akamubuzya uwambombo wache uwakwanda yula akati, “Nanti wakomana nu mukulu wane u Esabu nukukulalusya ukuti, ‘Nkimba we wambombo wawenu, sona ukubuka kwiyi? Nkimba ivitekwa vyosi vivyo vili kuntazi kukwako vyawenu?’

¹⁸ Umwamule uti, ‘Vya mubombi wako u Yakobo. Amutumila u mwene wache u Esabu pakuba chabupi, sona u Yakobo umwenecho akwiza kwisinda.’ ”

¹⁹ Akamubuzya sona uwambombo uwabubili nu wabutatu, sona na bosi abanji babo bakasungililagha imidimo akati, “Izi zyo zizyo mumubuzye u Esabu, bo mwakomana nawe.

²⁰ Mumubuzye sona ukuti, ‘Umubombi wako u Yakobo akwiza kwisinda.’ ” Pakuti u Yakobo akinong'onagha ukuti, “Akwiza pakumwisya umoyo ni vyabupi vivyo akamutumila, lumo anganhobokela bo nakomana nawe.”

²¹ Po u Yakobo akalongolezya ivyabupi, loli umwenecho akaghona muchisakasa ubusiku bulabula.

U Yakobo akutoba nu Chala

²² Ubusiku bulabula u Yakobo akanyamuka nukubasenda abachi bache babili bala na bazya abalindu babili, poka na bana bache 11 nukuloboka piloboko ilya lusoko ulwa Yaboki.

²³ Bo abalobosya, akalobosya sona nu katundu wache wesi.

²⁴ U Yakobo akasyala mwene palapala. Umuntu yumo akiza nukutoba nawe busiku bosi mupaka kubuche.

²⁵ Bo umuntu yula ennya ukuti atakumupota u Yakobo, akamukoma u Yakobo mumpingu iya mumusana, po ichinama chikavyughuka.

²⁶ Umuntu yula akati, “Undekezye imbukaye pakuti kwanda pakucha.” Loli u Yakobo akamwamula akati, “Ntangakulekezya, pene papo wansaya.”

²⁷ Po umuntu yula akamulalusya akati, “Nkimba itabwa lyako wewenu?” U Yakobo akamwamula akati, “Ne Yakobo.”

²⁸ Umuntu yula akati, “Ukwanda ilelo itabwa lyako litakwiza pakuba sona we Yakobo. Watoba nu Chala, sona na bantu nukubapota. Polelo itabwa lyako likwiza pakuba we Izilayeli.”

²⁹ U Yakobo akamulalusya akati, “Nkimba po awe itabwa lyako wewenu.” Loli wepe umuntu yula akamulalusya u Yakobo akati, “Nkimba choni chicho ukulonda pakumanya itabwa lyane?” Po umuntu yula akamusaya.

³⁰ U Yakobo akati, “Namwennya u Chala pamaso na pamaso, loli pope bulo indi nubumi.” Po akabwita ubuzilo bula ukuti Penuweli.

³¹ Bo izuba lyafuma u Yakobo akepapo pa Penuweli. Po u Yakobo akagontagha pachifukwa icha chinama chache.

³² Ichi cho chifukwa nilelo bulo aba Izilayeli batakulya inyama iya mumpingu iya mumusana pachifukwa ichakuti bukaba buzilo bubo u Yakobo akakomiwapo.