Ubwandilo 31 - IBAYIBOLO 2024

U Yakobo akumuchimbila u Labani

¹ U Yakobo akivwa ukuti abana aba Labani bakuti, “U Yakobo afyula ivintu vyosi ivya tata witu, sona ubukabi bosi bubo ali nabo bwafuma kwa tata witu.”

² U Yakobo akazyaghannya sona ukuti u Labani akamwennyanga ni lyiso ichesamu nukuchila pakwanda.

³ Po u Mwene akamubuzya u Yakobo akati, “Nyokela kuchisu icha ghuso na bakamu bako, po nkwiza pakuba nawe.”

⁴ U Yakobo akabatumila amazyu abachi bache bala, u Lakelo nu Leya ukuti bakomane nawe kuko akadimagha ing'ozi ni mbuzi zyache.

⁵ Po akababuzya akati, “Nazyaghannya ukuti ughuso akunyennya ni lyiso ichesamu. Loli u Chala uwise uwa tata wane akunyimila.

⁶ Amwe mwebosi babili muzimenye ukuti namubombela ughuso na maka ghane ghosi.

⁷ Pope bulo anzimbula nukwandulannya amalipilo ghane aka teni, loli u Chala atakamwitikizya ukuti ambombele chimo ichibibi.

⁸ Akabalilo kosi nanti u Labani akuti, ‘ing'ozi ni mbuzi izyamolo zyo zizyo zikwiza pakuba malipilo ghako,’ po ivitekwa vyosi vikapapa abana abamolo, po nanti akuti, ‘Ivyamabalamabala vikwiza pakuba malipilo ghako,’ po ivitekwa vyosi vikapapagha abana abamabala.

⁹ Polelo u Chala amufyula ughuso ivitekwa vyache vyosi nukumpavyo ane.

¹⁰ “Pakabalilo akakuti ing'ozi ni mbuzi zikendeziwanga, nkalota ukuti abasabwe babo bakwendezya imbuzi inkolo bakaba bamolo, na bamabala, sona na bamadoba.

¹¹ Po uwantumi uwa Chala akanyitizya muchilota chilachila akati, ‘Wee Yakobo.’ Po nkamula nkati, ‘Ane indi pano.’

¹² Uwantumi yula akati, ‘Talankannya nukwennya, abasabwe bosi babo bakwendezya, bamolo pamo bamabala pamo bamadoba. Ane nabomba zinizi pachifukwa ichakuti nazyennya zyosi zizyo u Labani akukubombela.

¹³ Ane ne Chala, nene nkakubonekela pa Beteli kuko ukimika ibwe pakuba chikumbusyo pakulipungulila amafuta gha syunguti, sona kuko ukalapa ichilapo ukuti ukwiza pakumbombela. Po losi ulu epamo muchisu ichi nukunyokela kuchisu chinyu.’ ”

¹⁴ Po u Lakelo nu Leya bakamwamula bakati, “Nkimba tuchili tuli ni chigaba pampyana iya tata witu?

¹⁵ Utata witu akutusenda ngati po twe bayeni? Pakuti akatughulizya, sona aliye indalama zyosi zizyo akazyaghila papitu.

¹⁶ Ubukabi bosi bubo u Chala amufyula utata witu, bwitu na bana bitu. Polelo bombagha bulo chosi chicho u Chala akukubuzya.”

¹⁷ Po u Yakobo akabakwezya abana na bachi bache pangamila.

¹⁸ Po akavisokolela muntazi ivitekwa vyache vyosi, poka nu katundu wesi yuyo akakaba, bo akwikala mu Mesopotamiya nukubuka ku Kenani kuchisu icha wise u Yisaki.

¹⁹ Bo u Labani abuka pakudumulila ameya agha ng'ozi zyache, bo achili ali kulakula u Lakelo akaghilapo ulusako nukwiba utwachala utwa munyumba iya wise.

²⁰ U Yakobo akamuzimbula u Labani umu Alamu yula, pakusita kumubuzya ukuti akuchimbilamo muchisu chila.

²¹ Akanyamula ivintu vyache vyosi vivyo akaba navyo nukuchimbila. Akaloboka ulusoko ulwa Yufuleti nukubuka kuchisu icha maghamba icha Giliyadi.

U Labani akumulonda u Yakobo

²² Bo ghachilapo amasiku matatu, u Labani akivwa ukuti u Yakobo akachimbila.

²³ U Labani akasenda abantu bache nukumukonka u Yakobo amasiku seveni mupaka bakamwagha muchisu icha maghamba icha Giliyadi.

²⁴ Loli ubusiku bulabula u Chala akamubonekela muchilota u Labani umu Alamu nukumusoka ukuti, “Uchebaye nkani ukuti utakamubombele u Yakobo ichintu chimo ichibibi.”

²⁵ U Labani akamwagha u Yakobo azengite ivisakasa vyache muchisu icha maghamba chila. Po wepe u Labani na bakamu bache akazenga ivisakasa vyache muchisu icha maghamba icha Giliyadi chilachila.

²⁶ Po u Labani akamulalusya u Yakobo akati, “Nkimba choni chicho ukanzimbula, nukubasenda abana bane abakolo ngati po balemiwe pabwite?

²⁷ Nkimba choni chicho ukanzimbula nukuzyebeluka bulo? Nanti ukambuzyanga ngali nkakwimbila inyimbo ni visekeseke poka ni vinanda.

²⁸ Utakanyitikizye napo panandi ukuti indaghane na bizukulu bane, sona na bana bane abakolo. Wabomba ichintu icha bupunganu nkani.

²⁹ Indi na maka ghosi aghakubombela ichintu ichibibi, loli mubusiku ubwa mabwila u Chala uwa ghuso akansoka muchilota akati, ‘Uchebaye nkani ukuti utakamubombele u Yakobo ichintu chimo ichibibi.’

³⁰ Inzimenye ukuti ukachimbila pachifukwa ichakuti ukasamba nkani pakubwela kukaya kinyu. Po nkimba choni chicho ukiba utwachala utwa munyumba yane?”

³¹ U Yakobo akamwamula u Labani akati, “Nkanyilagha pachifukwa ichakuti nkinong'onagha ukuti ukwiza pakunfyula abana bako aba.

³² Loli nanti wamwagha yumo yuyo ali nu twachala twako, akwiza pakughoghiwa. Pamaso pa bakamu bitu, ulondelezye ichintu chicho chako, nanti ungachagha usendecho.” U Yakobo atakamanyagha ukuti we Lakelo yuyo akiba utwachala tulatula.

³³ Po u Labani akinjila pakulondelezya muchisakasa icha Yakobo, nicha Leya, nivya bambombo abakolo babili, loli atakatwaghamo utwachala twache. Pisinda pache akinjila muchisakasa icha Lakelo.

³⁴ U Lakelo akatufisa utwachala tula muchakwikalilapo icha pangamila yache, sona akikalapo umwenecho. U Labani akalondelezya muchisakasa chache, loli atakatwaghamo natumotumo.

³⁵ Po u Lakelo akamubuzya uwise akati, “Wee tata, utakankalalilaye, intangimilila pamaso papako pakuti indi muchakumwezi.” Po akalondelezya loli atakatwagha natumotumo utwachala.

³⁶ Po u Yakobo akakalala nkani nukumuchemela u Labani ukuti, “Nkimba nakunangila ichoni? Nkimba bubi boni bubo nabomba ukuti undondelezyanje bunubu?

³⁷ Ilelo pakuti walondelezya mwakatundu wane wesi, po nkimba chili ko kwiyi ichintu chicho wachagha chicho chako? Chibike pabuzelu pamaso pa bakamu bako na bane ukuti badumule ukuti wewenu ananga pakasi papako nane.

³⁸ “Nikala nawe amaka 20, ing'ozi ni mbuzi zyako zitasopoyepo nalumo. Ntaliyepo nayumo udubi uwa muchibagha chako.

³⁹ Nanti ing'ozi yako yalika, ane nkabikilaghapo akabalilo kosi. Intakiza nayo kukwako ukulanjizya ukuti ntanangitepo. Awe ukalondagha ukuti nkulipile chosi chicho chibiwa pamusanya pamo pabusiku.

⁴⁰ Akabalilo akinji nkayimba pamusanya nu butukizu, sona pabusiku nkayimba nu bukatazu. Nkapotwa na pakughona bulo utulo.

⁴¹ Umu momumo nkikalila amaka ghosi 20, bo indi munyumba yako. Nkakubombela amaka 14 pachifukwa icha bana bako abalindu babili, nukukudimila ing'ozi ni mbuzi zyako amaka sikisi. Pope bulo ukandulannya amalipilo ghane aka teni.

⁴² Nanti u Chala uwa batata bane, u Chala uwa Abulahamu, nuwa Yisaki atakanyimilagha, ilelo ngali wambwezya nyobe zyene. Loli u Chala akennya intamyo zyane, sona ni mbombo izya nyobe zyane. Ichi cho chifukwa akakuchemela ubusiku bubo bwamalagha.”

Ulufingo pakasi pa Yakobo nu Labani

⁴³ Po u Labani akamwamula u Yakobo akati, “Abana abalindu aba, bana bane, abana babo, bane, poka ni ing'ozi ni mbuzi zyope zyane. Vyosi vivyo ukuvyennya vyane. Po nkimba ningababombela ichoni abana bane banaba, pamo abana babo?

⁴⁴ Po zagha ilelo tufinge ulufingo awe nane, sona chibanje ngati chikumbusyo pakasi papitu.”

⁴⁵ Po u Yakobo akasenda ibwe nukulyimika pakuba chikumbusyo.

⁴⁶ Akababuzya abakamu bache ukuti babungannye amabwe, nukupanga ichibunga icha mabwe. Po bakalyela ichakulya mulubazu ulwa chibunga chila.

⁴⁷ U Labani akachita ichibunga icha mabwe chila ukuti Yegala Sahaduta, loli u Yakobo akachita ukuti Galedi.

⁴⁸ U Labani akamubuzya u Yakobo akati, “Ichibunga ichi chikwiza pakuba chikumbusyo pakasi papako nane.” Ichi cho chifukwa ubuzilo bula akabwita ukuti Galedi.

⁴⁹ U Labani akanena sona akati, “U Mwene atwenelezye twebosi babili bo tukupaghunkana.” Po ubuzilo bula bakabwita ukuti Mizipa.

⁵⁰ U Labani akanena sona akati, “Nanti ukubayivya abana bane, pamo nanti ukusenda sona abakolo abanji, napapo ane intangazimanya, ukumbuke ukuti u Chala we kaboni pakasi papako na nane.”

⁵¹ U Labani akati, “Agha gho mabwe ghagho nabungannya pakasi papitu, sona ibwe lilyo nalyimika cho chikumbusyo chitu.

⁵² Ivintu vyosi vibili vinivi: Ichibunga nibwe ili cho chikumbusyo papako nane. Ntakwiza pakunyela nalumo ichibunga ichi pakwiza kukwako pakukubombela ichintu ichibibi, sona nawe utakanyele nalumo ichibunga ichi pakwiza kukwane pakumbombela ichintu ichibibi.

⁵³ U Chala uwa Abulahamu nu Chala uwa Naholi, alonge pakasi papitu.” Po u Yakobo akalapa mwitabwa ilya Chala, yuyo uwise u Yisaki akamunyilagha.

⁵⁴ Akabola ichinyamana nukuchibika ukuti chibanje chakwiyipa pighamba lila. Po akabitizya abantu bache pakulya ichakulya. Bo balya, bakaghona pighamba palapala.

⁵⁵ Pandabindabi nkani u Labani akabakukila abizukulu bache na bana bache abalindu bala. Bo abasaya, akanyamuka nukubwela.