Ubwandilo 3 - IBAYIBOLO 2024

Ukunanga ukwa muntu

¹ Injoka yikaba nchevu nkani ukuchila ivinyamana vyosi vivyo u Mwene u Chala akavipela. Injoka yikamulalusya umukolo yula yikati, “Nkimba momumo ukuti u Chala akati, ‘Mutakalyanje navimovimo ivikomwa ivya makwi agha mumughunda ughu’?”

² Umukolo yula akamula akati, “Tungalyanga ivikomwa ivya makwi ghosi agha mumughunda ughu.

³ Loli u Chala akati, ‘Mutakalyanje ivikomwa ivya mwikwi lilyo lili pakasikasi pa mughunda, pamo pakulipalamasya napo panandi pachifukwa ichakuti mukwiza pakufwa nanti mwabomba bunubu.’ ”

⁴ Injoka yikamwamula umukolo yula yikati, “Awe, mutakwiza pakufwa nalumolumo.

⁵ U Chala akanena bunubu pachifukwa ichakuti akumanya ukuti nanti mwalya ivikomwa vila, amaso ghinyu ghakwiza pakwighuka, sona mukwiza pakuba ngati we Chala, mukwiza pakumanya ichiza ni chibibi.”

⁶ Bo umukolo ennya ivikomwa ivya likwi lila ukuti vikaba vyiza pakulya nukuboneka akiza, sona nukuti vingamupa amahala, akayabamo ivikomwa vimo nukulya. Akamupako vimo umulume wache, po wepe akalya.

⁷ Bo balya bulo, amaso ghabo ghakighuka, nukuzyaghannya ukuti bakaba nkule. Bakasona amani agha chikuyu nukuvwala.

⁸ Pachamabwila, bo akasanya kakulotela, u Adamu nu Eva bakawivwa umuswato uwa Mwene u Chala mumughunda mula. Po bakavwama mumakwi ukuti u Chala atakabennye.

⁹ Loli u Mwene u Chala akamwitizya u Adamu akati, “Nkimba uli ko kwiyi?”

¹⁰ U Adamu akamwamula akati, “Nkawivwa umuswato wako mumughunda. Nkanyila, po nkavwama pachifukwa ichakuti nkaba nkule.”

¹¹ U Chala akamulalusya akati, “Nkimba wewenu akakubuzya ukuti ukaba nkule? Nkimba walya ivikomwa ivya mwikwi lilyo nkakubuzya ukuti utakalyanjemo?”

¹² U Adamu akamula akati, “Umukolo yuyo ukampa ukuti abanje nane, weyuyo akampa ichikomwa, po nkalya.”

¹³ U Mwene u Chala akamulalusya umukolo yula akati, “Nkimba choni chicho ukabomba bunubu?” Umukolo yula akamula akati, “Injoka yo yiyo yikanzimbula, po nkalya.”

U Chala akubika ulufundo

¹⁴ Po u Mwene u Chala akayibuzya injoka akati, “Pachifukwa ichakuti wabomba bunubu, waghuniwa ukuchila ivinyamana vyosi, ivitekwa ni vinyamana vyosi ivya muzi! Ukwanda umusanya ughu, ukwiza pakwendelagha ulwanda lwako, po ukwiza pakulyanga ulufumbi mubumi bwako bosi.

¹⁵ Nkwiza pakubika ubulwani pakasi papako nu mukolo; pakasi pa bana bache na bana bako. Abana bache bakwiza pakutizannya umutu wako, sona nawe ukwiza pakuluma ichitende icha mwana wache.”

¹⁶ Po u Chala akamubuzya umukolo akati, “Nkwiza pakonjelezya intamyo pabung'wamu bwako, sona nu bubavu pakusayiwa umwana. Loli pope bulo ukwiza pakumunyonywa umulume wako, po akwiza pakukulamulila.”

¹⁷ Akamubuzya u Adamu akati, “Pakuti ukamwivwila umuchi wako nukulya ivikomwa ivya mwikwi lilyo nkati mutakalyanje, ichisu ichapasi chaghuniwa pachifukwa icha zizyo wabomba. Ukwiza pakuyimba nkani mubumi bwako bosi ukuti uchaghe ichakulya.

¹⁸ Ichisu chikwiza pakumezya amivwa ni ntolovu, sona ukwiza pakulyanga ivimelwa ivya mwisote.

¹⁹ Ukwiza pakutwinkagha nkani mubumi bwako bosi ukuti uchaghe ichakulya, mupaka unyokele sona kwitope. Pakuti ukafumila kwitope, po ukwiza pakunyokela kwitope.”

²⁰ U Adamu akamwita umuchi wache ukuti we Eva pachifukwa ichakuti akaba we nyina uwa bantu bosi.

²¹ Po u Mwene u Chala akamupangila u Adamu nu muchi wache amenda agha makwela agha vinyamana nukubavwalika.

U Adamu nu Eva bakwefiwamo mumughunda

²² Po u Mwene u Chala akati, “Ilelo umuntu aba ngati sweswe, amanya ubwiza nu bubibi. Atakwitikiziwa pakulya ivikomwa ivya mwikwi ilyakupa ubumi nukuba nubumi bwila na bwila.”

²³ U Mwene u Chala akamwefyamo mumughunda uwa Edeni nukumupela ukuti alimaye mwitope lilyo akamatiwako.

²⁴ Bo amwefyamo u Adamu mumughunda ghula, u Chala akabika abakelubi kubufumilo bwizuba uwa mughunda ghula. Akabika sona upanga uwakwaka yuyo akazyungulila kosi na kosi pakwighalila izila ukuti nayumo umuntu atakapalamilaye kwikwi ilyakupa ubumi lila.