Ubwandilo 28 - IBAYIBOLO 2024

¹ Po u Yisaki akamwitizya u Yakobo nukumusaya, po akamulamula akati, “Utakasende nalumo umukolo umu Kenani.

² Loli bukagha kuchisu icha Mesopotamiya, kukaya aka ghusokulu u Betuweli. Kulakula umusende weka uwa bana abalindu aba Labani, unalume wako.

³ U Chala Uwamaka Ghosi ayisaye isendwa yako, nukukupa abana abinji nkani, umwakuti ubanje we munyenya uwa inko inyinji nkani.

⁴ Akusaye awe poka na baluko lwako ukuyana namumo akamusayila u Abulahamu, umwakuti ufyule ichisu chicho ukwiza pakwikalaghamo pakuba we muyeni, ichisu chicho u Chala akamupa u Abulahamu.”

⁵ U Yisaki akamutuma u Yakobo kwa Labani umwana uwa Betuweli umu Alamu, umuyemba uwa Labeka kuchisu icha Mesopotamiya yuyo akaba we nyina uwa Esabu nu Yakobo.

U Esabu akumusenda umukolo uyunji

⁶ U Esabu akivwa ukuti u Yisaki akamusaya u Yakobo, sona nukuti akamutuma kuchisu icha Mesopotamiya pakumusenda umukolo kulakula. Akivwa sona ukuti bo akumusaya akamulamula ukuti atakasende nalumo umukolo umu Kenani.

⁷ Akivwa ukuti u Yakobo akamwivwila uwise nu nyina nukubuka kuchisu icha Mesopotamiya.

⁸ Po u Esabu akazyaghannya ukuti abakolo aba mu Kenani batakamuhobosya uwise u Yisaki.

⁹ U Esabu akabuka kwa Ishimayeli umwana uwa Abulahamu nukumusenda u Mahalati umwana uwa Ishimayeli, umuyemba uwa Nebayoti.

Ichilota icha Yakobo pa Beteli

¹⁰ U Yakobo akepako ku Belisheba nukubuka ku Halani.

¹¹ Pachamabwila bo izuba lyinjila, akafika pabuzilo bumo ubuzelu, akazenga ivisakasa vyache palapala ukuti aghone ubusiku bulabula. Akinulila ibwe kumutu wache.

¹² Akalota ukuti ikwelelo likufuma pasi mupaka kumwanya. Akabennya abantumi aba Chala bakwika nukukwela pikwelelo lila.

¹³ Po u Mwene akimilila mulubazu lwache nukuti, “Ane ne Mwene u Chala uwa Abulahamu, sona nuwa Yisaki. Nkwiza pakukupa awe na baluko bako pachisu chicho ughonitepo.

¹⁴ Abaluko lwako bakwiza pakuba binji nkani ngati lufumbi ulwa pachisu ichapasi. Impaka zyabo zikwiza pakufika kunkuto zyosi. Ukwendela mumwako na baluko lwako nkwiza pakubasaya abantu aba inko zyosi.

¹⁵ Nkwiza pakuba nawe nukukusungilila kosi kuko ukubuka, sona nkwiza pakukunyosezya kuchisu chinichi. Ntakwiza pakukuleka nalumolumo mupaka papo nakubombela zyosi zizyo nkakulayizya.”

¹⁶ Bo u Yakobo alamusya mutulo akati, “Naloliloli u Mwene ali panapa, sona ane intakazimanya.”

¹⁷ Ubogha bukamulema, po akati, “Mwee, pano pakoghofya. Naloliloli ubuzilo ubu yo Nyumba iya Chala, sona gho mulyango uwakumwanya.”

¹⁸ Pandabindabi nkani u Yakobo akasenda ibwe lilyo akinulila kumutu wache. Akalyimika pakuba chikumbusyo nukulipungulila amafuta gha syunguti, po akalipaghulila kwa Chala.

¹⁹ Ubuzilo bula akabwita ukuti Beteli, Pakwanda akaya kala kakitiziwanga ukuti Luzi.

²⁰ Po u Yakobo akalapa pamaso pa Chala nukuti, “Wee Mwene nanti ukwiza pakuba nane nukunsungilila pabulendo bwane ubu, sona nukumpa ichakulya na menda

²¹ umwakuti inyokele akiza kunyumba iya tata wane, po ukwiza pakuba we Chala wane.

²² Ibwe ili lilyo nalyimika pakuba chikumbusyo, likwiza pakuba Nyumba iya Chala, sona nkwiza pakukupa ichigaba choka pa vigaba 10 ivya vintu vyane vyosi vivyo ukwiza pakumpa.”