Ubwandilo 26 - IBAYIBOLO 2024

U Yisaki akumuzimbula u Abimeleki

¹ Izala yikawa muchisu chilachila ngati mumo yikawilila pakabalilo aka Abulahamu. Po u Yisaki akabuka kwa mwene u Abimeleki uwa ba Filisiti ku Gelala.

² U Mwene akamubonekela u Yisaki nukumubuzya ukuti, “Utakabukaye ku Ijiputi, loli wikale muchisu chicho nkwiza pakukubuzya ukuti wikalayemo.

³ Ikala tasi muchisu chinichi, po nkwiza pakuba nawe sona nkwiza pakukusaya. Pakuti nkwiza pakukupa awe sona na baluko lwako ichisu chosi chinichi. Nkwiza pakusunga ichilapo chicho nkalapa kwa ghuso u Abulahamu.

⁴ Nkwiza pakukupa abaluko abinji nkani ngati zyo ntondwa, sona nkwiza pakubapa ichisu chosi chinichi. Abantu aba inko zyosi bakwiza pakundaba ukuti imbasaye ukuyana namumo nkabasayila abaluko lwako.

⁵ Nkwiza pakukusaya pachifukwa ichakuti u Abulahamu akanyivwila, sona akakonka indaghilo na malamulo ghane ghosi.”

⁶ Polelo u Yisaki akikala mu Gelala mulamula.

⁷ Bo abantu aba mulamula bamulalusya u Yisaki nizya muchi wache, akabamula akati, “Uyu muyemba wane.” Pakuti akanyilagha pakunena ukuti u Labeka akaba muchi wache pachifukwa ichakuti akinong'onagha ukuti, “Abantu bangangogha pachifukwa ichakuti Labeka akaba wakuboneka akiza nkani.”

⁸ Bo u Yisaki ikalizannyamo, u mwene u Abimeleki uwa ba Filisiti akananamizya pibwindo pakwennya kuzi, akamwennya u Yisaki akukumbatilana nu Labeka.

⁹ U Abimeleki akamwitizya u Yisaki nukumubuzya ukuti, “Naloli uyu muchi wako! Nkimba choni chicho ukatinji, ‘Uyu muyemba wako’?” U Yisaki akamula akati, “Nkinong'onagha ukuti ningaghoghiwa nanti nkatinji, ‘Uyu muchi wane.’ ”

¹⁰ U Abimeleki akamulalusya akati, “Nkimba choni chicho watubombela zinizi? Buli nanti weka uwa bantu bane akaghonagha nu muchi wako, nkimba ngali utatupiye inongwa?”

¹¹ U Abimeleki akabasoka abantu bosi ukuti, “Wesi yuyo akamuyivya umuntu uyu pamo umuchi wache, akwiza pakughoghiwa.”

¹² U Yisaki akalima umughunda, umwakuti umwaka ghulaghula akinula ivyakulya ivyinji pakuti u Mwene akamusaya.

¹³ Umuntu yunuyu ivintu vyache vikamwendela akiza nkani, umwakuti akaba muntu umukabi nkani.

¹⁴ Pachifukwa ichakuti akaba ni midimo imyinji nkani, sona na bambombo abinji, aba Filisiti bakanda pakumubikila akabini.

¹⁵ Abantu bala bakafukila iviziba vyosi vivyo abambombo abawise u Abulahamu bakakumba bo achili mumi.

¹⁶ Abimeleki akamubuzya u Yisaki akati, “Epamo muchisu chitu ichi pachifukwa ichakuti waba na maka nkani ukutuchila.”

¹⁷ Po u Yisaki akasama nukuzenga ivisakasa vyache mwikombe ilya Gelala nukwikala kulakula.

¹⁸ U Yisaki akafukula sona iviziba vivyo vikakumbiwa pakabalilo aka Abulahamu, pachifukwa ichakuti aba Filisiti bakavifukila, bo u Abulahamu afwa. U Yisaki akavyita amatabwa ghagho uwise akavyita pakwanda.

¹⁹ Abambombo aba Yisaki bakakumba ichiziba mwikombe mula nukughaghamo amizi.

²⁰ Loli abadimi aba mu Gelala na badimi aba Yisaki bakanda ivyongo nukuti, “Amizi agha ghitu.” Po u Yisaki akachita ichiziba chila ukuti, “Ivyongo.”

²¹ Abambombo aba Yisaki bakakumba sona ichiziba ichinji, pope bulo bakanda sona ivyongo pachifukwa icha chiziba chinichi, po akachita ukuti, “Ubulwani.”

²² Akepapo pabuzilo bula nukukumba sona ichinji. Pachiziba chinichi patakabapo ivyongo, po akachita ukuti, “Ubwabuke.” Akati, “Ilelo u Mwene atupa ubwabuke pakwikala muchisu ichi, umwakuti tukwiza pakuba twe bakabi nkani.”

²³ Bo pachilapo akabalilo, u Yisaki akepapo nukubuka ku Belisheba.

²⁴ Ubusiku bulabula u Mwene akamubonekela nukuti, “Ane ne Chala uwa ghuso u Abulahamu. Utakanyilaye pakuti indi nawe. Nkwiza pakukusaya, sona abaluko lwako bakwiza pakuba binji nkani pachifukwa icha layizyo lilyo nkamulayizya uwambombo wane u Abulahamu.”

²⁵ Po u Yisaki akazenga ichighemo kulakula nukumwiputa u Mwene. Akazenga ichisakasa chache, kulakula abambombo bache bakakumbako ichiziba.

Ulufingo pakasi pa Yisaki nu Abimeleki

²⁶ U Abimeleki poka nu Ahuzati, ikambalala lyache nu Fikolo, yuyo akaba we songo uwa basilikali bache bakiza bakafuma ku Gelala pakumwendela u Yisaki

²⁷ U Yisaki akabalalusya akati, “Nkimba kwawa choni ukuti munyendele, pakuti ukambenga nukunchimbizya muchisu chinyu?”

²⁸ Bakamula bakati, “Losi ulu twazyaghannya ukuti u Mwene ali nawe, po twadumula ukuti pakasi papitu nawe pabanje ulufingo.

²⁹ Po lapa ukuti utakwiza pakutubombela nachimo ichibibi ukuyana namumo naswe tutakakubombela nachimo ichibibi. Loli tukakubombela ubwiza bwene sona tukakusindikila mumutende. Polelo u Mwene akusaya.”

³⁰ U Yisaki akabayanizizya ulusekelo, po bakalya nukung'wela.

³¹ Pandabindabi nkani bosi bala bakalapilana ichilapo. U Yisaki akalaghana nabo, po bakalekana mumutende.

³² Isiku lilalila abambombo aba Yisaki bakiza nukumubuzya nizya chiziba chicho bakakumba. Bakati, “Twaghagha amizi!”

³³ U Yisaki akachita itabwa ilyakuti, “Chilapo.” Ichi cho chifukwa akaya akakulu nkani kala kakwitiziwa ukuti Belisheba mupaka nilelo bulo.

Abachi abayeni aba Esabu

³⁴ Bo u Esabu ali na maka 40 akasenda u Judi umwana uwa Beyeli umu Hiti, sona nu Basemati umwana uwa Eloni umu Hiti.

³⁵ Abakolo babili aba bakamupelela intamyo nkulu nkani u Yisaki nu Labeka.