Ubwandilo 25 - IBAYIBOLO 2024

Abaluko ulunji ulwa Abulahamu

¹ U Abulahamu akasenda sona umukolo uyunji yuyo itabwa lyache akaba we Ketula.

² U Ketula yunuyu akamupapila u Zimulani nu Yokishani nu Medani nu Midiyani nu Ishibaki, sona nu Shuwa.

³ U Yokishani akapapa u Sheba nu Dedani. Abaluko ulwa Dedani bakaba bo aba: Aba Shulimu naba Letushimu, sona naba Lebumini.

⁴ Abana aba Midiyani bakaba bo aba: U Efa nu Efeli nu Hanoki nu Abida, sona nu Elida. Bosi banaba bakaba baluko ulwa Ketula.

⁵ U Yisaki akapyana vyosi vivyo u Abulahamu akaba navyo.

⁶ Loli bo u Abulahamu achili mumi, akabapa ivyabupi abana bache babo akapapa na bachi bache abazya abanji bala. Akabefyapo bosi pamaso pa Yisaki nukubatuma pakwikala kuchisu icha kubufumilo bwizuba.

Ubufwe nukusyiliwa ukwa Abulahamu

⁷ U Abulahamu akafwa bo ali na maka 175.

⁸ Po u Abulahamu akafwa bo aghosipite nkani, umuntu umughosi sona uwa maka aminji nkani.

⁹ Abana bache u Yisaki nu Ishimayeli bakamusyila uwise mumpako iya Makipela yiyo yikaba mumughunda uwa Efuloni umwana uwa Zohala, umu Hiti. Umughunda ghula ghukaba kubufumilo bwizuba ubwa Mamule.

¹⁰ Umughunda ghunughu, ghukaba mughunda ghugho u Abulahamu akaghula kuba Hiti. U Abulahamu nu muchi wache u Sala bakasyiliwamo.

¹¹ Bo u Abulahamu afwa, u Chala akamusaya umwana wache u Yisaki, yuyo pakabalilo kalakala akikalagha papipi ni chiziba chicho chikitiziwanga ukuti, “Ichiziba icha Mumi yuyo Akunyennya Ane.”

Abaluko ulwa Ishimayeli

¹² Ili lyo lipangwi ilya abaluko ulwa Ishimayeli, umwana uwa Abulahamu yuyo u Hagala umu Ijiputi umuzya uwa Sala akamupapila u Abulahamu.

¹³ Agha gho matabwa agha bana abaluko ulwa Ishimayeli: U Nebayoti akaba we katote wache, po pakakonkapo u Kedali nu Adibeli nu Mibisamu,

¹⁴ nu Mishima nu Duma nu Masa,

¹⁵ nu Hadadi nu Tema nu Yetuli nu Nafishi sona nu Kedema.

¹⁶ Banaba bakaba bo banyenya aba inko 12 na matabwa ghabo ukuyana nutwaya twabo, sona ni visakasa vyabo.

¹⁷ U Ishimayeli akafwa bo ali na maka 137.

¹⁸ Abaluko ulwa Ishimayeli bakikalagha muchigaba icha pakasi pa kaya aka Havila naka Shuli, mupaka kubufumilo bwizuba ku chisu icha Ijiputi, kumusebo uwaku Asiliya. Akwiza pakuba nu moyo uwa chinyamana pakasi pa bakamu bache bosi.

Nizya kupapiwa ukwa Esabu nu Yakobo

¹⁹ Ili lyo lipangwi ilya Yisaki umwana uwa Abulahamu: U Abulahamu akapapa u Yisaki.

²⁰ Bo u Yisaki ali na maka 40, akumusenda u Labeka, umwana uwa Betuweli, uwamu Alamu muchisu icha Mesopotamiya, sona yuyo akaba muyemba uwa Labani.

²¹ Pachifukwa ichakuti u Labeka umuchi uwa Yisaki akaba mughumba, u Yisaki akamwiputila kwa Mwene. U Mwene akivwa inyiputo zyache, po u Labeka akamela ulwanda.

²² Bo abana babili bala banda pakusunkilizannya mulwanda ulwa nyina, u Labeka akati, “Nanti umu momumo zibeleye, nkimba choni chicho imbanje nubumi?” Po akamulaba u Mwene ukuti amwamule.

²³ Po u Mwene akamubuzya akati, “Mulwanda lwako muli inko izya bantu babili. Ukwiza pakupapa inko zibili izya bantu babo bakwiza pakubengana. Weka akwiza pakuba wamaka nkani ukumuchila uyunji, sona ukatote akwiza pakumubombelagha umunandi.”

²⁴ Bo akabalilo kakwana akakuti u Labeka asayiwe, akapapa abana abalumendo abamapasa.

²⁵ Ukatote akaba muchesamile, sona umubili wache ghosi ghukaba na meya, po bakamwita ukuti we Esabu.

²⁶ Pisinda pache umuzuna wache akapapiwa, bo inyobe yache yilemite ichitende icha Esabu, po bakamwita ukuti we Yakobo. Abana bala bakapapiwa, bo u Yisaki ali na maka 60.

U Esabu akughulizya ubwakatote bwache

²⁷ Bo abana bala bakula, u Esabu akaba muntu umubingi uwamaka nkani, yuyo akighana nkani pakwendakwenda. Loli u Yakobo akaba muntu umololo, yuyo akighana nkani pakwikala panyumba.

²⁸ U Yisaki akamughana nkani u Esabu pachifukwa ichakuti akalyanga inyama zizyo akabingagha, loli u Labeka akamughana nkani u Yakobo.

²⁹ Isiku limo bo u Yakobo akupiya amalima amachesamu, u Esabu akabwelako pakubinga, po izala yikamubaba nkani.

³⁰ Akamubuzya umuzuna wache u Yakobo akati, “Wee muzuna, izala yikumbaba, umpeko amalima amachesamu.” Ichi cho chifukwa bakamwita ukuti we Edomu.

³¹ U Yakobo akamwamula akati, “Wande tasi ungulizikizye ubwakatote bwako.”

³² U Esabu akamwamula akati, “Chiza bulo! Indi papipi pakufwa. Nkimba ningakabapo choni pakuba ne katote?”

³³ Po u Yakobo akati, “Lapa tasi ukuti wangulizikizya naloli ubwakatote bwako.” U Esabu akalapa nukumughulizizya u Yakobo ubwakatote bwache.

³⁴ Po u Yakobo akamupa u Esabu ichibama na malima ghala. Akalya nukung'wela, po akanyamuka nukubuka. Umu momumo u Esabu akabusamulila ubwakatote bwache.