Ubwandilo 24 - IBAYIBOLO 2024

Bakumulondela umuchi u Yisaki

¹ Pakabalilo kalakala u Abulahamu akaghosipa nkani, sona u Mwene akamusaya muvyosi vivyo akabombagha.

² Isiku limo u Abulahamu akamubuzya uwambombo wache usongo uwakwenelezya ivintu vyosi akati, “Bika inyobe yako muntende muntapatapa zyane.

³ Lapa pamaso pa Mwene, u Chala uwakumwanya ni chisu chosi ichapasi ukuti utakwiza pakumusendela umwana wane umulindu uwa muchisu icha Kenani, mumo ane nkwikala.

⁴ Bukagha kuchisu chane na ku bakamu bane nukumusendela umwana wane u Yisaki umukolo.”

⁵ Uwambombo yula akamulalusya akati, “Buli nanti umukolo yula akukana pakwiza nane kuno? Nkimba po ningamusenda umwana wako uyu nukumusindikila kuchisu chicho ukafumila?”

⁶ U Abulahamu akamula akati, “Nakana, wenelezye ukuti utanyokela nu mwana wane kuchisu chilachila.

⁷ U Mwene u Chala uwakumwanya, yuyo akanyefya kunyumba iya bapapi bane, sona ni chisu chicho nkapapiliwako, akandapizya ukuti akwiza pakubapa abaluko lwane ichisu chinichi. Akwiza pakumutuma uwantumi wache kuntazi kukwako, kulakula ko kuko umusendele umukolo umwana wane.

⁸ Loli nanti umukolo atakulonda pakwiza nawe kuno, ukwiza pakusatuka kuchilapo chane. Loli utakachele pakunyokela nu mwana wane kulakula.”

⁹ Po uwambombo yula akabika inyobe yache muntapatapa izya mwene wache, nukulapa ukuti akwiza pakubomba vivyo u Abulahamu akamubuzya.

¹⁰ Uwambombo yula akasenda ingamila 10 izya mwene wache nukunyamuka. Akasenda ivintu ivyiza ivyakulekanalekana nukubuka kukaya aka Naholi muchisu icha Mesopotamiya.

¹¹ Bo afika, akazifughamizya ingamila papipi ni chiziba kuzi ukwa kaya kalakala. Pakaba pachamabwila nkani pakabalilo kako abakolo bakizagha pakusemba amizi.

¹² Po akiputa akati, “Wee Mwene, u Chala uwa mwene wane u Abulahamu, nkukulaba ukuti ivintu vinyendele akiza ilelo, nukubomba zizyo ukamulayizya u mwene wane.

¹³ Ennya indi pano pachiziba papo abalindu aba mukaya akakulu nkani aka bakwiza pakusemba amizi.

¹⁴ Nkwiza pakumubuzya umulindu weka ukuti, ‘Nalamba tula isonta yako ukuti ing'weleko amizi.’ Po nanti umulindu yula anyitikizya ukuti, ‘Ng'wela, sona nkwiza pakuzing'wesya ni ngamila zyako bulo,’ abanje mulindu yuyo wamusalila uwambombo wako u Yisaki. Nanti zingabombiwa bunubu, nkwiza pakumanya ukuti wabomba naloli zizyo ukamulayizya u mwene wane.”

¹⁵ Bo atamalite nukwiputa, akamwennya u Labeka akwiza bo anyamuye isonta pachipunko chache. U Labeka akaba mwana uwa Betuweli, yuyo akaba mwana uwa Naholi uwamwabo uwa Abulahamu. Umuchi uwa Naholi akaba we Milika.

¹⁶ Umulindu yula akaba uwakuboneka akiza nkani, sona akaba wakuti atamumenyepo umwanavuli nalumo. Akikila kuchiziba kula, akasemba amizi musonta yache nukubwela.

¹⁷ Uwambombo yula akumuchimbilila pakukomana nawe nukumubuzya ukuti, “Nalamba, umpeko amizi aghakung'wela musonta yako.”

¹⁸ Umulindu yula akamwamula akati, “Wee mwene wane, ng'wela.” Lubilolubilo u Labeka akisya isonta pachipunko chache nukuyilema munyobe zyache ukuti ang'wele.

¹⁹ Bo ang'wela, umulindu yula akati, “Nkwiza pakuzisembela amizi ni ngamila zyako bulo mupaka zyosi zing'wele.”

²⁰ Po umwalubilolubilo akapungulila amizi muchakung'welelamo ivitekwa, akachimbilila sona kuchiziba pakusembe amizi mupaka zyosi ingamila zikang'wela.

²¹ Uwambombo yula akaba bulo myee ukwenelezya zizyo umulindu yula akabombagha ukuti amanye nanti u Mwene abusayite naloli ubulendo bwache pamo awe.

²² Bo ingamila zila zyang'wela, umuntu yula akafumya akela akang'wamu nkani nukukabika pampuno yache, sona akamuvwika ivibangili vibili ivikulu nkani panyobe yache.

²³ Po akamulalusya akati, “Nkimba ughuso wewenu? Nalamba, mbuzya. Nkimba munyumba iya ghuso bulimo ubuzilo ubwakuti ane na bantu bane tungaghonamo ubusiku ubu?”

²⁴ Umulindu yula akamwamula akati, “Ane ne mwana uwa Betuweli, umwana uwa Naholi. Umuchi uwa Naholi akaba we Milika.”

²⁵ Akati, “Kukwitu ichakulya icha vitekwa chinji nkani, sona nu buzilo mungaghonamo bwinji nkani.”

²⁶ Umuntu yula akafughama nukumwiputa u Mwene.

²⁷ Akati, “Apaliwanje u Mwene, u Chala uwa mwene wane u Abulahamu, yuyo akusunga umwakusubiliwa zizyo akamulayizya u mwene wane. U Mwene andongolela ane kunyumba iya bakamu abamwene wane.”

²⁸ Umulindu yula akachimbilila kunyumba iya nyina nukubapangila abantu bosi ivintu vyosi.

²⁹ U Labeka akaba nu muyemba wache u Labani, po u Labani akachimbilila kuchiziba kuko kukaba uwambombo uwa Abulahamu.

³⁰ U Labani akennya akela aka golide pampuno ni vibangili vivyo umuyemba wache akavwala, sona nukumwivwa u Labeka akubapangila zizyo umuntu yula akamubuzya. U Labani akabukako nukumwagha imiliye papipi ni ngamila zyache ku chiziba chila.

³¹ Akamubuzya akati, “Twende kunyumba, awe we muntu umusayiwa nu Mwene. Nkimba choni chicho wimiliye kuno? Nakuyanizizya ichipinda munyumba yane, sona nu buzilo ubwa ngamila zyako.”

³² Umuntu yula akinjila munyumba, sona u Labani akisya ukatundu pangamila zila nukuzipa ingamila ichakulya. Akasemba amizi ukuti uwambombo uwa Abulahamu na bantu bache basukusule munyayo zyabo.

³³ Bo biza ni chakulya, umuntu yula akati, “Te indye mupaka papo nanena tasi ichakusingo.” U Labani akamubuzya akati, “Awe, nena.”

³⁴ Po akati, “Ane ne wambombo uwa Abulahamu.

³⁵ U Mwene amusaya nkani u mwene wane, sona muntu umukabi nkani. Amupa ing'ozi ni ng'ombe nu siliva nu golide, na bambombo abanavuli na bakolo, ni ngamila, sona ni mpunda.

³⁶ U Sala, umuchi uwa mwene wane akamupapila umwana umulumendo bo aghosipite, yuyo akwiza pakupyana ivintu vyache vyosi.

³⁷ U mwene wane weyuyo akandapizya ichilapo. Akati, ‘Utakamusendele umwana wane umulindu uwa muchisu icha Kenani, muchisu mumo nkwikala.

³⁸ Loli bukagha kunyumba iya tata wane, sona kubaluko lwane ko kuko mumusendele umwana wane umukolo.’

³⁹ “Po nkamulalusya u mwene wane nkati, ‘Buli nanti umukolo akukana pakwiza nane kuno?’

⁴⁰ “Akamula akati, ‘U Mwene yuyo namubombela mubusubiliwa akabalilo kosi akwiza pakumutuma uwantumi wache poka nawe nukuti vyosi vikwendele akiza, umwakuti ungamusendela umukolo umwana wane kubaluko lwane, sona ku bamunyumba iya tata wane.

⁴¹ Nanti ukubuka ku bakamu bane, loli bamukanizya pakwiza nawe kuno, po awe ungaba we musatuke kuchilapo chako.’

⁴² “Bo nafika pachiziba nkiputa nkati, ‘Wee Mwene u Chala uwa mwene wane u Abulahamu, nalamba ubusaye ubulendo ubu.

⁴³ Ennya indi pano pachiziba papo abalindu aba mukaya bakwiza pakusemba amizi, ane nkwiza pakumulaba ukuti, “Nalamba umpeko amizi aghakung'wela musonta yako,”

⁴⁴ nanti akuti, “Ng'wela, sona nkwiza pakuzisembela amizi ni ngamila zyako bulo,” abanje we mulindu yunuyu yuyo wamusalila uwambombo wako u Yisaki.’

⁴⁵ “Bo intamalite nukwiputa, u Labeka akafika bo anyamuye isonta pachipunko chache. Akikila kuchiziba pakusemba amizi, po nkati, ‘Nalamba, umpeko amizi aghakung'wela musonta yako.’

⁴⁶ “Umwalubilolubilo umulindu yula akisya isonta yache nukuti, ‘Wee mwene wane, ng'wela.’ Po nkang'wela, sona akazing'wesya ni ngamila zyane bulo.

⁴⁷ “Po nkamulalusya nkati, ‘Nkimba ughuso wewenu?’ “Akanyamula akati, ‘Ane ne mwana uwa Betuweli, umwana uwa Naholi. Umuchi uwa Naholi akaba we Milika.’ “Po nkamuvwika akela aka golide pampuno, sona nu tubangili munyobe zyache.

⁴⁸ Po nkafughama nukumwiputa u Mwene. Nkamupalizya u Mwene, u Chala uwa mwene wane u Abulahamu, yuyo akandongozya akiza nkani ku bakamu abamwene wane, kuko nkamusendela umulasagha u mwene wane.

⁴⁹ Ilelo mbuzya nanti mukwiza pakuba mwe bololo sona na basubiliwa kwa mwene wane, pamo awe. Nanti awe, pope bulo mbuzya, umwakuti imanye ichakubomba.”

⁵⁰ Po u Labani nu Betuweli bakamula bakati, “Zinizi zikufuma kwa Mwene, po naswe bulo tutanganenapo nachimochimo.

⁵¹ U Labeka uyu musende bukagha nawe pakuba muchi uwa mwana uwa mwene wako, ukuyana namumo u Mwene anenela.”

⁵² Bo uwambombo uwa Abulahamu ivwa zinizi akafughama nukumwiputa u Mwene.

⁵³ Po uwambombo yula akafumya ivintu ivyinji ivya siliva nu golide poka na menda amiza nkani nukumupa u Labeka. Akamupa umuyemba wache nu nyina ivyabupi ivya mutengo.

⁵⁴ Uwambombo yula poka na bantu babo akaba nabo bakalya nukung'wela nukughona kulakula ubusiku bula. Bo balamusya pandabindabi akati, “Munyitikizye ukuti inyokele kwa mwene wane.”

⁵⁵ Loli umuyemba wache nu nyina uwa Labeka bakati, “Mumuleke ukuti ikale tasi naswe amasiku 10 bulo, po mungabuka nawe.”

⁵⁶ Akati, “Nalamba mutakankabizye pakuti u Mwene abusayite ubulendo bwane, munyitikizye ukuti inyokele kwa mwene wane.”

⁵⁷ Po bakati, “Leka tumwitizye umulindu ukuti twivwe zizyo anganena.”

⁵⁸ Po bakamwitizya u Labeka nukumulalusya ukuti, “Nkimba ukulonda pakubuka nu muntu uyu?” U Labeka akamula akati, “Eee, nkubuka nawe.”

⁵⁹ Po bakamwitikizya u Labeka, poka nu wambombo wache umukolo pakubuka poka nu wambombo uwa Abulahamu, sona na bantu bache.

⁶⁰ Bakamusaya u Labeka ukuti, “Wee muyemba witu, u Chala akusaye ukuti ubanje we nyina uwa bantu amasabuzani na masabuzani. Abaluko lwako babapotaye abalwani babo.”

⁶¹ Po u Labeka na bambombo bache abakolo bala, bakakwela pangamila nukubuka nu wambombo uwa Abulahamu yula.

⁶² U Yisaki akiza munkolongo iya ichiziba chicho chikitiziwanga ukuti, “Ichiziba icha Mumi yuyo Akunyennya Ane”, pakuti akikalagha muchigaba icha Negebu.

⁶³ Pachamabwila u Yisaki akaghololagha ivinama mumaghunda, akatalankannya nukwennya ingamila zikwiza.

⁶⁴ Bo u Labeka amwennya u Yisaki, akika pangamila yache

⁶⁵ nukumulalusya uwambombo uwa Abulahamu yula ukuti, “Nkimba wewenu akwenda mumughunda pakukomana naswe?” Uwambombo yula akamula akati, “We mwene wane.” Po u Labeka akasenda umwenda nukwivwinka kumaso.

⁶⁶ Po uwambombo yula akamupangila u Yisaki vyosi vivyo akabomba.

⁶⁷ Po u Yisaki akamwinjizya u Labeka muchisakasa mumo unyina akikalaghamo kale pakuba muchi wache. U Yisaki akamughana nkani u Labeka, umwakuti akabuluvyako nu bufwe ubwa nyina.