Ubwandilo 22 - IBAYIBOLO 2024

U Chala akumuyela u Abulahamu

¹ Bo pachilapo akabalilo, u Chala akamuyela u Abulahamu. Akamwitizya akati, “Wee Abulahamu!” U Abulahamu akamula akati, “Indi pano.”

² Po u Chala akumubuzya akati, “Senda u Yisaki umwana wako, mwene na mwene, sona yuyo umughanite nkani, ubuke kuchisu icha Moliya. Kulakula umubike ukuti abanje chakwiyipa ichakocha pighamba lilyo nkwiza pakukubuzya.”

³ Pandabindabi nkani u Abulahamu, akayannya apakwikalapo pampunda yache nukudumulannya inkwi izyakochela ichakwiyipa. Akanyamuka ubulendo bwache ubwakubuka kuko u Chala akamubuzya. Pabulendo bwache akabuka nu mwana wache u Yisaki poka na bambombo bache babili.

⁴ Pisiku ilyabutatu, bo u Abulahamu ali pabutalipo akatalankannya nukubwennya ubuzilo bubo akabukaghako.

⁵ Akababuzya abambombo bache babili bala akati, “Amwe ikala pano ni mpunda iyi, bo ane nu mulumendo tukubuka kula pakumwiputa u Chala, po tukwiza pakubagha.”

⁶ U Abulahamu akamunyamulisya u Yisaki inkwi izyakochela ichakwiyipa ichakocha, bo umwene anyamuye ichipeni numoto. Bo bakulongozannya,

⁷ u Yisaki akamwitizya uwise akati, “Wee tata!” U Abulahamu akamula akati, “Choni, mwana wane.” U Yisaki akamulalusya akati, “Umoto ninkwi vilipo, nkimba umwana uwa ng'ozi yuyo akwiza pakuba chakwiyipa ichakocha ali ko kwiyi?”

⁸ U Abulahamu akamwamula akati, “Wee mwana wane, u Chala akwiza pakutupa umwana uwa ng'ozi yuyo akwiza pakuba chakwiyipa ichakocha.” Abantu babili aba bakendelela pakulongozannya.

⁹ Bo bafika pabuzilo bubo u Chala akamubuzya, u Abulahamu akazenga ichighemo nukuzilambalika inkwi pachighemo pala. Akamupinya umwana wache yula nukumughoneka pamwanya pankwi zila.

¹⁰ Po u Abulahamu akawesa ichipeni ukuti amughoghe umwana wache.

¹¹ Loli uwantumi uwa Mwene akamwitizya akati, “Wee Abulahamu, Abulahamu!” U Abulahamu akamula akati, “Indi pano.”

¹² Uwantumi yula akamubuzya akati, “Utakamughoghe pamo ukumuvulazya napo panandi. Ilelo nazimanya ukuti naloli we muntu uwakumunyila u Chala, pachifukwa ichakuti utakanyima umwana wako, mwene na mwene.”

¹³ U Abulahamu akatalankannya nukumwennya udubi impembe zyache zibadiye mumpanya. Akamusenda udubi yula nukubika ukuti abanje chakwiyipa ichakocha mubuzilo ubwa mwana wache.

¹⁴ U Abulahamu akabwita ubuzilo bula ukuti “U Mwene akupa.” Nilelo bulo abantu bakuti, “Pighamba ilya Mwene, yuyo akupa.”

¹⁵ Uwantumi uwa Mwene yula akamwitizya sona u Abulahamu akabubili

¹⁶ nukuti, “U Mwene akuti, ‘Nkulapa ukuti nkwiza pakukusaya nkani pachifukwa ichakuti utakanyima umwana wako, mwene na mwene.

¹⁷ Naloliloli nkwiza pakukusaya nkani, sona nkwiza pakubapela abaluko lwako pakuba binji nkani ngati zyo ntondwa, sona ngati musesenga uwa mulubazu ulwa nyanja. Abaluko lwako bakwiza pakubapota abalwani babo bosi.

¹⁸ Inko zyosi pachisu ichapasi nkwiza pakuzisaya ukwendela mubaluko lwako, pachifukwa ichakuti awe wanyivwila.’ ”

¹⁹ Po u Abulahamu akanyokela ku bambombo bache, po bosi poka bakanyamuka nukubwela ku Belisheba, kuko u Abulahamu akikalagha.

Abaluko ulwa Naholi

²⁰ U Abulahamu akivwa ukuti u Milika umuchi uwa muzuna wako Naholi amupapila abana eyiti:

²¹ U Uzi akaba we katote, sona nu muzuna wache u Buzi nu Kemuweli uwise uwa Alamu,

²² nu Kesedi nu Hazo nu Pilidashi nu Yidilafe sona nu Betuweli.

²³ U Betuweli akaba we wise uwa Labeka. U Milika akamupapila abana bosi eyiti banaba u Naholi, umuzuna uwa Abulahamu.

²⁴ U Lebuma, umuchi umuzya uwa Naholi akamupapila abana folo, u Teba nu Gahamu nu Tahashi sona nu Maaka.