Ubwandilo 21 - IBAYIBOLO 2024

Ukupapiwa ukwa Yisaki

¹ U Mwene akamukumbuka u Sala nukumubombela vivyo akamulayizizya.

² U Sala akamela ulwanda, po akamupapila u Abulahamu umwana umulumendo mubughosi bwache. Umwana yula akapapiwa pakabalilo kako u Chala akamulayizya.

³ U Abulahamu akamwita umwana yula ukuti we Yisaki.

⁴ U Abulahamu akamusilimula umwana wache yula, bo ali namasiku eyiti, ukuyana namumo u Chala akamulamulila.

⁵ U Yisaki akapapiwa, bo Abulahamu ali na maka 100.

⁶ U Sala akati, “U Chala anhobosya nukunsekelesya. Umuntu wesi yuyo akwiza pakwivwa zinizi akwiza pakusekela poka nane.”

⁷ Akanena sona akati, “Nkimba wewenu akamanyagha ukuti u Sala akwiza pakonkezya umwana? Loli namupapila u Abulahamu umwana umulumendo, bo aghosipa.”

⁸ Umwana yula akakula, po isiku ilyakuti u Sala amulesya pakonka ibele, u Abulahamu akayannya ulusekelo ulukulu nkani.

U Abulahamu akumwefya u Hagala nu Ishimayeli

⁹ Loli bo u Sala ennya ukuti u Ishimayeli umwana yuyo u Hagala umuntu uwa muchisu icha Ijiputi, akamupapila u Abulahamu ali pakumobezya u Yisaki umwana uwa Sala,

¹⁰ akamubuzya u Abulahamu akati, “Umuchimbizye umukolo umuzya uyu poka nu mwana wache. Pakuti umwana uwa mukolo uyu umuzya atangapyana ichilingo pa mwana wane u Yisaki.”

¹¹ Ifundo iyi yikamuvulazya nkani u Abulahamu mumoyo pachifukwa ichakuti wepe nu Ishimayeli akaba mwana wache.

¹² Loli u Chala akamubuzya u Abulahamu akati, “Ifundo yiyo u Sala anena nizya mwana wako poka nu muchi wako umuzya u Hagala, yitakakuvulazye mumoyo. Bombagha bulo chosi chicho u Sala akukubuzya, pakuti awe ukwiza pakuba na baluko babo nkakulayizya ukwendela mwa Yisaki.

¹³ Nkwiza pakumupa sona abana abinji nkani umwana uwa muchi wako umuzya yula, umwakuti bakwiza pakuba luko. Pakuti wepe u Ishimayeli mwana wako.”

¹⁴ Pandabindabi nkani u Abulahamu akasenda ichakulya ni nyambi iyikwela iya mizi nukumupa u Hagala. Akamubaghalizya ivyakulya pavipunko nukumubuzya ukuti abukaye poka numwana wache. U Hagala akanyamuka, akendakendagha bulo munkolongo iya Belisheba.

¹⁵ Bo amizi ghamala munyambi mula, akamubika bulo umwana wache yula mukazundila aka mpanya.

¹⁶ Akayitantama impanya yila amamita 100 nukwikala pasi nukuti, “Ntangamwenelezya bulo bo umwana wane ali pakufwa, awe.” Bo achili ikaye pasi palapala, umwana yula akanda pakulila.

¹⁷ U Chala akamwivwa umwana yula akulila, po uwantumi uwa Chala akamubuzya u Hagala akati, “Wee Hagala, nkimba choni chatamya? Utakanyilaye, u Chala ivwa ukulila ukwa mwana.

¹⁸ Nyamuka, kamuleme panyobe nukumunyamula. Pakuti abaluko lwache bakwiza pakuba luko ulukulu nkani.”

¹⁹ U Chala akamwighula amaso u Hagala, po u Hagala akachennya ichiziba. U Hagala akabuka pachiziba pala, akasemba amizi nukwizuzya inyambi yache iyikwela lila, po akamung'wesyako nu mwana wache.

²⁰ U Chala akamusungilila akiza umwana yula, bo akukula munkolongo iya Palani. Po akaba muntu umubingi umukulu nkani.

²¹ Unyina akamusendela umukolo uwa muchisu icha Ijiputi pakuba muchi wache.

Ulufingo ulwa Abulahamu nu Abimeleki

²² Pakabalilo kalakala u Abimeleki nu Fikolo usongo uwa basilikali akabuka kwa Abulahamu nukuti, “U Chala ali nawe muvyosi vivyo ukubomba.

²³ Polelo lapa pano pamaso pa Chala ukuti utakwiza pakunzimbula ane, pamo abana bane, pamo abaluko lwane. Ane nkaba ne muntu umusubiliwa pamaso papako, po nawe lapa ukuti ukwiza pakuba we muntu umusubiliwa pamaso papane muchisu chicho mukwikalamo.”

²⁴ U Abulahamu akati, “Nkulapa.”

²⁵ Po u Abulahamu akilumbusya kwa Abimeleki nizya chiziba chicho abambombo bache bakafyula.

²⁶ U Abimeleki akati, “Ntamumenye umuntu yuyo azibombite zinizi. Awe utakambuzyapo, sona nivwa bulo ilelo.”

²⁷ Po u Abulahamu akamupa u Abimeleki ing'ozi ni ng'ombe, sona abantu babili aba bakafingana ulufingo.

²⁸ U Abulahamu akasabula abana abang'ozi seveni pakasi pa ng'ozi zyache,

²⁹ po u Abimeleki akamulalusya akati, “Nkimba choni chicho ukubomba bunubu?”

³⁰ U Abulahamu akamula akati, “Pokela bulo abana abang'ozi seveni aba. Pakubomba bunubu kokuti ukwitika ukuti nene nkakumba ichiziba chinichi.”

³¹ Po ubuzilo bula bakabwita ukuti we Belisheba, pachifukwa ichakuti abantu babili bala bakalapa ichilapo palapala.

³² Bo bamala pakufingana ulufingo lula pa Belisheba, u Abimeleki nu Fikolo bakabwela kuchisu icha ba Filisiti.

³³ Po mu Belisheba mulamula u Abulahamu akabyalamo ikwi ilya mupandapanda nukumwiputa u Mwene, u Chala uwa bwila na bwila.

³⁴ U Abulahamu akikala muchisu icha ba Filisiti amaka aminji nkani.