Ubwandilo 20 - IBAYIBOLO 2024

U Abulahamu nu Abimeleki

¹ U Abulahamu akasamila ku Negebu chicho chikaba chigaba icha kuntende. Akikalagha pakasi pa kaya akakulu nkani aka Kadeshi naka Shuli muchisu icha Gelala.

² Kulakula u Abulahamu akababuzya abantu ukuti, “Umuchi wache u Sala muyemba wane.” Po u Abimeleki u mwene wamu Gelala akatuma abantu pakumusenda u Sala.

³ Ubusiku bumo u Chala akamubonekela u Abimeleki muchilota nukuti, “Awe ukwiza pakufwa pachifukwa ichakuti wasenda umuchi uwa muntu.”

⁴ Loli u Abimeleki akaba achili atamupalamasizyepo umukolo yula, po akati, “Wee Mwene, nkimba naloli ungayighogha inko yiyo yitanangitepo nachimochimo?

⁵ U Abulahamu umwenecho weyuyo akati, ‘Yunuyu we muyemba wane,’ sona wepe u Sala akati, ‘Yunuyu we muyemba wane.’ Ane nkabomba chinichi nu mabyebye wane umwiza, po intakanangapo napo panandi.”

⁶ Po u Chala akamwamula muchilota akati, “Eee, inzimenye ukuti ukabomba chinichi nu mabyebye umwiza. Ane nkakukanizya ukuti utakanangilaye pakumupalamasya umukolo yunuyu.

⁷ Loli ilelo kamunyosekezye umwanavuli yula umuchi wache. Umulume wache we mulaghuzi, po akwiza pakukwiputila, umwakuti utakafwe. Loli nanti utakumunyosekezya umwanavuli yula umuchi, nkukusoka ukuti awe poka na bantu bako bosi mukwiza pakufwa.”

⁸ Pandabindabi nkani u Abimeleki akaghitizya amakambala ghache nukughabuzya ivintu vyosi, po bakanyila nkani.

⁹ U Abimeleki akamwitizya u Abulahamu nukumulalusya ukuti, “Nkimba watubombela choni? Nkimba nakunangila choni ukuti wize nu lufundo ulukulu ulu papane, sona na pabumwene bwane? Wabomba ivintu vivyo vitambaghiye pakumbonekele.

¹⁰ Nkimba choni chicho wabomba zinizi?”

¹¹ U Abulahamu akamula akati, “Nkinong'onagha ukuti ataliko nayumoyumo umuntu kuno uwakumunyila u Chala, sona nukuti bakwiza pakungogha pachifukwa icha muchi wane.

¹² Naloli we muyemba wane, pakuti twebosi tukapapiwa nu tata wane, napapo tutakapapiwa mwa mayi weka. Ichi cho chifukwa nkamusenda.

¹³ Bo u Chala anyefya munyumba iya tata wane nukunyembezya muchisu ichiyeni, nkamubuzya umuchi wane ukuti, ‘Umu momumo ningamanyila ukuti unganite, nanti wamubuzya umuntu wesi kosi kuko tukubuka ukuti ane ne muyemba wako.’ ”

¹⁴ Po u Abimeleki akumunyosekezya u Abulahamu u Sala poka ni ng'ozi ni ng'ombe sona na bazya.

¹⁵ Akamubuzya u Abulahamu akati, “Ichisu chosi chicho ukuchennya ichi chane, ungikala posi papo ukulonda.”

¹⁶ Akamubuzya u Sala akati, “Nkumupa umuyemba wako isalabazya izya siliva 1,000 pakuba bwakaboni pamaso pabantu bosi babo bali nawe, ukuti utanangitepo nachimochimo.”

¹⁷ U Abulahamu akamwiputila u Abimeleki, pachifukwa icha zizyo zikabombiwa, po u Chala akamupozya. Akamupozya sona umuchi wache poka na bakolo abazya ukuti impapo zyabo zyighuke sona,

¹⁸ pakuti u Mwene akighalila impapo izya bakolo bosi abamunyumba iya Abimeleki pachifukwa icha Sala umuchi uwa Abulahamu.