Ubwandilo 2 - IBAYIBOLO 2024

¹ Po u Chala akamalizya pakupela kumwanya ni chisu ichapasi, sona na vyosi vivyo vikwikalamo.

² Pisiku lyaseveni u Chala akamalizya imbombo zyache zyosi zizyo akabombagha, akatuzya pisiku lyaseveni.

³ Akalisaya isiku lyaseveni nukulipaghula pakuba lisayiwa, pakuti pisiku linili u Chala akatuzya pakubomba imbombo yache iyakupela ivintu vyosi.

⁴ Ili lyo lipangwi ilyakulingannya namumo kumwanya ni chisu ichapasi vikapeleliwa. Bo u Mwene u Chala apela kumwanya ni chisu ichapasi,

Nizya mughunda uwa Edeni

⁵ pachisu ichapasi patakabapo nachimo ichibyalwa. Imbeyu zikaba zichili zitamelite, pakuti u Mwene u Chala akaba achili atatumite nayimo ivula, sona patakabapo nayumo umuntu uwakuti angalima ichisu chilachila.

⁶ Loli amizi ghakabwibwituka pasi pachisu nukusembelela itope.

⁷ Po u Mwene u Chala akasenda itope nukumata umuntu. Akamufutila umuyi uwakupa ubumi mumpuno zyache, po umuntu yula akaba nubumi.

⁸ U Mwene u Chala akalima umughunda uwa makwi mu Edeni kubufumilo bwizuba, po umuntu yuyo akamata nukumubika mulamula.

⁹ U Mwene u Chala akamezya amakwi amiza aghakulekanalekana nukupa ivikomwa ivyiza. Pakasikasi pa mughunda ghulaghula pakaba ikwi ilyakupa ubumi, sona nikwi ilyakumanyila ubwiza nu bubibi.

¹⁰ Ulusoko lulo lukendagha mu Edeni lo lulo lukasembelela umughunda ghula. Loli lukagabinkana pakuba isoko folo.

¹¹ Ulusoko lwakwanda we Pishoni, lukwenda umwakuchizyungulila ichisu icha Havila,

¹² kuko kukwaghiwako ugolide umwenecho, na mafuta aghakununkila, sona na mabwe aghamutengo.

¹³ Ulusoko ulwabubili we Gihoni, lukwenda umwakuchizyungulila ichisu icha Kushi.

¹⁴ Ulusoko ulwabutatu we Tigilisi, lukwenda kubufumilo bwizuba ubwa chisu icha Asiliya, po ulusoko ulwafolo we Yufuleti.

¹⁵ Po u Mwene u Chala akamubika umuntu yula mumughunda uwa Edeni ukuti alimaye nukughusungilila.

¹⁶ U Mwene u Chala akamubuzya umuntu yula akati, “Ungalya ivikomwa ivya mumakwi ghosi agha mumughunda ughu.

¹⁷ Loli utakalyanje ivikomwa ivya mwikwi ilyakumanyila ubwiza nu bubibi. Pakuti nanti walyamo bulo, naloli ukwiza pakufwa.”

¹⁸ Po u Mwene u Chala akati, “Te chiza ukuti umuntu ikalaye mwene. Nkwiza pakumupangila umwavwilizi.”

¹⁹ U Mwene u Chala akasenda itope nukumata ivinyamana ivyakulekanalekana, sona ni viyuni vyosi. Po akiza navyo kwa Adamu ukuti avyite amatabwa. Umu momumo akavyitila amatabwa ghabo.

²⁰ Po umuntu yula akavyita amatabwa iviyuni vyosi, sona ni vinyamana vyosi. Loli pope bulo chitakabapo nachimo chicho chikaba chakumubaghila pakumwavwa umuntu yula.

²¹ U Mwene u Chala akamughoneka u Adamu utulo utwakufwa nato. Bo aghonite, akasendapo ulubazu lumo ulwa muntu yula nukumatapo ni nyama.

²² U Mwene u Chala akamata umukolo nu lubazu lulalula nukwiza nawe kwa Adamu yula.

²³ Po u Adamu akati, “Uyu naloli we lifupa ilya mafupa ghane, sona we nyama iya nyama yane. Akwiza pakwitiziwanga ukuti, ‘Mukolo,’ pachifukwa ichakuti afuma ku mwanavuli.”

²⁴ Pachifukwa chinichi, umwanavuli akwiza pakumuleka uwise nu nyina nukumamatilana nu muchi wache, sona abantu babili aba bakwiza pakuba mubili ghoka.

²⁵ U Adamu nu muchi wache bosi poka bakaba nkule, loli batakaba ni soni.