Ubwandilo 19 - IBAYIBOLO 2024

Ukunanga ukwa bantu aba mu Sodomu

¹ Bo abantumi babili aba kumwanya bala binjila mukaya aka Sodomu pachamabwila, u Loti akikalagha pamulyango uwa kaya kala. Bo u Loti abennya bulo, akanyamuka pakubalamuka. Akafughama nukuti,

² “Mwee bamwene bane, nalamba, twende kunyumba yane, musukusule munyayo zyinyu nukutuzya ubusiku bunubu. Pandabindabi nkani mungendelela nu bulendo bwinyu.” Bakamula bakati, “Awe, aswe tukwiza pakughona kuzi pamunalo uwa mukaya akakulu nkani kanaka.”

³ Loli u Loti akabapepeka nkani mupaka bakitika nukubuka nawe kunyumba yache. U Loti akabayanizizya ulusekelo ulukulu nkani, poka ni vibama vivyo vite ni chilungo. Po bakalya.

⁴ Loli bo bataghonite, abanavuli bosi aba mukaya akakulu nkani kala, abalumendo na basongo bulo bakazyungulila inyumba iya Loti.

⁵ Bakamwitizya u Loti nukumulalusya ukuti, “Buli bali ko kwiyi abantu babo bizite pabusiku kuno? Bafumye kuzi kuno, ukuti tughone nabo!”

⁶ U Loti akafuma kuzi nukwighalilako kumulyango.

⁷ Akababuzya akati, “Mwee, bamanyani, mutakabombaye ichintu ichibibi chinichi.

⁸ Ennya, indi na bana abalindu babili babo bataghonitepo nalumo nu mwanavuli. Buli munyitikizye ukuti nize nabo kukwinyu, umwakuti mubombe nabo chosi chicho mukulonda. Loli mutakababombelaye abanavuli banaba ichintu ichibibi pakuti bayeni bane, sona imbaghiye pakubasungilila akiza.”

⁹ Loli bakati, “Epapo, we wakupona bulo wee! Nkimba wewenu awe ukuti utubuzye ichakubomba? Epapo, lumo tungakubombela ichibibi nkani ukuchila na bayeni bako.” Po bakamusunkila u Loti kulubazu nukupalamila kulwiyi ukuti balupankulannye.

¹⁰ Loli abantumi babili babo bakaba mukasi mula bakamuwesela u Loti mukasi nukwighalilako kumulyango.

¹¹ Po bakabapela pakuba bafwamaso abanavuli bosi babo bakaba kuzi bala, umwakuti bakatakawagha umulyango.

U Loti akufumamo mu Sodomu

¹² Abanavuli babili bala bakamulalusya u Loti bakati, “Nkimba uli nabo bamo abakamu mukaya muno, abana, pamo abakwalima? Ubefyemo mukaya muno,

¹³ pakuti tukwiza pakunangannya akaya aka. U Mwene ennya ububibi bubo abantu aba mukaya kanaka bakubomba, po atutuma pakukanangannya.”

¹⁴ Po u Loti akababuzya abakwalima babo bakazingila abana bache abalindu akati, “Lubilo, twepemo mukaya aka, pakuti u Mwene ali papipi pakukanangannya.” Loli abene bakennya ngati po sunga bulo.

¹⁵ Pandabindabi nkani bo kwacha, abantumi bala bakayezya nkani ukumwendelezya u Loti nukuti, “Lubilo, umusende umuchi wako na bana bako abalindu babili nukwepamo, umwakuti mupone bo u Chala ali pakukanangannya akaya akakulu nkani kanaka.”

¹⁶ Bo akuzyelazyela, abantumi bala bakamulema panyobe u Loti nu muchi wache, na bana bache abalindu bala nukubefyamo mukaya akakulu nkani kala, pakuti u Mwene akabapelela ichisa.

¹⁷ Bo babefyamo bulo mukaya mula, weka uwa bantumi bala akati, “Chimbila ukuti mwipoke! Mutakennyanje kwisinda, sona mutakimaye na napamopamo mwikombe. Chimbilila kumaghamba ukuti mutakaghoghiwe!”

¹⁸ Loli u Loti akabamula akati, “Awe, mwene wane, utakabombaye bunubu.

¹⁹ Wampelela ichisa nkani pakubupoka ubumi bwane. Loli intangachimbilila kumaghamba pakuti kutali nkani, lumo ukunanganika kunganyagha muzila nukungogha, bo intafikiteko nukufika.

²⁰ Ennya, akaya akanandi kala kali papipi kako ningachimbililamo. Napapo kaya kanandi nkani, loli ningaponelamo.”

²¹ Uwantumi yula akamula akati, “Ubupala butalipo, bukagha. Ntakwiza pakukanangannya akaya kanako.

²² Lubilolubilo, chimbila, pakuti ntakwiza pakunangannya akaya kanaka mupaka ufike mulamula.” Cho chifukwa akaya kala kakitiziwanga ukuti we Zowala.

Ukunanganika ukwa Sodomu nu Gomola

²³ Bo izuba lyafuma u Loti akaba ukuti afika kale mu Zowala.

²⁴ Po u Mwene akalaghazya amabwe agha moto uwa sulufule mu Sodomu nu Gomola.

²⁵ Akatuzimizya utwaya tula ni kombe lyosi, sona na bantu bosi aba mutwaya tula, poka ni vimelwa vyosi muchisu chilachila.

²⁶ Loli umuchi uwa Loti akennya kwisinda, akanduka pakuba libwe ilya mbeya.

²⁷ Pandabindabi nkani, u Abulahamu akachimbilila kubuzilo bubo akimilila nu Mwene.

²⁸ Akennya utwaya utwa Sodomu nu Gomola ni kombe lyosi lila, nukwennya ilyosi ilyakoghofya likusuka mutwaya mula, lilyo likayana bulo ni lyosi ilyakusuka mumuvuno.

²⁹ Bo u Chala anangannya utwaya utwa mwikombe tula, akamukumbuka u Abulahamu, akamupoka u Loti kuluzimilo lula lulo lukanangannya utwaya tuto u Loti akikalaghamo.

U Loti na bana bache abalindu

³⁰ Pachifukwa ichakuti u Loti akanyila pakwikala mukaya aka Zowala, yuyo na bana bache abalindu babili bala bakakwela amaghamba nukwikala mumpako.

³¹ Umwana usongo akamubuzya umunandi akati, “Utata witu akughosipa, po patalipo nayumo umuntu pachisu ichapasi uwakuti tungasendwako ukuti tupape nawe abana ngati mumo abantu bakubombela pachisu ichapasi.

³² Zagha tumung'wesye uvinyo ukuti akolwe. Po nanti akolwa, tughone nawe ukuti tupape nawe abana umwakuti uluko lwitu lutakazimilaye.”

³³ Ubusiku bulabula abana bala bakamung'wesya uvinyo uwise. Umwana usongo yula akaghona nu wise. Pachifukwa ichakuti u Loti akakolwa nkani, atakazimanya zizyo zikabombiwanga.

³⁴ Indabi yache umwana usongo yula akamubuzya umuzuna wache akati, “Pabusiku naghonite nu tata. Zagha tumung'wesye sona uvinyo ukuti akolwe ukuti nawe ughone nawe. Pakubomba bunubu uluko lwitu lutakwiza pakuzimila.”

³⁵ Po ubusiku bulabula bakamung'wesya sona uwise uvinyo, po umwana umunandi yula akaghona nawe. Pope bulo uwise atakazimanya zizyo zikabombiwa, pakuti akakolwa nkani.

³⁶ Po abana bosi abalindu aba Loti bala bakamela ulwanda ulwa wise.

³⁷ Umwana usongo akapapa umwana umulumendo yuyo akamwita ukuti we Mowabu. U Mowabu we munyenya uwa ba Amowabu.

³⁸ Wepe nu munandi akapapa umwana umulumendo nukumwita ukuti we Benami. U Benami we munyenya uwa aba Amoni.