Ubwandilo 17 - IBAYIBOLO 2024

Ukusilimula cho chimanyilo icha lufingo

¹ Bo u Abulamu ali na maka 99, u Mwene akamubonekela nukumubuzya ukuti, “Ane ne Chala Uwamaka Ghosi. Unyivwilaye, sona bombagha chicho chigholosu.

² Nkwiza pakufinga nawe ulufingo nukukupa abaluko abinji.”

³ U Abulamu akafughama, po u Chala akamubuzya akati,

⁴ “Ulufingo lulo indi pakufingana nawe lo ulu: Nkukulayizya ukuti ukwiza pakuba we munyenya uwa inko inyinji nkani.

⁵ Itabwa lyako lite likabe sona we Abulamu, loli we Abulahamu, pakuti indi pakukupela pakuba munyenya uwa inko inyinji nkani.

⁶ Nkwiza pakukupa abaluko abinji nkani, sona abanji bakwiza pakuba bamwene. Ukwiza pakuba na baluko abinji nkani umwakuti bakwiza pakuba inko inyinji nkani.

⁷ Ulufingo lwane ulwa bwila na bwila lukwiza pakwikala pakasi papako nane, sona napa baluko lwako ni nkulilo zyosi izya muntazi. Nkwiza pakuba ne Chala wako, sona nu Chala uwa baluko lwako.

⁸ Nkwiza pakukupa awe poka na baluko lwako ichisu ichi awe we muyeni. Ichisu chosi icha Kenani chikwiza pakuba cha baluko lwako bwila na bwila, sona nkwiza pakuba ne Chala wabo.”

⁹ U Chala akamubuzya sona u Abulahamu akati, “Nawe bulo ukumbukaye pakusunga ulufingo lwane lulo nkafingana nawe poka na baluko lwako babo bakwiza muntazi.

¹⁰ Awe poka na baluko lwako ulusungaye ulufingo ulu ulwakuti: Umwanavuli wesi pakasi papinyu asilimuliwanje.

¹¹ Ukwanda ilelo umwana wesi umwanavuli asilimuliwanje. Ichi chikwiza pakuba chimanyilo icha lufingo lulo luli pakasi papane namwe.

¹² Umwana wesi umwanavuli asilimuliwanje, bo ghachilapo amasiku eyiti. Umwanavuli wesi munkulilo yinyu, manyi mwana yuyo apapiwa mo munyumba yako, pamo umuzya yuyo aghuliwa pakasi pa bayeni.

¹³ Umwanavuli wesi asilimuliwanje, sona chinichi chikwiza pakuba chimanyilo ichakubombiwa pamabili ghinyu pakulanjizya ukuti ulufingo lulo luli pakasi papane namwe lwa bwila na bwila.

¹⁴ Umwanavuli wesi yuyo atasilimuliwe akwiza pakwefiwapo pakasi pabantu abaluko lwache, pachifukwa ichakuti atasungite ulufingo lulo nkafingana nawe.”

¹⁵ U Chala akamubuzya Abulahamu akati, “Ukwanda ilelo utakamwitizyanjepo sona umuchi wako itabwa ilya Salayi, loli umwitizyanje ukuti we Sala.

¹⁶ Nkwiza pakumusaya, sona akwiza pakukupapila umwana umulumendo. Nkwiza pakumusaya umwakuti akwiza pakuba we mayi uwa baluko abinji. Pakasi pa baluko lwache bakwiza pakufumamo abamwene.”

¹⁷ Po u Abulahamu akafughama, akaseka nukuti, “Mwebaya mwee, nkimba chingabombiwa ukuti umwanavuli yuyo ali na maka 100, apape umwana? Nkimba u Sala yuyo ali na maka 90 angapapa umwana?”

¹⁸ U Abulahamu akamulalusya u Chala akati, “Nkimba choni chicho utakumuleka u Ishimayeli pakuba wampyana yane?”

¹⁹ Loli u Chala akamwamula akati, “Awe, umuchi wako u Sala weyuyo akwiza pakukupapila umwana umulumendo, po ukwiza pakumwita ukuti we Yisaki. Nkwiza pakusunga ulufingo lwane nawe, sona na baluko lwache. Ulufingo lunulu ulwa bwila na bwila.

²⁰ Pakunena nizya Ishimayeli, nkwiza pakumusaya nukumupa abana abinji, sona na baluko abinji. Akwiza pakuba we tata uwa bamwene 12, sona abaluko lwache bakwiza pakuba luko ulukulu nkani.

²¹ Loli nkwiza pakusunga ulufingo lwane lulo nkafinga nu mwana wako u Yisaki, yuyo u Sala akwiza pakukupapila mumwaka uwa ndabi pakabalilo ngati kanaka.”

²² Bo u Chala amala pakunena nu Abulahamu akabuka nukumuleka palapala.

²³ Pisiku lilalila u Abulahamu akakumbuka zizyo u Chala akamubuzya, po akamusilimula umwana wache u Ishimayeli, poka na banavuli bosi, sona na bazya bosi babo bakapapiliwa munyumba yache, sona na bosi babo bakaghuliwa.

²⁴ U Abulahamu akasilimuliwa bo ali na maka 99,

²⁵ sona umwana wache u Ishimayeli akaba na maka 13.

²⁶ U Abulahamu nu mwana wache u Ishimayeli bakasilimuliwa poka pisiku lilalila,

²⁷ poka na banavuli bosi babo bakapapiliwa munyumba yache, sona na bosi babo akabaghula. Bosi banaba bakasilimuliwa poka nawe.