Ubwandilo 16 - IBAYIBOLO 2024

Nizya Hagala nu Ishimayeli

¹ U Salayi umuchi uwa Abulamu atakamupapilapo nu mwana nayumoyumo. Loli akaba nu wambombo wache umukolo uwamu Ijiputi, yuyo akaba we Hagala.

² Po u Salayi akamubuzya u Abulamu akati, “U Mwene atampiye nu mwana nayumoyumo. Buli nanti ungaghona nu wambombo wane uyu ukuti pamo angampapila abana?” U Abulamu akitinkana nazyo zizyo u Salayi akamubuzya.

³ Po u Salayi akamupa u Abulamu uwambombo wache u Hagala pakuba muchi wache. Zinizi zikabombiwa bo u Abulamu ikala amaka 10 muchisu icha Kenani

⁴ Bo u Abulamu amumanya u Hagala, po u Hagala akamela ulwanda. U Hagala akazyaghannya ukuti amela ulwanda, po akanda amadinko nukwanda pakumusamula u Salayi.

⁵ U Salayi akilumbusya kwa Abulamu akati, “Ukunanga kosi ukwa Hagala kunuku ukwakuti ansamulaye pachifukwa icha wewe. Ane nkakupa uwambombo wane yunuyu pakuba muchi wako, po ukwandila akabalilo kako akamelela ulwanda, akunsamula ko kunsamula. U Mwene witu weyuyo alonge ukuti wewenu ananga pakasi papako nane.”

⁶ U Abulamu akamula akati, “U Hagala yunuyu wambombo wako, sona ali pasi pabulaghili bwako. Bomba nawe chosi chicho ukulonda.” Po u Salayi akamuyivya nkani u Hagala mupaka akachimbila.

⁷ Uwantumi uwa Mwene akakomana nu Hagala pachiziba munkolongo pazila iyakubukila kukaya aka Shuli,

⁸ nukumulalusya u Hagala ukuti, “Wee Hagala, uwambombo uwa Salayi, nkimba wafuma kwiyi sona ukubuka kwiyi?” U Hagala akamula akati, “Nkumuchimbila u mwene wane u Salayi.”

⁹ Uwantumi uwa Mwene yula akamubuzya akati, “Nyokela kwa Salayi, ubanje pasi pabulaghili bwache.

¹⁰ Nkwiza pakukupa abaluko abinji nkani abasita ukubelengiwa.”

¹¹ Uwantumi uwa Mwene akamubuzya sona akati, “Ukwiza pakupapa umwana yuyo ukwiza pakumwita ukuti we Ishimayeli, pachifukwa ichakuti u Mwene ivwa ukulila kwako.

¹² Loli umwana wako yunuyu akwiza pakuyana bulo ni mpunda. Akwiza pakuba mulwani uwa muntu wesi, sona umuntu wesi akwiza pakumubenga. Akwiza pakuba nu moyo uwa chinyamana pakasi pa bakamu bache bosi.”

¹³ Po u Hagala akamwita u Mwene yuyo akanena nawe ukuti, “Awe we Chala yuyo akwennya,” pakuti akati, “Ilelo namwennya yuyo akunyennya ane.”

¹⁴ Ichi cho chifukwa abantu bakuchita ichiziba chicho chili pakasi pa Kadeshi nu Beledi ukuti, “Ichiziba icha Mumi yuyo Akunyennya Ane.”

¹⁵ Po u Hagala akamupapila u Abulamu umwana nukumwita ukuti we Ishimayeli.

¹⁶ Umwana yunuyu akapapiwa, bo u Abulamu ali na maka 86.