Ubwandilo 13 - IBAYIBOLO 2024

U Abulamu nu Loti bapaghunkana

¹ Bo u Abulamu nu muchi wache epamo muchisu icha Ijiputi, poka nu katundu wache wesi, akakwela ku Negebu, wepe u Loti akabuka poka nawe.

² U Abulamu akaba muntu umukabi nkani. Akaba ni ng'ozi, ni mbuzi ni ng'ombe nu siliva, sona nu golide.

³ Akendelela nu bulendo bwache ubwakwimakwima pakubuka kukaya aka Beteli, kuko kale akazengako ivisakasa vyache pakasi pa kaya aka Beteli naka Ayi.

⁴ Panapo po papo kale akazengapo ichighemo. Kulakula u Abulamu akamwiputa u Mwene.

⁵ U Loti yuyo akendagha nu Abulamu, wepe akaba mukabi nkani. Akaba ni ng'ozi, ni mbuzi, sona ni ng'ombe, poka na bamunyumba yache, sona na babombi bache.

⁶ Loli ubuzilo ubwakudimapo ivitekwa vyabo bukaba bunandi ukuti abantu babili banaba bikalaye poka.

⁷ Po ivyongo vikanda pakasi pa badimi aba Abulamu na badimi aba Loti. Pakabalilo kalakala, aba Kenani naba Pelezi bakaba bachili bakwikala muchisu chilachila.

⁸ Po u Abulamu akamubuzya u Loti akati, “Awe nane twe banamuntu, polelo patakabe ivyongo pakasi papako nane, sona na pakasi pa badimi bako na badimi bane.

⁹ Zagha tupaghunkane, usale ichigaba chosi icha chisu chicho ukuchilonda. Nanti ukubuka kumitu, ane nkwiza pakubuka kuntende. Nanti ukwinjilila kuntende, ane nkwiza pakwinjilila kumitu.”

¹⁰ U Loti akatalankannya nukwennya ukuti ikombe lyosi ilya Yolodani mupaka ku Zowala likaba na mizi aminji nkani. Ikombe lila likayana nu mughunda uwa Mwene pamo ichisu icha muvundo icha Ijiputi. Zinizi zikabombiwa pakabalilo kako bo nu Mwene achili atazimizizye akaya aka Sodomu naka Gomola.

¹¹ Po u Loti akasala ikombe lyosi ilya Yolodani. Akanyamuka nukubuka ichakubufumilo bwizuba. Umu momumo abantu babili banaba bakapaghunkanilana.

¹² U Abulamu akikala muchisu icha Kenani, loli u Loti akikala pakasi pa twaya utukulu nkani utwa mwikombe, po akazenga ivisakasa vyache papipi nu Sodomu.

¹³ Abantu aba mu Sodomu bakaba babibi nkani, sona bakamunangila nkani u Mwene.

U Abulamu akusamila mu Hebuloni

¹⁴ Bo u Loti abuka, u Mwene akamubuzya u Abulamu akati, “Talankannya akiza nkani, kumitu na kuntende, sona kubufumilo na kubwinjililo bwizuba.

¹⁵ Nkwiza pakukupa awe na baluko lwako ichisu chosi chicho ukuchennya, po chikwiza pakuba chako ni chako bwila na bwila.

¹⁶ Nkwiza pakukupa abaluko abinji nkani umwakuti atalipo nayumoyumo yuyo angababelenga. Nanti umuntu angabelenga ulufumbi ulwa muchisu ichapasi, kokuti angababelenga abaluko lwako.

¹⁷ Nyamuka endela ichisu chosi chinichi pakuti nakupacho.”

¹⁸ Po u Abulamu akasamya ivisakasa vyache nukuzenga papipi na makwi agha mupandapanda pabuzilo ubwa Mamule mukaya aka Hebuloni. Kulakula akamuzengela ichighemo u Mwene.