Ubwandilo 12 - IBAYIBOLO 2024

U Chala akumwitizya u Abulamu

¹ U Mwene akamubuzya u Abulamu akati, “Fumamo muchisu chako. Ubaleke abakamu bako, nakaya aka ghuso, nukubuka kuchisu chicho nkwiza pakukulanjizya.

² Nkwiza pakukupa abaluko abinji nkani, sona nkwiza pakubapela pakuba luko ulwamaka nkani. Nkwiza pakukusaya nukukupela pakuba muntu umumanyikwe, ukwiza pakuba we lusayo ulwa bantu abanji.

³ Nkwiza pakubasaya bosi babo bakukusaya. Loli bosi babo bakukughuna nane nkwiza pakubaghuna. Inko zyosi pachisu ichapasi nkwiza pakuzisaya ukwendela mumwako.”

⁴ Po u Abulamu akepamo ukuyana namumo u Mwene akamulamulila sona u Loti akabuka nawe. U Abulamu akaba namaka 75 bo akwepamo muchisu icha Halani.

⁵ U Abulamu akamusenda umuchi wache u Salayi nu Loti umwana uwa muzuna wache. Akasenda ni chuma chache chosi, na bambombo babo akikalagha nabo muchisu icha Halani. Bakanyamuka ubulendo ubwakubuka ku Kenani. Bo bafika mu Kenani,

⁶ u Abulamu akendela ichisu chosi mupaka mukaya aka Shekemu, mupaka nukufika pikwi ilya mupandapanda mu Mole. Pakabalilo kalakala, aba Kenani bakikalagha muchisu chilachila.

⁷ U Mwene akamubonekela u Abulamu nukumubuzya ukuti, “Ichi cho chisu chicho nkwiza pakubapa abaluko lwako.” Palapala u Abulamu akamuzengela ichighemo u Mwene yuyo akamubonekela.

⁸ Pisinda pache akakwela kuchisu icha maghamba kubufumilo bwizuba ubwa Beteli nukuzenga ivisakasa vyache pakasi pa Beteli kubwinjililo bwizuba nu Ayi kubufumilo bwizuba. Kulakula akazenga sona ichighemo nukumwiputa u Mwene.

⁹ Po u Abulamu akendelela nu bulendo bwache ubwakwimakwima ukwikila ku Negebu muchigaba icha kuntende.

U Abulamu muchisu icha Ijiputi

¹⁰ Loli muchisu icha Kenani mukawa izala inkulu nkani. Pachifukwa icha zala yilayila u Abulamu akabukagha kuntende mupaka akafika muchisu icha Ijiputi nukwikala kulakula akabalilo akanandi bulo.

¹¹ Bo u Abulamu ali papipi pakuloboka impaka iya chisu icha Ijiputi, akamubuzya umuchi wache u Salayi akati, “Weya we, inzimenye ukuti we mukolo uwakuboneka akiza nkani.

¹² Nanti aba Ijiputi bakwennya bakwiza pakunena ukuti, ‘Uyu muchi wache.’ Po bakwiza pakungogha nukukuleka awe mumi.

¹³ Nalamba ubabuzye ukuti, ‘Ane ne muyemba wache.’ Pakubomba bunubu bakwiza pakunsunga nubumi nukunsungilila akiza pachifukwa icha wewe.”

¹⁴ Bo u Abulamu aloboka impaka nukufika muchisu icha Ijiputi, abantu aba mulamula bakennya ukuti umuchi wache u Salayi naloli akaba mukolo uwakuboneka akiza nkani.

¹⁵ Bo amakambala agha Falabo ghamwennya, ghakamubuzya u Falabo ukuti umukolo yula akabonekagha akiza nkani. Po ghakamusendela kunyumba iya bumwene.

¹⁶ U Falabo akamusungilila akiza nkani u Abulamu pachifukwa icha Salayi. Akamupa ing'ozi, ni mbuzi, ni ng'ombe, ni mpunda, na bazya, sona ni ngamila.

¹⁷ Pachifukwa icha Salayi, umuchi uwa Abulamu, u Mwene akamutumila u Falabo poka na bamunyumba yache ububine ubupalapala.

¹⁸ Po u Falabo akamwitizya u Abulamu nukumulalusya ukuti, “Nkimba cho choni chicho wambombela? Nkimba choni chicho utakambuzya ukuti muchi wako?

¹⁹ Nkimba choni chicho ukatinji muyemba wako? Ennya nkamusenda pakuba muchi wane. Umuchi wako uyu, musende ubukaye.”

²⁰ Po u Falabo akabalamula abantu bache, bakamwefyamo muchisu chila u Abulamu nu muchi wache, poka nu katundu wache wesi.